Tsankga akgkukitsis minuto xlakata kamakgtujun hora nawan, chu akgapun kawan tasiya kTuxedo (Nueva York). Lago nema wi xpaxtun chiki xakilhaktati kgalhwaka tsinu hielo anta niku tanukgo lakchixkuwin chu lakpuskatin tiku linkgo klhakgatkan nema puskujkgo. Tsisa taxtukgocha kxchikkan o niku wilakgo. Makgapitsi lakatsu wilakgo chu amakgapitsi makgat minkgoyacha, la kPatterson, Wallkill, chu Brooklyn, max 80 kilómetros xlimakgat.

Atsinu ni putum, ni xalak Nueva York wata minkgoyacha makgat kachikinin xalak Estados Unidos chu tlakg makgat. Putum ni kaxokgonikan, makgapitsi akgtum semana natawilakgo, amakgapitsi akgchaxan chu amakgapitsi tlakg lhuwa kilhtamaku. Xʼakstukan xokgokgolh xpasajekan akxni minkgolh chu ni kaxokgonikan. Maski chuna, lu paxuwakgo xlakata makgtayanamakgo kʼuma taskujut.

La uku minkgonit skujkgo120, pero papaʼ nema mimakgolh tlakg lhuwa tiku naminkgo. Lakatitum tanukgo niku wayankan, tawilakgo kmesa niku kgalhkaw tawila chu mujutilhakgo kape. Chu kcocina lu stlan takgankgawanan: tsilimaka kgalhwat chu tocino. Kamakgtujun hora, tamatitaxti akxni talikgalhtawakga akgtum texto xalak Biblia, nema tlan akxilhkgo ktelevisión. Akxni titaxtunita akgkukitsis minuto, meseros tsukukgo mastakgo liwat. Ni kajwatiya liminkan kgalhwat chu tocino, na liminkan kaxtalanchu chu avena. ¡Lu lhuwa liwat!

Akxni tlawakan oración nema limasputukan, putum ankgo niku skujkgo. Tiku makgtlawakgo chiki, lipaxuwakgo kgalhchuwinankgo akxni wilimakgo xcascoskan, kcinturoneskan nema kgalhi lhuwa tuku liskujkan, xlenteskan chu chalecos.

¿Tuku tlawamaka unu? Kaxtlawamakgo chiki xla empresa niku xtlawakan kapsnat International Paper Company xlakata anta natawila niku napulalinkan xtaskujutkan xtatayananin Jehová. Uma chiki lakatsu natlawakan, anta kWarwick. Chu unu, kTuxedo, kakaxtlawamaka niku nalhtatakan, oficinas, talleres chu niku wi tuku nakamakikan. Martes 12 xla marzo kata 2013, junta de urbanismo xalak Tuxedo wa pi tlan natlawakan chiki.

¿La kamakgamakglhtinankan tiku ankgo makgtayanankgo? William xalak Nueva Jersey, nema tamakgxtakgma kʼakgtum chiki xla xtatayananin Jehová, wan: «Akxni nachitana, natalan tiku skujkgo krecepción wanikgoyan niku natamakgxtakga, wanikgoyan la nachipina niku napimputuna, la namaklakaskina mi llaves... putum tuku milikatsit. Lu tlan likatsikgo. Chu kTuxedo, akxni wayankgokan tsisa, pina chu lakgapasa tiku lakgaya niku naskuja, tiku nawaniyan tuku natlawaya».

¿Chu la taskuja unu? Yajaira chu xchixku, tiku minkgonitancha kPuerto Rico, xlakan wilikgo yeso kpatsaps. Xla wan: Ktakiyaw 4:30 tsisa. Kmakakiyaw niku klhtatayaw, kwayaw kape chu alistalh putum kinkalinkanan niku kskujaw. Lu ktlakgwanitaw akxni ktaspitaw. Pero uma nitu wamputun, xlakata tantaku lhuwa klitsiw. Unu latamanin putum kilhtamaku paxuwakgo».

Zach chu Beth, akgtum tamakgaxtokgat xalak Minnesota, makgmakakikgo niku tlan wi tuku natlawakan kpukuxtu xalak Warwick. Akxni kakgalhskinka tuku xlakata makgtayanamakgo, Beth wan: «Skujnanikan Jehová wa tuku tlakg tlan. Xakmaklakaskimputunaw tuku kkatsiniyaw ktlawayaw».