Lata octubre kata 2012, tiku lakgapaxialhnankgo niku pulalinkan xtaskujutkan xtatayananin Jehová, kBrooklyn (Nueva York), wi tuku wilikanit nema tlan akxilhkan. a Uma masiya tuku tuwa titaxtukgolh, taʼakglhuwit chu tuku tlan kakitaxtuninit tiku tatayakgo Cristo chu lichuwinan tuku titaxtukgolh xtatayananin Jehová.

Gira pulaktati mapitsikanit chu kawilinikanit tukuya kata lalh pulakatunu chu tsuku kkata 33 akxni xlamakgo apóstoles asta la uku. Pulakatunu kgalhi título nema takilhtinit kBiblia chu tasiya akgtum aktsu video (kxaʼinglés chu kgalhi subtítulos kʼakgchaxan tachuwin nema tlan nalaksaka: coreano, español, francés, italiano, japonés chu portugués).

Xtítulo xlipulaktum takilhtinit kxtachuwin Jesús anta kJuan 3:19 wa “Lakchixkuwin wata wa tlakg paxkikgonit xakapukswa”. Biblia xlichuwinanit pi xʼama minkgo lakchixkuwin tiku nitlan xlikatsikgolh chu “ntu ni talulokgtat xʼamakgo lichuwinankgo” xlakata xkaʼakgskgawikgolh latamanin (Hechos 20:30). Tuku lanit limasiya pi nitlan tuku tlawakgolh umakgolh lakchixkuwin.

Xtítulo xlipulaktiy wa «Kamakgaxkgakganalh xkgakganat», nema takilhtinit k2 Corintios 4:6. Chuna la limasiya kata, uma lichuwinan lata ksputma siglo XIX asta akxni xtsukuma siglo XX, akxni nina xtsuku xaPulana Guerra xLikalanka Katiyatni. Anta talichuwinan pi makgapitsi lakchixkuwin tsukukgolh putsananikgo Biblia lata xkilhtsukut. Na talichuwinan la tlakg kgalhitilhakgolh takatsin chu tlakg talhuwikgolh.

Kʼuma sección na wi niku kaj «Foto-Drama de la Creación» wilikanit, akgtum película nema lu lakgapaskan. Kkata 1914, xLikgalhtawakgananin Biblia (chuna la pulana xkalilakgapaskan xtatayananin Jehová) maxtukgolh uma película, nema xkgalhi diapositivas, películas chu xtakgaxmata. Kata nema titaxtukgolh, millones latamanin ankgolh akxilhkgo. Niku masiyakan, na wilikanit dibujos xaʼoriginales nema tamaklakaskilh chu liwaka akgkitsis ciento diapositivas nema kgalhikgo color, chu akgtum video nema kgalhi akatsunin xlakata tuku xlitsuku.

Xlipulaktutu wanikan “Luwa lipekua tisitsilh” nema takilhtinit kʼApocalipsis (Revelación) 12:17. Lichuwinan akxni kaputsastalanika lhuwa kstalaninanin Cristo kxʼitat siglo XX chu na lichuwinan la ni makgtanukgolh kʼguerra. Akgtum liʼakxilhtit, wi akgtum video xlakata Remigio Cuminetti, chatum xtatayana Jehová tiku ni wiliputulh xʼuniformejkan soldados xalak Italia chu ni makgtlawaputulh xaPulana Guerra xLikalanka Katiyatni. Atanu video lichuwinan chatum austríaco Alois Moser, xlakata ni wa «¡Heil Hitler!», makgatsankgalh xtaskujut chu malakgachaka kcampo de concentración xalak Dachau.

Wilikanit chuna la xtasiya pulachin chu anta wilakgo fotos xla xtatayananin Jehová tiku katamaknuka kpulachin xlakata xtakanajlakan anta kʼGrecia, Japón, Polonia chu Serbia.

Xaʼawatiya sección kgalhi título «Xalakwan xalaksasti tamakatsin kputum laklanka kachikinin», nema takilhtinit kMateo 24:14. Lichuwinan xtaskujutkan xtatayananin Jehová lata 1950 asta la uku. Fotografías nema masiya pulaktu tuku tlakg xlakaskinka xlakata xtatayananin Jehová: la xlilakapala talhuwikgolh, la xlilhuwa lichuwinankgo Dios chu la lapaxki.

Akxni nina sputa gira, tlan naʼakxilha pantallas nema tatsuwikgo xlakata naʼakxilha Casa Bíblica chu Tabernáculo xalak Brooklyn nema tamaklakaskilh akgtum ciento katata.

Akgtum kata litlawaka uma, chu akglhuwa papaʼ likaxwilika. Xtatayananin Jehová xlikalanka katiyatni malakgachakgolh tuku xkgalhikgo nema xala makgasa xlakata tlan xkawilika.

¿Tuku xlakata talakaskilh lhuwa taskujut? Akxni kgalhskinka chatum kgolotsin tiku na makgpulalin xtatayananin Jehová tuku xlakata lu xlakaskinka pi xtatayananin Jehová xʼankgolh akxilhkgo, xla likgalhtinalh uma tachuwin nema lu lakgapaskan: «Nila katikatsi niku pimpat, komo ni katsiya niku tanita».