Akxni napitaniya niku wan «Tachuwin xla sitio» nema wi kʼuma página, tlan naʼakxilha liwaka 300 tachuwin, nema nila katitekgsti kʼatanu sitio xla Internet.

Xlikana pi lhuwa sitios xla Internet anankgo klhuwa tachuwin pero kaj wa jw.org tlakg kgalhi tachuwin. Kaʼakxilhwi makgapitsi. Julio kata 2013, xpágina oficial xla Naciones Unidas tlan xʼakxilhkan kʼakgchaxan tachuwin, chu Unión Europea kpuxamatati tachuwin. Makgapitsi tuku tlawa Google xwi k71 tachuwin chu kWikipedia tlan xʼakxilhkan artículos k287.

Akxni kʼakgtum página wilikan 300 tachuwin, talakaskin lhuwa taskujut. Lhuwa ciento xtatayananin Jehová makgtlawakgo uma taskujut nema matitaxtikgo kʼatanu tachuwin chu uma malanki Dios. Tuku wi ksitio pulana tsokgkan kxaʼinglés chu kʼakgatunu tachuwin wilakgolh tiku liwana kamasiyanikanit xlakata tlan namatitaxtikgo kʼatanu tachuwin.

Sitio jw.org kgalhi lhuwa páginas nema tamatitaxtinit liwaka 300 tachuwin. Liwaka 200,000 páginas kgalhi, uma lu lhuwa.

Ni kajwatiya tlan lhuwa tiku tanukgo kjw.org wata lu lakgapaskan. Tlan likatsiyaw xlakata lista nema tlawa empresa Alexa, nema akxilha la xlilhuwa tanukan kʼakgtum página xla Internet. Anta niku wan, «Takanajla» taʼakxilha liwaka 87,000 sitios, chu nachuna tlakg xalaklanka takanajla, chu tiku makgtapakgsikgo kʼatanu takanajla chu tiku tlawakgo likgalhtawakga. Anta kʼuma categoría, jw.org xlipulaktiy xwanit kpapaʼ julio xla kata 2013. Xapulana xwi akgtum sitio nema kamaxki talakaskin naʼakxilhkgo kʼInternet maklhuwa Biblias.

Octubre xla kata 2013, jw.org akgatunu kilhtamaku xtanukgo liwaka 890,000 chu xmaklakaskinkgo tanu tanu dispositivos. Chu akinin kkamaxkiputunaw tuku lu xlakaskinka xalak Biblia putum tiku tanukgo kʼInternet.