«Komo wix kanajlaya pi Biblia wa xTachuwin Dios nema kamaxki latamanin, uma kilhchanima pi Dios kinkatachuwinanan. [...] Komo mintakanajla pulalinan akxni wi tuku laksaka kmilatamat, talakaskin pi [Biblia] natatsokgtawila ktachuwin nema maklakaskinaw chali chali». Chuna wa Alan Duthie chixku tiku tsokgli libro Bible Translations and How to Choose Between Them (Traducciones xalak Biblia: ¿la nalaksakaw nema xatlan?).

Putum tiku paxkikgo xTachuwin Dios lakpuwankgo chuna la tsokgli Alan Duthie. Kanajlakgo pi «wa Dios masta putum tuku tatsokgnit kxaSanto Tatsokgni. Makgtayanan xlakata nakamasiyanikan latamanin, xlakata nakinkawaniyan tuku nitlan tlawamaw, xlakata putum lakatitum nawilikan chu xlakata nakinkamasiyaniyan natlawayaw tuku xaʼakgstitum» (2 Timoteo 3:16). Biblia ni kaj makgtum libro nema makgan tsokgwilikanit. Wata «xastakna chu lhuwa litliwakga kgalhi»chu kinkamakgtayayan nalakkaxwiliyaw kintaʼakglhuwitkan (Hebreos 4:12). Pero talakaskin pi uma xasanto libro natatsokgtawila ktachuwin nema chali chali maklakaskinaw xlakata tiku nalikgalhtawakgakgo naʼakgatekgskgo chu nalilatamakgo tuku nakatsinikgo, chuna, xlakata putum latamanin nalikgalhtawakgakgo chu naʼakgatekgskgo.

Wa xlakata, latamanin tiku paxkikgo xTachuwin Dios lipaxuwakgolh akxni makglhtinankgolh Xtachuwin Dios xlakata Tiku nalatamakgo kxaSasti Katiyatni ktachuwin totonaco. Domingo 28 xla junio kata 2020 xtatayananin Jehová maxtukgolh uma traducción ktachuwin nema maklakaskinaw la uku. Uma Biblia liwana taʼakgatekgsa chu ni akgtsankga, uma tlawa pi tiku chuwinankgo totonaco tlakg tlan naʼakgatekgskgo xtamakatsin Dios. Pero max miʼakstu kgalhskinkana: «¿Tiku tlawanit uma lu tlan taskujut?».

Xtachuwin Dios xlakata Tiku nalatamakgo kxaSasti Katiyatni xasasti xpalakata tiku chuwinankgo totonaco, pero uma Biblia wi lata kata 1950. Ama kata maxtulh ktachuwin inglés, sociedad Watch Tower Bible and Tract Society, nema lakalhuwa lakgapaskan xlakata xtaskujut chu makgasa tlawa likgalhtawakga nema takilhtinit kBiblia. La Atalaya 1 xla febrero kata 1951 wa: «Lakchixkuwin tiku makgtapakgsikgo comité de traducción wankgonit pi [...] ni lakaskinkgo nakalakgapaskan, chu ni lakaskinkgo pi namakatsininankan pi xlakan tlawakgolh uma taskujut, ni para akxni lamakgolhku nipara akxni nanikgo. Uma traducción tlawaka xlakata natamalanki xtukuwani xastakna chu xaxlikana Dios».

Kata 1961 xatakgatsin taxtulh Biblia: Xtachuwin Dios xlakata Tiku nalatamakgo kxaSasti Katiyatni. Maski nikxni wankanit xtukuwanikan tiku matitaxtikgolh Biblia, katsiyaw pi wa Dios malankiputunkgo wa xlakata xatapaxuwan tlawakgolh. Prólogo xla Biblia xaʼinglés kata 2013 wan: «Xlakata katsiyaw pi xtamakatsin Biblia lu xlakaskinka, liwana klakputsanaw xlakata nataʼakgatekgsa pero ni klakgpalinitaw tamakatsinin nema anta wi. Lu xlakaskinka kliʼakxilhaw xaʼakchan nakmatitaxtiyaw xtamakatsinin Biblia. [...] Kliskujnitaw xlakata nachuna nakwiliyaw la wan tatsokgni xagriego chu nachuna pi liwana natakgaxmata chu ni tuwa naʼakgatekgskan».

Asta la uku, imprimirlikanit liwaka 240 millones Biblia Xtachuwin Dios xlakata Tiku nalatamakgo kxaSasti Katiyatni nema xatakgatsin o ni xatakgatsin maxtukanit, 185 tachuwin. ¿Tuku katsikgonit tiku likgalhtawakgakgonit?

Jesús kamasiyanilh kstalaninanin nawankgo kxʼoracionkan: «KinTlatkan tiku wilapi kʼakgapun, katamasantujlilh mintukuwani» (Mateo 6:9). Anta kBiblia xtukuwani Dios, Jehová, atsinu ni takgatsi 7,000 (Éxodo 3:15; Salmo 83:18). Akxni nikgolh xʼapóstoles Jesús, congregación xla kstalaninanin Cristo na tsukukgolh lakpuwankgo la judíos tiku xwankgo pi ni xlilat namaklakaskinkgo xtukuwani Dios (Hechos 20:29, 30; 1 Timoteo 4:1). Tiku xcopiaxtukgo tuku wan Biblia ktachuwin griego lakgpalikgolh xtukuwani Dios, Jehová, chu kaj wilikgolh kxtatsokgnikan «Dios» o «Malana».

Comité de Traducción de la Biblia del Nuevo Mundo wiliparakgonit xtukuwani Jehová niku xlakgchan kʼEscrituras Griegas Cristianas *, 237 xlimakglit min xtukuwani. Uma ni chuna tlawakanit kaj xlakata traductores chuna lakaskinkgo, wata chuna tlawakanit xlakata liwana lakputsanankanit tatsokgni xagriego. Akgtum liʼakxilhtit, Lucas 4:18 wan tuku tatsokgtawilanit kʼIsaías 61:1. Texto xahebreo, limin xtukuwani Dios kʼuma versículo xla Isaías. Wa xlakata lu tlan pi Xtachuwin Dios xlakata Tiku nalatamakgo kxaSasti Katiyatni wilinit xtukuwani Dios kLucas 4:18: «Xʼespíritu Jehová, xla kilaksakli xlakata nakkalitachuwinan xatlan tamakatsinin limaxkgenin».

Xlakata wilikanit xtukuwani Dios kʼuma versículos tiku likgalhtawakgakgo katsikgo tiku Jehová chu tiku xKgawasa, Jesucristo. Akgtum liʼakxilhtit, maklhuwa Biblia chuna matitaxtikgo Mateo 22:44: «Malana wanilh kiMalana» (Reina-Valera). Pero ¿tiku chuwinama chu tiku tachuwinama? Uma versículo lichuwinan tuku wan Salmo 110:1, texto hebreo limin xtukuwani Dios. Wa xlakata, Xtachuwin Dios xlakata Tiku nalatamakgo kxaSasti Katiyatni chuna matitaxti Mateo 22:44: «Jehová wanilh kiMalana». Akxni akgatekgsaw pi Jehová chu xKgawasa ni watiya litaxtukgo, ni kaj kinkamakgtayayan nakgalhiyaw liskgalala (Marcos 13:32; Juan 8:17, 18; 14:28). Lu xlakaskinka nakatsiyaw xlakata nalakgtaxtuyaw, xlakata Hechos 2:21 wan: «Putum tiku namapakuwi xtukuwani Jehová nalakgtaxtu».

Lu liskujka xlakata nachuna xwilika chuna la xwan tatsokgni xagriego chu maklakaskinka tachuwin nema la uku chuwinankan chu ni tuwa taʼakgatekgsa. Akgtum liʼakxilhtit, lu liskujkanit xlakata Xtachuwin Dios xlakata Tiku nalatamakgo kxaSasti Katiyatni nalimaklakaskin tachuwin nema watiya masiya tuku xmasiya tachuwin xagriego nema pulana maklakaskinka. Lhuwa tachuwin nema la uku maklakaskinaw, kinkamasiyanikgoyan pi wi tuku tatlawanita, tatlawama o aku natatlawa. Pero ktachuwin xagriego, na wankan komo tuku tatlawama kaj ama kilhtamaku tlawaka, komo nialh xʼamaka tlawaparakan o chuntiya xʼamaka tlawakan. Akgtum liʼakxilhtit, kaʼakxilhwi tachuwin nema wa Jesús chu tsokgwilikanit kMateo 6:33. Kʼuma versículo, tachuwin xagriego nema kilhchanima «putsakan», masiya pi uma chuntiya xlitatlawat. Xlakata watiya namasiyakan tuku xmasiyaputun Jesús, uma versículo chuna matitaxtika: «Chuntiya pulana kaputsatit xTamapakgsin Dios, chu tuku xaʼakgstitum akxilha Dios, chu putum uma tuku maklakaskinatit na nakamaxkikanatit». Nachuna kMateo 7:7 matitaxtika: «Chuntiya kaskintit, chu nakamaxkikanatit; chuntiya kaputsatit chu natekgsatit; chuntiya kalakgatlakgtit malakcha chu nakamalakkinikanatit» (Romanos 1:32; 6:2; Gálatas 5:15).

Ktachuwin totonaco ni kajwatiya namaxtukan Escrituras Griegas Cristianas. Lakkaxwilimaka xatakgatsin namatitaxtikan Biblia. Pero ¿tiku nalikgalhtawakgakgo uma Biblia ktachuwin totonaco tlan nalipawankgo pi ni naʼakgtsankga chu xatakgatsin natawila chuna la wi Biblia xaʼinglés?

Chuna, xlakata Lakgkgolotsin tiku Pulalinkgo xTatayananin Jehová akxilhmakgo taskujut nema tatlawa akxni tamatitaxti likgalhtawakga. Lakkaxwilinit pi chalhuwa namakgtayanankgo akxni tamatitaxti Biblia kʼatanu tachuwin (Proverbios 11:14). Wa xlakata kxlikalanka katiyatni lakkaxwilikanit equipos tiku matitaxtikgo Biblia kʼatanu tachuwin. Niku pulalinkan xtatayananin Jehová tlawaka departamento Servicios de Traducción xlakata nakamakgtayakgo equipos, nakgalhtikgo takgalhskinin nema xlakan tlawakgo chu putum equipos watiya tuku natlawakgo akxni matitaxtikgo Xtachuwin Dios xlakata Tiku nalatamakgo kxaSasti Katiyatni kxtachuwinkan. Na tlawaka akgtum programa nema tamaklakaskin kcomputadora nema wanikan Watchtower Translation System xlakata nakamakgtayakan traductores. Pulaktum tuku tlawa uma programa, wa pi masiya la matitaxtikanit akgatunu tachuwin hebreo chu akgatunu tachuwin griego nema maklakaskinka akxni matitaxtika Biblia xaʼinglés, uma lu kamakgtaya traductores akxni laksakkgo tachuwin nema namaklakaskinkgo kxtachuwinkan. Pero ni kalakpuwantit pi uma taskujut ni tuwa, tiku matitaxtikgo Biblia lhuwaku tuku xlitlawatkan. Pero programas xla computadora kamakgtayakgo ni lu tuwa namakgkatsikgo taskujut nema kalakgayawakanit: natlawakgo pi Xtachuwin Dios xlakata Tiku nalatamakgo kxaSasti Katiyatni nataʼakgatekgsa chu xatakgatsin nawan chuna la Biblia kxaʼinglés.

Kkamakgpuwantiniyan nalikgalhtawakgayatit Xtachuwin Dios xlakata Tiku nalatamakgo kxaSasti Katiyatni. Tlan nalikgalhtawakgayatit ksitio xla Internet jw.org o kʼaplicación JW Library, o tlan namakglhtinana maktum Biblia anta kxPukgalhtawakgakan xtatayananin Jehová. Lu nalipaxuwaya la tlawakanit uma Biblia, makgapitsi tuku kgalhi wa pi xaletra liwana tasiya chu ni tuwa likgalhtawakgakan; nachuna, niku tsuku akgatunu libro, tatsokgnit tuku lichuwinan libro, nema namakgtayayan lakapala natekgsa versículos nema tlakg maklakaskinkan, chu na kgalhi akgtum apéndice nema nakinkamakgtayayan tuku lichuwinan Biblia. Chu tuku tlakg xlakaskinka, tlan nalikgalhtawakgaya Biblia chu tlan nalipawana pi uma Biblia nema matitaxtikanit ktachuwin nema wix maklakaskina chali chali, limin xtamakatsin Dios chu ni lakgpalikanit.

Glosario: Makgtayanan naʼakgatekgskan lhuwa tachuwin xalak Biblia.