Agosto kata 2013, xtatayananin Jehová xalak Filipinas makgalhsputukgolh Pukgalhtawakga nema lu xlakaskinka. ¿Tuku xlakata lu xlakaskinka? Xlakata uma xlitakgatsi 1,000 nema xtlawamaka anta nema xmakgtanuma kprograma. Congregaciones xla ama país ni kgalhikgo tumin chu nipara tiku namakgtayanankgo xlakata natlawakan pukgalhtawakga. Asta, makgapitsi congregaciones xalak filipinas akglhuwa kata tamakxtumikgolh akgtum chiki o niku xlitlawakanit bambú.

Lakgkgolotsin tiku Pulalinkgo xTatayananin Jehová kkata 1999 lakkaxwilikgolh akgtum programa xlakata xtlawaka pukgalhtawakga niku lu xtalakaskima, klakalhuwa países la Filipinas lu xtalhuwima xtatayananin Jehová. Tlawaka uma programa xlakata nakamakgtayakan congregaciones kpaíses nema ni kgalhikgo tumin. Congregaciones mastakgo tuku matlanikgo xlakata natlawakan pukgalhtawakga, chu tuku kitsankga litaxokgo tuku xatapaxuwan maskiwinankgo natalan xalak atanu países. Nachuna, lakkaxwilikanit grupos tiku katsinikgoya la tlawakan taskujut. Anta kFilipinas tsukulh uma programa noviembre kata 2001.

Iluminado chatum xtatayana Jehová xalak congregación xalak Marilao (aktsu kachikin xalak Bulacan), anta niku tlawaka pukgalhtawakga nema litakgatsilh 1,000 nema xmakgtanuma kprograma. Xla wan: «Kʼakxilhnit pi xlikana anan lhuwa linatalan. Lhuwa natalan minkgolh kinkamakgtayayan; lakchixkuwin, lakpuskatin, lakgkgawasan chu tiku linkgoya kata. Akxni xakskujmaw lu xchichinama chu lu xlhkaknama. Maski xaktlakgwanitaw, lu xakpaxuwayaw xlakata putum tuku xaktlawanitaw».

Xlakata tiku lu skujmakgolh, ni kaj xtatayananin Jehová xala ama kachikin kaks lilakawankgolh. Akgtum liʼakxilhtit, xmalana putlaw tiku xkalimini muntsaya chu grava wa: «Wixinin la laktsu chaʼan. Putum skujpatit. Nikxni chuna xakʼakxilha».

Lata matsukika asta makgalhsputuka ni chalh akgchaxan semanas. Xlakata ni makgas makgapala, xtatayananin Jehová xalak Marilao tlan amparakgolh lichuwinankgo xalakwan xalaksasti xla xTamapakgsin Dios, taskujut nema tlakg xlakaskinka (Mateo 24:14).

Ellen, chatum puskat xtatayana Jehová xala ama kachikin wan: «Xamakgan pukgalhtawakga ni xaktanukgoyaw, chu lhuwa tiku xtawilakgo kkilhtin. Pero la uku xasasti pukgalhtawakga lu stlan chu putum tlan tanukgo. La uku putum tlakg klitamakgtayayaw tuku masiyakan chu tuku kinkalimatliwakglhkanan ktamakxtumit».