Anta kselva amazónica tsukukan tlawakan akgtum xasasti Salón de Asambleas xla xtatayananin Jehová nema kaks lilakawankgo latamanin. Uma kakiwin wi kxnorte xla kachikin xla Manaos (Brasil), uma pukuxtu kgalhi 52 hectáreas nema limakgstiliwi tipalhuwa kiwi. Anta niku tipalhuwa nakgaxpata la kilhtlikgo guacamayos, tucanes chu amakgapitsi laktsu spitu o tsiktsi nema wilakgolh kxʼakgan kiwi, la xalanka kiwi nuez xalak Brasil, cupuarana chu nachuna angelim pedra. ¿Tuku xlakata tatlawalh akgtum Salón de Asambleas anta?

Kkachikin xla Manaos wi lata 1,450 kilómetros anta niku kisputa kgalhtuchokgo Amazonas, kgalhi max liwaka akgtiy millones latamanin. Xasasti Salón de Asamblea tlan natamakxtumikgo 7,000 xtatayananin Jehová xalak Manaos chu nachuna tiku lakatsu wilakgolh, chu nachuna tiku wilakgolh kxkilhpan lata xlilhman Amazonas. Kachikin nema tlakg makgat wi wa São Gabriel da Cachoeira, nema wi liwaka 800 kilómetros kxoeste Manaos. Xlakata nachankan kSalón de Asambleas, makgapitsin xtatayananin Jehová akgtutu kilhtamaku liʼankgo kbarco.

Tlawakan akgtum Salón de Asamblea xlakgni Amazonas kaks malakawaninan. Uma tlawalh pi xlinka 13 niku xkamujukan tuku xtamaklaskin xlakata tuku xtatlawama lata xpuerto kachikin Santos (São Paulo) chu xʼan lata kpupunu asta niku kikgalhsputa Amazonas chu alistalh xʼan lakgakgastin asta niku xtaskujma.

Lata uma nema tatlawama takgatsima 27 Salones de Asambleas kBrasil. Makamastanika Jehová domingo 4 xla mayo kata 2014, chu kilakgolh 1,956 latamanin. Lhuwa lu xpaxuwamakgolh, xlakata kajku xlimakgtumku xtamakxtumimakgolh kʼakgtum Salón de Asambleas.

Tiku kilakgolh ni kaj watiya kgaxmatkgolh, na tlan akxilhkgolh tiku xmatitaxtima taʼakgchuwin. ¿Tuku xlakata uma lu xlakaskinka kitaxtu? Xlakata xapulana xtatlawa asamblea niku putum tlan akxilhkgo niku xmatitaxtikan taʼakgchuwin, chu nachuna tiku xmatitaxti taʼakgchuwin. Chatum xtatayana Jehová wa: «Lhuwata kata kan kʼasambleas chu nikxni xakakxilhnit drama nema takilhtinit kBiblia, kaj xakkgaxmata». La uku putum tlan akxilhkgo niku titaxtukgo tiku mastakgo xtaʼakgchuwinkan.