Akxni nalakpuwana naskina Biblia ktachuwin braille nema tlawakgo xtatayananin Jehová, pulana kaʼakxilhti komo kgalhiya niku namakiya. Biblia ktachuwin braille xla Traducción del Nuevo Mundo, nema tatlawanit ktachuwin inglés, español chu italiano, tatlawanit 18 o asta 28 volúmenes chu maklakaskin akgtiy metro niku namakikan.

Pero na wi kʼatanu formatos nema ni lu lanka maklakaskin niku namakikan. Akgtum liʼakxilhtit, anotadores braille masta talakaskin natsokgnankan chu tlan naʼakxilhkan texto nema wi kcomputadora chu maklakaskin laktsu cilindros nema takta chu tawakapara xlakata tlan natsokga kbraille. Lectores de pantalla, programas nema tlawa pi nakgaxpata tuku tatsokgnit, uma tlawa pi ni tuwa natekgskan maktum likgalhtawakga kʼInternet chu tlan nakgaxpata.

Nachuna, xtatayananin Jehová tlawakgonit akgtum programa kcomputadora nema tlawa pi tlan namatitaxti klhuwa tachuwin xla braille. Xlakata natlawa uma, tamaklakaskin tuku nalilakgpalikan letras nema tamaklakaskimputun chu tuku lakgchan kbraille. Na kamaxki talakaskin pi uma likgalhtawakga tlan nalikgalhtawakgakgo tiku ni lakawanankgo. Uma programa namasta talakaskin natlawakan likgalhtawakga (la Biblia) ktachuwin nema natalakaskin komo kgalhi tachuwin braille, asta tachuwin nema ni maklakaskin abecedario.

Liwakaya akgtum ciento kata, xtatayananin Jehová tlawamakgolh likgalhtawakga ktachuwin braille, chu la uku tlawakgonita k19 tachuwin. Maski ni makglhtinankan xtapalh, lhuwa xatapaxuwan mastakgo tumin.

Kata nema titaxtukgonita, akxni xwankan pi nataxtu akgtum likgalhtawakga kxalanka xtamakxtumitkan xtatayananin Jehová, xwankan pi ktachuwin braille tlan naskinkan alistalh. Pero, katata, sucursal xalak Estados Unidos lakputsanalh xlakata nakatsikan tukuya ktamakxtumit naʼankgo tiku ni lakawanankgo nema katatamakxtumikgo xtatayananin Jehová, chu na xkatsiputunkgo la tlakg lakgatikgo xlikgalhtawakgakan (kkapsnat o kformato electrónico nema katsokga ktachuwin braille o lectores de pantalla).

Likgalhtawakga nema taxtukgonit kbraille kamalakgachaka klaklanka tamakxtumit niku kilakgolh tiku ni lakawanankgo, uma tlawalh pi xmakglhtinankgolh xlikgalhtawakgakan chuna la amakgapitsin. Pero, kformato electronico, kcorreo electrónico kamalakgachanika akxni xtitaxtunita akgtum semana xalanka xtamakxtumitkan.

Chatum xtatayana Jehová tiku ni lakawanan wa: «Akgtum tasikulunalin xlakata na akxni kmakglhtinaw kilikgalhtawakgakan akxni makglhtinankgolh amakgapitsin. Anta kSalmo 37:4 Jehová wan pi nakinkamaxkiyan tuku lakaskin kinakujkan. ¡Chu uma sábado chu domingo nema titaxtulh makgantaxtilh!». Atanu xtatayana Jehová tasalh chu wa: «Akit xkilakapastakmaka. Kpaxtikatsini Jehová xlakata lu kinkakuentajtlawayan».