Akxni wi tuku masputunan, xtatayananin Jehová kamakgtayakgo xnatalankan chu amakgapitsi latamanin. ¿Tuku xlakata chuna tlawakgo? Xlakata paxkinankgo, nema litalakgapaskgo xaxlikana kstalaninanin Cristo (Juan 13:35).

Unu talichuwinan la kamakgtayaka tiku kaʼakgspulalh tuku nitlan kmarzo kata 2011 chu kxʼitat 2012. Tlan nawanaw pi umakgolh latamanin putum kilhtamaku kamakgtayaka xlakata tlakg tlan xmakgkatsikgolh chu kamatliwakglhnika xtakanajlakan. Sucursales xla xtatayananin Jehová wilikgolh comités de socorro xlakata xpulalinkgolh uma tamakgtay, nema makgtayanankgolh congregaciones xala anta.

Japón. Kkata 2011, 11 xla marzo, masputunalh kxnorte Japón xlakata tachikilh tiyat chu akgtum tsunami. Lhuwa miles tiku nikgolh. Xtatayananin Jehová xlikalanka katiyatni mastakgolh xtuminkan chu ankgolh makgtayanankgo. Tlan naʼakxilha video la tamakgtayanalh akxni tachikilh tiyat.

Brasil. Xlakata lhuwa senalh, tapanktaktakgolh tiyat chu lhuwa putlun kamakgnilh lhuwa ciento latamanin. Xtatayananin Jehová malakgachakgolh 42 toneladas liwat nema makgapala, 20,000 botellas xla chuchut, 10 toneladas lhakgat chu 5 toneladas nema limaskulunkinankan, nachuna likuchun chu atanu.

República del Congo. Xlakata pankgkgolh niku xmakikanit tuku limakgninankan 32 xchikkan xtatayananin Jehová wi tuku nitlan lanikgolh. Akgtati chiki lakgsputkgolh. Umakgolh familias kamaxkika liwat chu lhakgat, chu na tamakgxtakgkgolh kxchikkan atanu xtatayananin Jehová.

República Democrática del Congo. Kamaxkika likuchun tiku xkgalhikgo cólera chu lhakgat xlakata masputunalh sen. Nachuna, kamakuchika chu na kamakgpitsinika talhtsi nema tlan nachankgo chu lhuwa toneladas xla lhakgat xlakata tiku wi niku xmakgwilakgo.

Venezuela. Xlakata lu palha ksenama chu tapanktaktakgolh tiyat, comités de socorro kamakgtayakgolh 288 xtatayananin Jehová tiku nitlan tuku kaʼakgspulalh chu katlawaka liwaka tipuxamakaw chiki. Nachuna, kamakgtayamaka latamanin tiku wilakgo xchikkan lakatsu klago Valencia nema tapulhmanima.

Filipinas. Akxni nitlan tuku tlawalh un chu sen nema milh kʼuma país, sucursal kamalakgachanilh liwat chu lhakgat tiku kaʼakgspulalh tuku nitlan. Chu akxni xunkli chuchut, xtatayananin Jehová xalak kachikin makgtayanankgolh xlakata xmakaskulunkikgolh.

Canadá. Anta kAlberta lhkunanalh kkakiwin nema liminilh tuku nitlan congregación Slave Lake. Congregaciones nema lakatsu wilakgolh malakgachakgolh lhuwa tumin xlakata xlitaxokgolh chu tlan xmakaskulunkika. Xlakata ni lhuwa tumin xtalakaskin, uma congregación maspitkgolh itat uma tumin nema kaʼakgataxtunilh xlakata xkalimakgtayaka tiku nitlan tuku xkaʼakgspulama xlikalanka katiyatni.

Costa de Marfil. Akxni nina xtsuku guerra, akxni xlama chu akxni ksputnita kʼuma país kamaxkika liwat, niku natamakgxtakgkgo chu kamakuchika tiku maklakaskinkgolh.

Fiyi. Xlakata lu lhuwa senalh katlawanilh tuku nitlan 192 familias xla xtatayananin Jehová. Xlakata atsinu ni putum makgatsankgakgolh xʼanimaleskan, nema wa xliskujkgo, kamaxkika tuku nawakgo.

Ghana. Akxni sen masputunalh kxʼoriente uma país, tiku kaʼakgspulalh tuku nitlan kamaxkika liwat, talhtsi chu xasasti xchikkan.

Estados Unidos. Akxni titaxtulh tornados, kʼakgtutu estados 66 xchikkan xtatayananin Jehová lanikgolh tuku nitlan chu 12 kamasputuka. Maski tiku makgatsankgakgolh xchikkan xkgalhikgo seguro, katatlawaka xchikkan.

Argentina. Kxsur uma país, klhkaka volcán katlawanilh tuku nitlan chiki. Congregaciones xla xtatayananin Jehová kamakgtayakgolh tiku chuna kaʼakgspulalh.

Mozambique. Liwaka akgtum mil tiku ni xkgalhikgo tuku nawakgo kamaxkika tuku nawakgo.

Nigeria. Liwaka kgalhapuxam xtatayananin Jehová kamakgtayaka xlakata nitlan tuku kaʼakgspulalh kʼakgtum autobús. Na kamakgtayaka tiku wilakgolh kxnorte país chu makgxtakgkgolh xchikkan xlakata xlatatlawama guerra tiku tanu tanu xkilhtsukutkan chu tanu tanu xtakanajlakan.

Benín. Niku masputunalh xlakata lhuwa senalh kamaxkika likuchun, lhakgat, mosquiteros, chuchut chu niku natamakgxtakgkgo.

República Dominicana. Akxni milh huracán Irene, akglhuwa congregaciones kamakgtayakgolh tiku kaʼakgspulalh tuku nitlan chu katakaxtlawakgolh xchikkan.

Etiopía. Lakatiy nitlan tuku lalh xlakata ni xmin sen chu lakatum xlakata lu lhuwa senalh. Lakatutu kamalakgachanika tumin.

Kenia. Kalimakgtayaka tumin anta niku nitu xmima sen.

Malaui. Kamakgtayaka tiku xwilakgo kcampo xalak Dzaleka.

Nepal. Akxni tapanktaktalh tiyat, xchik chatum xtatayana Jehová lu nitlan la tawi. Maxkika niku tlan xtamakgxtakgli chu congregación makgtayalh.

Papúa Nueva Guinea. Tiku nitlan xlikatsikgo lhkuyukgolh akgtsayan chiki xla xtatayananin Jehová. Lakkaxwilikanita pi nakatlawanikan xchikkan.

Rumania. Makgapitsi xtatayananin Jehová tiku makgatsankgakgolh xchikkan xlakata lhuwa senalh katakaxtlawaka.

Malí. Xlakata ni xmin sen, ni lakgolh tachanan. Xalak Senegal malakgachakgolh tumin xlakata tiku ni xkgalhikgo tuku nawakgo.

Sierra Leona. Makuchinanin tiku xtatayananin Jehová xwankgonit minkgocha kFrancia xlakata xkamakuchikgolh xnatalankan tiku nitlan tuku xlanikgonit xlakata guerra.

Tailandia. Xlakata lhuwa senalh masputunalh klhuwa kachikin. Tiku makgtayanankgolh makaskulunkikgolh chu kaxtlawakgolh 100 chiki chu 6 Pukgalhtawakga.

República Checa. Akxni sen masputulh xchikkan chalhuwa xtatayananin Jehová, xnatalankan xalak Eslovaquia nema lakatsu wi na makgtayanankgolh.

Sri Lanka. Atsinu tsankga xlakata namakgtayanankgokan xlakata masputunalh akgtum tsunami.

Sudán. Kamaxkika liwat, lhakgat, zapatos chu lonas xtatayananin Jehová tiku taxtukgolh xkachikinkan xlakata analh guerra.

Tanzania. Xlakata sen, 14 familias makgatsankgakgolh tuku xkgalhikgo. Congregaciones xala anta mastakgolh lhakgat chu tuku tamaklakaskin kchiki. Nachuna, kaxtlawaka akgtum chiki.

Zimbabue. Kʼakgtum kachikin xalak país, ni analh tuku xwakan xlakata ni xmin sen. Kamaxkika liwat chu tumin tiku ni xkgalhikgo tuku nawakgo.

Burundi. Tiku anta makgwilakgolh kamakuchimaka chu atanu tamakgtay nema lakaskinkgo.