Noviembre kata 2011, makgapitsi xtatayananin Jehová tsukukgolh kalimasmani latamanin nakalitachuwinankgo tamakatsinin nema takilhtinit kxTachuwin Dios. Wa xlakata, limaklakaskinkgolh nema lakstlan tasiya niku kawilikan likgalhtawakga anta kManhattan, kachikin nema tlakg makgasa wi chu niku tlakg lhuwa titaxtukgo latamanin xliputum kachikin xalak Nueva York.

Pulaktati tlawaka akgatunu área, chu kawilika niku wilikan likgalhtawakga nema lakstlan tasiyakgo chu tiku lakgatayakgo wa tiku lichuwinankgo Dios xalak kachikin. Atsinu ni putum wilakgolh lakatsu niku taxtukgo putlaw, niku tlan naʼakxilhkgo tiku titaxtukgo chali chali.

Latamanin tiku talakatsuwikgo niku wilakgolh likgalhtawakga tlan kakgalhtikan xtakgalhskininkan nema kgalhikgo xlakata Biblia. Chu tiku ni lhuwa kilhtamaku kgalhikgo tlan natiyakgo maktum likgalhtawakga chu alistalh nalikgalhtawakgakgo.

Niku kawilikan likgalhtawakga wilakgolh ktipalhuwa tachuwin chu komo wi tiku nalakaskin ktachuwin nema ni kgalhikan, tlan naskin, chu namin tiya atanu kilhtamaku.

Latamanin lakgatikgonit uma tuku tatlawama chu nachuna mapakgsinanin. Akgtum liʼakxilhtit, chatum policía wa: «¿Tuku xlakata ni chuna xtlawayatit makgasata? Wixin kgalhiyatit tuku maklakaskinkgo latamanin».

Chatum chixku tiku xtitaxtuma lakapala tachokgolh akxni akxilhli libro ¿Tuku xlikana masiyay Biblia? Xlakata xʼakxilhnit pi lhuwa latamanin xlikgalhtawakgamakgolh kmetro chu xkgalhskinkan niku xtiyakgonit. La uku xkatsiyata.

Chatum kgawasa putum kilhtamaku kaj xtitaxtu lakatum niku xkawilikanit likgalhtawakga akxni xʼan kxtaskujut. Akxni titaxtulh akgchaxan papaʼ, tachokgolh chu kawanilh xtatayananin Jehová pi xlakaskin tamakgtay. Xlakan xatapaxuwan makgtayakgolh. Maxkikgolh maktum Biblia chu masiyanikgolh la nalitamakgtaya.

Lhuwa latamanin tachokgokgo xlakata nakalitachuwinankan Dios chu xatapaxuwan ankgo. Kaj xlakata uma, kaj akgtum papaʼ tamakgpitsilh 3,797 revistas chu 7,986 libros.