Nina makgas anta kʼQueens, New York, 23 xtatayananin Jehová kilakgolh xlakata nakatsinikgo chuwinankgo chu kgalhtawakgakgo bengalí, uma tachuwin maklakaskinkan kBangladesh chu kmakgapitsi xkachikin India. Tiku xmasiyakgo uma tachuwin xtatayananin Jehová xwankgonit, wi tuku limaklakaskinkgolh xlakata tlakg lakapala nakatsinikan uma tachuwin.

Tachuwin bengalí wa masiyaka kʼEstados Unidos, pero nachuna tatlawalh kʼatanu países chu ktanu tanu tachuwin. Chuna tatlawalh xlakata kamasiyaniputunkan tuku lichuwinan Biblia latamanin tiku kgalhikgo tanu tachuwin.

Magaly chatum tiku katsinima bengalí wan: «Anta niku kwilaw lu lakapala lhuwamakgolh latamanin tiku chuwinankgo bengalí. Lhuwa katsiputunkgo xtakgalhtin nema lu xlakaskinka takgalhskinin la uma ¿Tuku xlakata anan lhuwa tapatin? Akxni kkawani pi Dios wanit natlawa stlan kakilhtamaku, tlakg katsiputunkgo, pero xlakata tanu tachuwin kgalhikgo uma tlawa pi tuwa nakatsikgo tuku masiya Biblia.»

Xlakata tlakg lakapala nakatsinikgo tiku katsinimakgolh atanu tachuwin, makgalhtawakgenanin limaklakaskinkgo tuku ni tuwa nalimakgkatsikgo tiku kamasiyanimakgolh. Akgtum liʼakxilhtit, xlimaklakaskinkgo xmakankan xlakata nakamakgtaya tiku xkamasiyanimakgolh tlakg lakapala nakatsinikgo chu kuenta natlawakgo.

Akxni makgatunu xmakgalhsputukgo xtakgalhtawakgakan, tunkun xʼankgo kalitachuwinankgo xTachuwin Dios latamanin tiku xchuwinankgo bengalí. Tunkun xlimaklakaskinkgo tuku xkatsinikgonit. Magaly wa: «Latamanin lu lakgatikgo akxni kgaxmatkgo pi kchuwinan kxtachuwinkan chu tlakg katsiputunkgo tuku xlakata kkatsinima xtachuwinkan. Xlakata klimaxtulh kilhtamaku nakkatsini xtachuwinkan, kamakgtaya naʼakgatekgskgo pi lu xlakaskinka tachuwin nema kkalinimaw».

Xtatayananin Jehová ni kajwatiya kkgalhiyaw la nakatsinikan atanu tachuwin, na kkamasiyaniyaw tiku namasiyakgo atanu tachuwin. Akgtum liʼakxilhtit, anta niku akxilha taskujut sucursal xalak Estados Unidos, enero kata 2006 asta enero kata 2012, tatlawalh 38 tamakxtumit, chu kamasiyanika 2,244 makgalhtawakgenanin. Akxni takgatsilh 1 xla septiembre kata 2012 xtamastanita 1,500 cursos kʼ37 tanu tanu tachuwin kʼEstados Unidos.