Lhuwa mil latamanin tiku kilakgolh kFeria Internacional 2014 xalak Ruán (kachikin kxnorte Francia) akxilhkgolh tuku xwilikanit nema xwanikan: «Biblia: makgasa, la uku chu kilhtamaku nema aku mima».

Kxlakatin niku xkawilikanit, xwilakgo pantallas nema xmatitaxtimaka video nema xlichuwinan xamakgan tatsokgni xla Biblia. Tiku xtalakatsuwikgo akxni xʼakxilhkgo video, na katsinikgolh pi Biblia limin xatlan tastakyaw, xaʼakchan akxni lichuwinan tuku lanit makgasa, na watiya lichuwinan tuku tekgskgonit científicos chu lhuwa maʼakgpitsikanit.

Uma tuku xwilikanit masiya la Biblia chilh asta la uku kkinkilhtamakujkan chu la tlawakanit xlakata lhuwa latamanin nakgalhikgo kpulaklhuwa formatos, xakapsnat chu xaʼelectrónicos. Tiku kilakgolh kamaskiwika maktum Traducción del Nuevo Mundo, nema tlawakgonit xtatayananin Jehová kliwaka 120 tachuwin.

Tiku kilakgolh paxtikatsinikgolh xtatayananin Jehová xlakata tlawakgolh Biblia chu latamanin tlan xkgalhikgolh. Chatum tiku kamakgtaya tiku maklakaskinkgo tamakgtay nema kakitalalh makgapitsi kamanan wa: «Biblia wa tuku lu tlan kamakgxtakgniyaw kamanan. Tuku tlawakanit chuntiya makgtayanan. Akxni klikgalhtawakga, kkatsi la naklakkaxtlawa kintaʼakglhuwit».

Chatum puskat tiku kgalhi 60 kata kaks lilakawa pi tlan maskiwika maktum Biblia chu wa: «Kimputumkan kilikgalhtawakgatkan; lu maklakaskinaw».