Makxtum katlawakan makgapitsi sucursales xla xtatayananin Jehová
Lata septiembre kata 2012, liwaka akgpuxam sucursales xla xtatayananin Jehová tsukukgolh kapulalinkgo sucursales nema tlakg laklanka.
Nachuna, kSerbia chu kMacedonia wilakgolh xasasti sucursales. Wi pulaktiy tuku xlakata chuna tatlawalh.
1. Tuku xasasti taxtuma tlawa pi lakapala natatlawa taskujut
Umakgolh xaʼawatiya kata, xlakata tlakg taxtuma tuku xalaksasti xlakata tuku liʼimprimirlinankan chu tuku lichuwinankan uma tlawa pi nialh lhuwa naskujkgo ksucursales. Chu uma tlawalh pi tlakg naʼanan niku natawilakgo amakgapitsin tiku naskujkgo ksucursales chu ni kajwatiya tiku kskujkgo xalaktsu sucursales.
La uku, tiku liwana katsikgo la taskuja pulalinankgo la talichuwinama Dios makgapitsi países. Kaj kalichuwinaw pulaktum, lata kMéxico pulalima la talichuwinama Dios kCosta Rica, El Salvador, Guatemala, Honduras, Nicaragua chu Panamá. Wa xlakata, sucursales xalak uma akgchaxan países kamalakchuwaka.
Tipuxum xtatayananin Jehová tiku anta kskujkgo kamalakgachaka ksucursal xalak México, max tatipuxumakitsis kamalakgachaka nalichuwinankgo xalakwan xalaksasti putum kilhtamaku kxpaíseskan.
Amakgapitsin, sucursal xalak México nema pulalima taskujut, na pulalinama kʼoficinas de traducción xliputum Centroamérica. Akgtum liʼakxilhtit, kPanamá wilakgolh kgalhapuxam xtatayananin Jehová tiku matitaxtikgo likgalhtawakga ktachuwin xala anta. Chu anta niku xwi sucursal xalak Guatemala, la uku wilakgo 16 xtatayananin Jehová tiku matitaxtimakgo likgalhtawakga xala anta. Xlakata 300 tiku xmakgtapakgsikgo ksucursales xalak Centroamérica, max 75 tiku wilakgo kmakgapitsi kisucursaleskan.
2. Talakaskin tiku putum kilhtamaku nalichuwinankgo Dios
Xlakata makxtum katlawaka xalaktsu sucursales, lhuwa xtatayananin Jehová tiku tlakg katsikgo chu kskujkgo kʼumakgolh sucursales tlan putum kilhtamaku nalichuwinankgo xalakwan xalaksasti.
Chatum xtatayana Jehová xalak África nema lakgayawaka xlakata putum kilhtamaku nalichuwinan Dios tsokgli: «Tuwa kmakgkatsilh niku kimalakgachaka xapulana papaʼ. Pero xlakata chali chali klichuwinan Dios lu tlan kimamakgkatsini chu kkgalhi lhuwa tasikulunalin. La uku kkamakgalhtawakge 20 latamanin chu makgapitsi aya ankgo ktamakxtumit».