Lata 6 asta 16 xla junio kata 2013, lhuwa millones latamanin xlikalanka katiyatni ankgolh kpuerto xalak Ruán, kxnorte Francia xlakata naʼakxilhkgo tuku kaks malakawaninan: Armada.

Akxni ankgolh liwaka 120 kilómetros kkgalhtuchokgo Sena, nema xtasiyakgo kNormandía, tlakg xalaklanka barcos chu lu lakstlan xliputum katiyatni akgtujun kilómetros xlilhman niku tawilakgolh anta niku xlichanatkan xwanit. Akgkaw kilhtamaku, tiku kilakgolh tlan tanukgolh k45 barcos nema makgtlawakgolh uma.

¿Tuku xlakata kilakgolh lhuwa latamanin? Chuna la wan tiku lakkaxwililh chu tiku matsukilh uma Armada, akxni latamanin akxilhkgo uma laklanka barcos lu kamakgapaxuwa. Atsinu ni putum latamanin, tiku laktsujku chu tiku laklankata, akxni akxilhkgo laklanka barcos lakpuwankgo pi tlan makgat naʼankgo chu tlan nalakgtaxtukgo.

Lhuwa mil tiku kilakgolh kgaxmatkgolh xlakata atanu lakgtaxtut, wantuku kgalhikan akxni katsinikan tuku xlikana masiya Biblia (Juan 8:​31, 32). Akxni paxialhnankgolh kRuán chu titaxtukgolh kxtijikan chu niku lhuwa lamaka, xʼakxilhkgo niku xwilikgonit likgalhtawakga xtatayananin Jehová xlakata uma kilhtamaku. Akxni chatum tiku kaj xpaxialhnama o chatum marinero xtalakatsuwi niku xwilakgo likgalhtawakga, xwanikan pi tlan xtiyalh likgalhtawakga nema xlakaskilh chu ni taxokgo. Lhuwa latamanin lakgatikgolh revista Makatsinina xla junio kata 2013, nema xlimin xtema: «¿Tukuya kilhtamaku nialh katiʼanalh talaksakpaxkit?». Na kawanika pi xʼankgolh kgaxmatkgo taʼakgchuwin xalak Biblia kfrancés, inglés chu xaʼespañol.

Makgapitsi latamanin xalak kkachikin lu xlakaskinka xʼakxilhkgo tuku xtlawamakgo xtatayananin Jehová. Chatum chixku, tiku kaks lilakawa akxni kaʼakxilhli makgapitsi xtatayananin Jehová anta ktiji wa: «¡Lu klipaxuwa pi kkatekgsman unu! Ni kkanajla chuna la wixin, pero kaks kimalakawani tiku chuna la wixin ni makgxtakgkgo tuku kanajlakgo». Chatiy lakchixkuwin tiku linkgoya kata kawanikgolh chatiy lakgkgawasan xtatayananin Jehová: «Lu tlan kalimakgkatsitit xlakata tiku wixin».