Xtatayananin Jehová tlawamakgolh niku napulalinkan xtaskujutkan lakatsu klago xla Sterling Forest (Blue Lake), niku anan lhuwa laklanka kiwi kNueva York (Estados Unidos). ¿Tuku tlawamakgolh xlakata nakuentajtlawakgo tuku anan anta?

Xtatayananin Jehová wi tuku listiliwilikgonit niku skujmaka xlakata ni natanukgo animales la crótalo xalak kakiwin (luwa), tortuga de caja de las Carolinas chu galápago xalak kakiwin. Chuna tlawaka xlakata animales ni natanukgo niku skujmaka chu nitu nakatlawanikan. Wa xlakata, ankgalhin akxilhkan komo ni tanukgonit animales. Akxni namakgalhsputukan uma taskujut namapanukan tuku listiliwilikanit, komo natanu crótalo xalak kakiwin lakatsu kʼedificios natasanikan tiku katsinikgo liskujkgo uma xlakata natamakxtu.

Xlakata azulejos garganta canela (o venturas azulillos) tlan xtlawakgolh xmasakgakan, kiwi kachukuka kpapaʼ akxni lonkgnan. Akxni nakgalhsputa taskujut, xtatayananin Jehová nawilikgo laktsu cajas niku nawilikgo xmasakgakan akxni nataspitparakgo umakgolh animales. Akxni makaxtumikan chu makawanikan makgapitsi putawilh tlawakan kpapaʼ octubre chu marzo xlakata tlan nataʼakgawani chu napulha xtalhtsi Scutellaria integrifolia, nema sputmaja. Chuna tlawakan uma taskujut, maski nina tekgskan uma xanat anta kWarwick lata kata 2007.

Niku tlawamaka uma taskujut anta kxkilhtun lago Sterling Forest, niku lamakgolh lhuwa animales nema kgoskgo, nachuna anan truchas, lobinas, lucios chu percas. Xlakata nakuentajtlawakan lago, namaklakaskinkan tuku namakgtayanan ni nalakla tuku anan anta. Akgtum liʼakxilhtit, xakgstin chiki wi tuku nachankan xlakata nachuwa sen, namaskulunkikgo chu ni lhuwa chuchut natlawan kkatiyatni. Nachuna maʼakgataxtikanit tuku anan xkilhtun lago.

Chatum xtatayana Jehová tiku tlawa uma taskujut xlakata nakuentajtlawakan tuku anan anta wan: «Maski lu lhuwa kilhtamaku talakaskin chu liwana nalakkaxwilikan, liwana kkatsiyaw pi chuna kilitlawatkan chu kmakgantaxtiputunaw».