Tasiya lago Sterling Forest (Blue Lake). Komo naʼakxilha lata knorte chu ksuroeste. Xapulana, akxilha tuku tatlawama ksótano xla edificio D. Tlakg lakatsu klago, lakkaxwilimaka tuku nalitatlawa (hormigón) edificio C anta niku lhtatakan.

Skujnin lakkaxwilimakgo baño nema tlawakanita kʼedificios niku lhtatakan. Baño kgalhi tuku nalikaxwilikan, niku tanu un, niku tlan paxkan, xmakni, tubos chu niku natamaknunikan luz. Baño tlantiya nawan akxni nawilikan kʼedificio.

Makgapitsi plomeros skujmakgo ksótano. Akxni nakakaxtlawakan edificios anta unu namaklakaskinkan xlakata nawayankgo max 500 skujnin. Alakatanu nakaxtlawakan xlakata tlan nawayankgo 300 o tlakg lhuwa. Akxni atsinu tsankga natlawakgokan, namapanukan niku wayankan chu uma edificio natamaklakaskin xlakata nakakaxtlawakan putlaw.

Makgapitsi skujnin makgawanimakgolh tiyat xlakata wi tuku nachankgo kxakgstin chiki xlakata ni lu nalaktlawa kakilhtamaku chu ni lu nalakla luz nema tamaklakaskin. Tuku nachankan chuwa chuchut nema mokgosa chu maxtunikgo tuku nitlan limin.

Uma edificio, nema pulaktutu tlawakanit, nakgalhi 42,000 metros cuadrados xliputum. Kfoto tasiya niku makgapitsi skujnin xalak atanu empresa wilinimakgolh varillas xlakata tlakg tliwakga natayakgo patsaps.

Makgapitsi skujnin maklakaskimakgo soplete xlakata wi tuku naʼakgstimawakakgo chiki. Tachitawakakgonit xlakata nitu nalanikgo maski natamokgoskgo.

Lakkaxwilikan tuku tatlawanita chu niku tlan tanu un chu aire acondicionado. Max 35% tiku skujkgo kWarwick lakpuskatin.

Uma edificios, lata akxni tamawaka kfebrero kata 2014, kaj katuwa kamakikan chu katlawakan tuku tamaklakaskin. Kgalhi 20,000 metros cuadrados. Xalaksnapapa tuku tasiyakgo wa baños nema katlawakanita chu tlantiya nakamalakgachakan.

Xapulana, akxilhaw xpaxtun niku lhtatakan C. Unu max natawilakgo 200 betelitas. Akgatunu cuarto nakgalhi max 30 chu 55 metros cuadrados xlilanka. Nakgalhi cocina, akgtum baño chu balcón.

Lakkaxwilikan tiyat xlakata nakatlawakan chiki. Anta tasiya niku lakgpakglhmimaka chiwix nema alistalh natamaklakaskin. Akxni natlawakgokan edificios, max napuwaxnankan 260,000 metros cúbicos. Akgatunu kilhtamaku, tamaklakaskin 23 volteos.

Chananamaka kxakgstin chiki.

Tasiya ksuroeste lata kxpakgan akgtum grua nema wi kʼedificio de oficinas. Lata kminpakgxwiki tasiya niku kawilikan putlaw tiku minkgo lakgapasnankgo, chali chali litatsama putlaw xlakata tiku xatapaxuwan skujmakgolh. Makgapitsi minkgonitancha asta akgkutiy horas xlakata naskujkgo akgtutu o akgtati kilhtamaku.

Niku kamawikan atsinu tsankga xlakata namasputukan. Televisiones (nema nina kawilikan) chu bocinas natlawa pi tlan naʼakxilhkgo chu nakgaxmatkgo nema kamatitaxtinikan akxni natalikgalhtawakga texto xala chali chali chu amakgapitsi programa xla takanajla ksucursal xalak Estados Unidos.

Mamimaka concreto xlikilhmaktum. Kpakgastakat ya chatum skujni tiku limaklakaskima akgtum máquina nema tlawa pi ni natanuni un concreto chu uma tlawa pi liwana natama.

Kakaxwilimaka cables xla luz nema anta natanu ksótano.

Atsinu tsankga natlawakgokan xlikilhmaktum. Mamikanit 540 metros xla concreto, asta la uku anta niku tlakg tamaklakaskinit. Concreto lakgkaxtlawaka antiya niku katlawamaka edificios chu maklakaskinka akgtsayan camiones nema lakgwilakgolh chu akgtiy bombas xlakata tlan xlichanka asta kʼedificios. Putum uma kaj akgkitsis hora aitat la litlawakgoka. Kxʼitat foto tasiya akgtum torre anta niku wilakgolh escaleras.

Makgapitsi skujnin tlawamakgo aktsu patsaps kxʼakgstin edificio. Na tasiya tlawamaka sótano niku lhtatakan A.

Tamaklakaskima akgtum grúa xlakata namawakakan akgtum baño nema tlawakanita asta kxlikilhaktutu. Lhuwa tuku tamaklakaskin kWarwick alakatanu niku tlawakan. Uma makgtayanan xlakata ni lu lhuwa naʼankgo skujnin. Chu nachuna, tlakg lakapala katlawakan.

Makgapitsi skujnin xla akgtum empresa wilimakgolh patsaps xla hormigón nema tatlawanita chu lu makgtayanan. Uma ni lu talakaskin nakaxtlawatilhakan chu ni talakaskin namanikan xlakata wilinikanita color. Ni tuwa kakaxwilikan, chu wa xlakata sokg namasputukan.

La tasiya ksuroeste. Xapulana tasiya la lakkaxwilikanit tuku nalikaxtlawakan niku lhtatakan D. Kxchakgen wi niku lhtatakan C, nema atsinu tsankga natlawakgokan.