Xlakata natlawakan biblias de lujo chu de tapa dura nema taskin, xtatayananin Jehová wilikgonit xalaksasti máquinas nema kawilini xmakni libros chu biblias kJapón, anta wi kkachikin wanikan Ebina.

Akxni tsukulh uma taskujut nila lakapala xtatlawa, xlakata 11 xla marzo kata 2011 tachikilh tiyat chu milh tsunami kJapón, uma tlawalh pi xʼantilhalh luz.

Maski chuna lalh, tsukuka malakgnukan kseptiembre kata 2011, ni takgatsilh akgtutu papaʼ xasasti encuadernadora ksujmaja. Xapulana tsukuka tlawakan Traducción del Nuevo Mundo ktachuwin chino.

Uma encuadernadora 400 metros xlilhman, chu xakstu tlawa taskujut. Pulana, slamakan kapsnat chu alistalh libros taxtuyacha. Alistalh kawilinikan xmakni, kamatustukkan chu tsapswilikan. Alistalh mujukan kcajas chu kamakgalhchuwakan chu kawilikan pakglhat o lhtakala.

Xlakata tlan xtatlawalh taskujut, talakaskilh pulana liwana xlakkaxwilika tuku xʼamaka tlawakan.

Pulana, xtalakaskin liwana kslamaka máquinas, alistalh liwana xmujuka tuku xʼamaka pulinkan chu tamaknuka k34 contenedores, putum uma nema xwilakgolh kʼEuropa linka asta kJapón.

Kgalhakaw tiku makgtapakgsikgo ksucursal xalak Estados Unidos ankgolh kJapón xlakata xmakgtayanankgolh kʼuma taskujut. Makgapitsi tamakgxtakgkgolh asta akgchaxan papaʼ xlakata xkamasiyanikgolh xalak Japón la xmaskujukgolh máquina chu la xkaxtlawakgolh.

Tsokgnanin chu empresas nema na xkgalhikgo encuadernadoras kJapón, xlakgapasputunkgo uma xasasti encuadernadora. Papaʼ 19 xla marzo kata 2012, liwaka akgtum ciento latamanin xalak tanu tanu empresas kilakgolh ksucursal xla xtatayananin Jehová chu kaks kamalakawanilh.

Xchatunukan kamaskiwika makatunu Traducción del Nuevo Mundo nema tatlawalh kxasasti encuadernadora.

La uku, sucursal xalak Japón na tlawa biblias chuna la Estados Unidos chu Brasil, wanikan de tapa dura nema maklakaskinkgo xtatayananin Jehová.

Xtatayananin Jehová chu latamanin tiku xala kʼatanu empresas tiku makgtayanankgolh kʼuma taskujut, lu paxuwakgolh xlakata akxtum skujkgolh. Chatum lataman xala akgtum empresa wa: «La kifamilia kkaʼakxilhan».

Akxni tlawakgoka taskujut, atanu skujni wa: «Tlakg tuwa nakmakgkatsi akxni alakatanu nakskuja, xlakata kkatsi nipara tsinu katitatalakxtumilh la Watchtower».