Liwaka tipuxam kata, akgtum lanka letrero xaspinini (4.6 metros xlitalhman) nema tasiya kxatalhman chiki niku pulalinkan xtaskujutkan xtatayananin Jehová, niku xalak Nueva York akxilhkgo hora chu la wi kilhtamaku. Nachuna, na stlan masiya kachikin.

Eboni, nema tlan akxilha asta niku wi kBrooklyn (Nueva York), wan: «Makgtayanan xlakata tlan kakxilha kkiventana hora chu la wi kilhtamaku akxni nina kan skuja. Chuna tlan kkatsi komo sokgku kama chu naklin lhakgat nema xlilat».

¿Chuntiya natitawila uma letrero tipuxam kata? Max ni, xlakata xtatayananin Jehová lakkaxwilimakgolh pi knoreste kachikin Nueva York anta natawila niku napulalinkan xtaskujutkan xtatayananin Jehová. Wa xlakata tiku natamawakgo uma chiki wa katsikgo tuku natlawanikgo uma letrero.

Lata tutumpuxamakaw kata, uma chiki xkgalhi tanu letrero. Xtatayananin Jehová lilakgpalikgolh nema la uku akxilhaw lata akxni tamawakgolh uma chiki kata 1969.

Uma letrero maklakaskin pi nakuentajtlawakan putum kilhtamaku. Akglhuwata kata tiku lakgkgawasanku kaxtlawakgonit akxni tamaklakaskin.

Chatum tiku xkuentajtlawanan katsisni wan: «Akgtum katsisni kilhmilh tiku xpulalin noticias xla akgtum canal xla televisión. Kinkawanin pi xakkaxwiliw hora xlakata akgkukitsis segundo xtalakgpalinit, kinkawanin pi tunkun xakkaxwiliw xlakata ama tsisni xʼama taxtu kxprograma. Maski xlhtataputuxnima técnico lakapala alh kaxtlawa».

Lata titaxtutilha kata, letrero kaxtlawatilhakanit. Akgtum liʼakxilhtit, xapulana xkgalhi hora chu tuku lipulhkakan kilhtamaku nema wanikan Fahrenheit, pero kxʼitat década 1980 wilinika grados Celsius.

Nachuna, kata 2009 lilakgpalinika xtubos xla neón nema tlakg xalaksasti chu ni lu tapalaxla kitaxtu xmakgskgot nema spinini pasa (LED) chu ni lakapala lakxla chu makgapala, chu nialh talaktlawa 4,000 dólares akgatunu kata akxni kaxtlawakan. La uku uma letrero kaj tsinu luz laktlawa nichuna la xapulana, chu wa xlakata spinini pasa uma letrero chu «xtakni».