Enero kata 2013, revista Makatsinina ktachuwin groenlandés makgatsilh tipuxum kata. Tachuwin groenlandés wa chuwinankgo latamanin tiku kalilakgapaskan inuit tiku max chuwinankgo 57,000 latamanin.

Anta kʼGroenlandia wilakgolh liwaka 150 xtatayananin Jehová, pero revista Napasuliaq Alapernaarsuiffik (xtukuwani Makatsinina kʼgroenlandés) tlawakan 2,300 revistas. Uma litasiya pi lhuwa tiku likgalhtawakgakgo ni xtatayananin Jehová.

Xlakata makgatsilh tipuxum kata, chatum reportero xala kʼakgtum televisión alh niku tamatitaxti ktachuwin groenlandes uma likgalhtawakga, kkachikin wanikan Nuuk xlakata natlawa takgalhskinin. Tiku pulalin taskujut wa: «Lhuwa groenlandeses katsiputunkgo tuku masiya Biblia, wa xlakata likgalhtawakgakgo revista».

Akxni reportero kakgalhskilh «¿Tuku tlakg lakgatiya nema limin uma revista?», chatum puskat tiku na matitaxti kʼuma tachuwin kgalhtinalh: «Xlakata tuku tatsokgnit lu makgtayanan. Akit lu kimakgtayanit. Akgtum liʼakxilhtit, kimasiyaninit tlakg nakpaxuwa kkilatamat chu nakinkuentajtlawakan. Xapulana lu lhuwa xakxkuli maski xakkatsi pi lakgalhinan. Pero Biblia kimasiyanilh pi komo ni natatatlaputunaw talakaskin nitu nalimaxkajwaniyaw kimaknikan».

Na lichuwinanka pi xtatayananin Jehová xwilakgolha kxitat kata 1950 kʼGroenlandia, chu wanka pi xtlawakgonita lhuwa libros chu folletos ktachuwin groenlandés. Tiku matitaxtikgo kʼuma tachuwin, xalak Dinamarca chu Groenlandia, ni kaxokgonikan, chu putum kilhtamaku lakaskinkgo pi liwana kataʼakgatekgsli tuku tsokgwilikgo.

Chatum xtatayana Jehová tiku makgatsilha puxamakitsis kata lata kalitachuwinama Dios xalak Groenlandia wa: «Kakxilhnit la xlilakaskinka kamaxkikan latamanin likgalhtawakga kxtachuwinkan. Makgapitsi kachikinin nema lu makgat wilakgolh, nema kaj kbarco tlan chankan kmakgapitsi papaʼ, wilakgolh latamanin tiku lu lakgatikgo likgalhtawakgakgo revistas nema ktlawayaw. Xlakata kaj lakgachunin kkalakgapaxialhnanaw, kkatsokgnaniyaw chu kkamalakgachaniyaw likgalhtawakga».

Kata 2013 groenlandeses tlan tsukukgolh likgalhtawakgakgo revista Makatsinina nema kamaxkikgo latamanin xtatayananin Jehová. Chu tlan maktikan ksitio jw.org.