Sábado 1 xla marzo kata 2014, xwilakgolh 823 xtatayananin Jehová kSalón de Asambleas xalak Benín (Nigeria) xlakata xtlawakgolh lu xlakaskinka tamakxtumit. Lata lakkaxwilika uma programa xlakata nakatlawakan Pukgalhtawakga xla xtatayananin Jehová kpaíses niku ni anan tumin kkata 1999, tlawakanit 3,000 pukgalhtawakga kʼuma país.

Kʼuma tamakxtumit lichuwinanka la lhuwa taskujut tlawaka kNigeria lata akgpuxam kata xlakata congregaciones xkgalhikgolh niku xkakninanikgolh Jehová. Xapulana xtamakxtumikgo kʼakgtum chiki o xrentarlikgo. Chuna la takatsi, xapulana niku tlawaka pukgalhtawakga kkachikin Ilesha kkata 1935. Lata kata 1938 chu 1990, lu talhuwilh congregaciones: taliwakalh lata 14 asta 2,681. Lhuwa ni xtekgskgo niku natamakxtumikgo. Kmakgapitsi Pukgalhtawakga xtamakxtumikgo akgchaxan congregaciones. Amakgapitsi, lu aktsu xwanit, wa xlakata makgapitsi asta kilhtin xtayakgo chu xtalakanukgo kventanas xlakata tlan xkgaxmatkgolh. Atanu congregaciones xtamakxtumikgo xchikkan natalan o kʼescuelas.

Kata 1990, sucursal xla xtatayananin Jehová tsukulh kamasakuani tumin congregaciones nema xmakikanit xlakata nakatlawakan Pukgalhtawakga. Kkata 1997, Comités Regionales de Construcción xkamakgtayakgonita 105 congregaciones natlawakgo o namasastikgo xpukgalhtawakgakan. Kata 1997 asta 1999, tlawaka 13 Pukgalhtawakga. Xliʼankgalhin, xmakgapala 7 chu 15 kilhtamaku.

Lhuwata xtaliwakanit la xtlawamaka pukgalhtawakga, pero chuntiya xtalhuwima xtatayananin Jehová kNigeria. Abril kata 1998, sucursal makatsininalh pi xtalakaskin 1,114 xlikalanka país.

Xlakaskinka tamakxtumit nema tlawaka kBenín, Don Trost, tiku makgtapakgsi Comité xla Sucursal xalak Nigeria, wa: «¡Lu lhuwa taskujut xʼanan! Chu xaklakpuwanaw: “¿La naktlawayaw?”». Uma takgalhskinin kgalhilh xtakgalhtin kata 1999, akxni Grupos de Construcción de Salones del Reino kgalhchaxan o kgalhtsayan tsukulh makgtayanankgo congregaciones kʼama país. Xlakata ni tuwa la xkalakkaxwilikanit, tlawaka 17 pukgalhtawakga akgatunu papaʼ chu tlawakanit kʼumakgolh akgkutati kata.

Akxni xkawaninita tiku xwilakgolh pi lu tlan tuku xtlawakgonit, Don Trost wa pi lhuwaku xʼanan taskujut. Kata 2013, liwaka 8,000 na xtatayananin Jehová wankgolh kNigeria. Don Trost wa: «Xlakata tlan namakgatsiyaw, talakaskin natlawayaw 100 Pukgalhtawakga akgatunu kata». Lata xlilhuwa xtatayananin Jehová kNigeria kata 2013 kichalh 351,000, chu xʼanan liwaka 5,700 congregaciones.