Viernes 5 xla julio kata 2013, Anthony Morris, kgolotsin tiku katatapakgsi lakgkgolotsin tiku pulalinkgo xtatayananin Jehová, mastalh uma tamakatsin nema kaks malakawaninan anta kBetel xalak Estados Unidos: «Tlawakanit akgtum talakkaxlan xlakata natasta akgchaxan edificios nema wilakgolh kcalle Adams número 117 chu kcalle Sands kBrooklyn número 90. a Talakkaxlan nema tatlawalh wan pi talakaskin pi edificio 1 asta 5 nialhtu natawila kxitat papaʼ xla agosto xla ama kata».

Liwana tasiya pi xʼama anan lhuwa taskujut. Umakgolh akgkitsis edificios xtachuna xlilanka 11 campos xla fútbol nema lu laklanka. ¡Chu kaj tutumpuxam kilhtamaku xkgalhikgo xlakata xtapanukgolh chu putum xmakgxtakgkgolh!

Akglhuwa kata, edificios 1 asta 5 anta xkatlawakan likgalhtawakga, pero kata 2004 putum uma linka kWallkill (Nueva York).

Lata ama kilhtamaku, umakgolh edificios xlimaklakaskimaka la talleres chu niku kamakikan tuku tamaklakaskin kʼoficina chu tuku xlichikinankan. Nachuna, xmakikan putum liskujni chu maquinas nema maklakaskinkan akxni chikinankan kʼEstados Unidos chu kʼatanu kachikinin.

Xlakata tlan putum xmapanuka tuku xwi xtalakaskin liwana xlakkaxwilika. Pulana, liwana laklhkawilikgolh tuku nastakgo, tuku namakgankgo chu tuku namakikgo. Chu alistalh lakkaxwilikgolh la namapanukgo putum tuku xwi kʼumakgolh edificios xlakata tlan xtatlawalh, liwana xtlawaka chu paks tlan xtaxtucha.

Familia Betel xatapaxuwan makgtayanalh. Nachuna, chinkgolh 41 natalanin tiku xalak lhuwa kachikin xla Estados Unidos tiku xatapaxuwan makgtayanankgolh. Umakgolh natalan, atsinu ni putum laktsuman chu lakgkgawasan tiku nina tamakgaxtokgkgo chu lakgtliwakgan, makgamakglhtinankgolh invitación xlakata namakgtayanankgo akgchaxan asta akgkaw semanas kBetel. Uma tlawalh pi tsinu xmakgxtakgkgolh xfamiliajkan chu xʼamigoskan, nachuna xtaskujutkan. ¿Chu la kakitaxtunilh xlakata tuku tlawakgolh?

Jordan, tiku kgalhi 21 kata, mincha kkachikin Washington. Xla wan: «¡Xtalakaskin pi pulanaja xaktimalakgachalh kisolicitud!».

Steven, tiku mincha kTexas chu kgalhi 20 kata, wa: «Kmakgkatsi pi kmakgtapakgsi akgtum familia xlikalanka katiyatni tiku palha skujkgo chu xatapaxuwan».

Justin, tiku kgalhi 23 kata, tsokgli: «Unu kBetel la kkinchik kwi kmakgkatsi. Lu tlan tamakgkatsi akxni akxtum nakatatawilaya tiku tliwakga wi xtakanajlakan nema tlan nalikatsinikgoyan chu tlan natalalinkgoyan».

Adler, xalak Puerto Rico tiku kgalhi 20 kata, wa: «Akit, tuku tuwa kmakgkatsi wa pi lu tsisa naktaki; pero lhuwa kkakgalhinit kiʼamigos tiku putum kilhtamaku nakkatalalin».

William, tiku kgalhi 21 kata, lakapastaka: «Lata aktsujku xakwanit xaklakpuwan pi nakmin kBetel. Pulana xaklakpuwan pi kaj kiʼakstu chu la xatsankgan xakama makgkatsi, pero ¡nichuna! Betel nitu tuku xtachuna. Ni anan atanu niku tlakg tlan».

¿Makgantaxtikgolh chuna la xlaklhkawilikanit? Chuna. Chu wa tuku tlakg tlan, kaj tipuxumakukitsis kilhtamaku litlawakgoka uma.