Anta k’España, xtatayananin Jehová kalakgapaxialhnankgo 68 kpulachin chu kalimakgalhtawakgakgo Biblia max 600 tiku wilakgolh kpulachin.

Chatum xtatayana Jehová tiku kalakgan wa Miguel, tiku 12 kata tawi kpulachin akxni nina xtamakamastaninit Dios. Chu taspita akgatunu semana kpulachin niku pulana xwi. Pero ¿tuku an tlawa? Xlakata atanu latamanin tlan nalakgpalikgo xlatamatkan, chuna la xla lakgpalilh.

Akgtsayan kata nema titaxtunit, Miguel kamakgalhtawakganit lhuwa tiku wilakgolh kpulachin. Xla wan: «Lu klipaxuwa akxni kamakgtaya tiku wilakgolh pulachin niku akit na xakwi. Lu klipaxuwa akxni kakxilha pi nialh lixkajni likatsiputunkgo».

Akxni Miguel xkgalhi akgtati kata, chatum chixku tiku xkgachi xmatlawanima xputlaw lakxkitilh chu makgnilh xtlat. Xtse lhuwa kilhtamaku kskuja xlakata nakamaxki tuku maklakaskinkgo xfamilia.

Miguel chu xtala xapuxku nialh ankgolh k’escuela chu tsukukgolh tanukgo kchiki chu kputlaw xlakata nakgalhanankgo. Akxni Miguel xkgalhi 12 kata lixkajni xlikatsi. Akxni makgatsilh 15 kata, lhuwa tumin xtlaja xlakata ksta drogas. Pero putum tumin nema xtlaja ni xakchani xlakata nalixokgo heroína chu cocaína nema ksmanipasanit, wa xlakata chuntiya xkgalhanan. Akxni makgatsilh 16 kata makglhuwa tamaknuka kpulachin, chu nipara tsinu xpaxkinan. Miguel wan: «Liwana xakkatsi pi xakama niy kpulachin o xlakata sobredosis. Xkimakgkatsikan la tantum kuxta nema patinit x’akgsiyat araña».

Pero kkata 1994 akxni Miguel xtanuma kpulachin, chatum x’amigo skinilh chatum xtatayana Jehová pi xtsokgnanilh maktum carta. Anta xtatayana Jehová wanilh pi Dios natlawa pi katiyatni akgtum paraíso nawan chu xtalakaskin xlakgpalilh xlatamat xlakata tlan anta xlatamalh. Miguel lakapastaka: «Tuku kiwanilh chalh kkinaku. Ama kilhtamaku putum talakgpalilh. Klaksakli naklikgalhtawakga Biblia maski xakkatsi pi tuwa x’ama wan».

Chuna xlakpuwan xlakata ama kilhtamaku xlismaninit naxkuli chu xwa drogas, nema lhuwa anan anta. Tiku akxtum xtatanuma kpulachin xmalaknuni drogas chali chali. Pero Miguel kskini Dios chali chali pi xmaxkilh litliwakga xlakata xmakgxtakgli uma chu alistalh tlan makgxtakgli.

Titaxtulh akgtutu papa’ tsukulh kalitachuwinan atanu tiku xwilakgolh kpulachin xlakata tuku xkanajla. Titaxtulh akgtum kata taxtulh kpulachin chu tamunulh la chatum xtatayana Jehová. Titaxtulh kilhtamaku tekgsli xlitatawilat chu lakkaxwililh natamakgaxtokga. Pero tsukulh atanu ta’akglhuwit: akxni xtsankga akgtum papa’ natamakgaxtokga tasanika kpumapakgsin xlakata makgapitsi tuku xtlawanit nema ni xtalakkaxlakanit chu liyawaka akgkaw natanupara kpulachin. Pero titaxtulh akgtutu kata aitat taxtulh xlakata tlan xlikatsi chu tlan tamakgaxtokgli. Miguel nikxni tlawapa tuku nitlan.