TIKU ni kgaxmatkgo chaxkgolh xmakankan chu matsuwikgolh xtachuna la makgapakgxnankgolh akxni kawanika: «Nalipaxuwayatit pi tatlawama makgapitsi libros xla kTatsokgni xaHebreo [Viejo Testamento], chu tatlawakgolha grabación libro xla Génesis».

Uma lu tlan tamakatsinin tamastalh akxni xaʼawatiya xmastamaka taʼakgchuwin kxalanka tamakxtumit xaʼakgtutu kilhtamaku ktachuwin xla señas americano nema tlawakgolh xtatayananin Jehová.

Kata 2005, xtatayananin Jehová tsukukgolh tlawakgo Traducción del Nuevo Mundo de las Santas Escrituras ktachuwin xla señas americano, litsukukgolh libro xla Mateo. Kata 2010 tlawakgoka 27 libros nema lilakgapaskan Nuevo Testamento.

Xtatayananin Jehová matitaxtikgonit makgapitsi libros xalak Biblia kʼakgkitsis tachuwin xla señas.

¿Tuku xlakata tatlawama? Xtatayananin Jehová liwana katsikgo pi likgalhtawakga nema katlawakan tatsokgnit kxtachuwinkan tiku tlan chuwinankgo chu tiku ni kgaxmatkgo ni lakgapaskgo. Akxni liwana matitaxtikan Biblia ktachuwin xla señas, tlawa pi lhuwa tiku ni kgaxmatkgo naʼakgatekgskgo xtamakatsinin chu tlakg tlan natalalinkgo Dios. Kaʼakxilhwi tuku wankgolh makgapitsi akxni makglhtinankgolh Biblia kxtachuwinkan.

Chatum kgawasa tiku ni kgaxmata wa: «Nina lhuwa kata akxni taxtulh Evangelio xla Mateo, kakxilhli pi xkilimasiyanima la xlilhuwa kimpaxki Jehová Dios, chu libro xla Génesis aku tatlawalh tlakg kimasiyanilh pi xlikana kimpaxki. Akit liwana kkatsi pi xla tlawama tuku talakaskin xlakata tlakg naklakgapasa».

Chatum puskat tiku ni kgaxmata wa tuku xmakgkatsi: «¡Liwana taʼakgatekgsa señas chu lu tlan mamakgkatsininan! Lu klakgatilh Biblia. La uku liwana kkatsinit pi Jehová lakaskin naklikgalhtawakga xtachuwin akgatunu versículo, xlakata tlakg liwana naklakgapasa. Uma talakapastakni lu chan kkinaku chu kimaxki talakaskin putum nakwani Jehová tuku kmakgkatsi akxni ktlawani oración».