Kmakgapitsi países tiku nila lakawanankgo nitlan kakitaxtuni la amakgapitsin xlikalanka katiyatni. Kalakgmakgankan chu lhuwa ni kamaxkikan tamakgtay nema maklakaskinkgo. Tuku ni tuwa tlawakgo tiku tlan lakawanankgo, pero tiku nila lakawanankgo lu tuwa kakitaxtuni. Akgtum liʼakxilhtit, nila ankgo tamawanankgo kmercado, ni katsikgo tukuya autobús nachipakgo chu nila katsikgo la xtapalh makgapitsi tumin. Nachuna, lhuwa nina katsinikgo la nalikgalhtawakgakgo braille. Chu tiku katsinikgoya likgalhtawakgakgo braille ni anan likgalhtawakga kxtachuwin.

Pero, xtatayananin Jehová liwaka akgtum ciento kata la tlawamakgolh likgalhtawakga xalak Biblia xpalakata latamanin tiku nila lakawanankgo. Nina makgas malakgachaka tuku liʼimprimirlikan chu liʼencuadernarlikan likgalhtawakga kbraille xalak Países Bajos kMalaui. Chuna tlan xtlawaka likgalhtawakga ktachuwin xalak ama kachikin: chichewa.

Leo tiku katsini tlawa likgalhtawakga kbraille, xla xwi ksucursal xla xtatayananin Jehová xalak Brasil chu alh kMalaui. Anta kamasiyanilh kgalhkitsis tiku ankgo makgtayanankgo la tlan namaklakaskinkgo uma equipo nema kamaxkika, nachuna kamasiyanilh la namaklakaskinkgo tuku litsokgnankan kbraille nema tlawakgonit xtatayananin Jehová. Xlakata uma programa tlan xtsokgli ktachuwin chichewa kbraille, tiku xmakgtayanamakgolh tsokgwilikgolh letras nema maklakaskin chichewa chu nema lakgchan kbraille. Uma programa tlawa pi ni tuwa nalikgalhtawakgakan. La uku, tiku chuwinankgo chichewa chu nila lakawanankgo kgalhikgo likgalhtawakga kbraille kxtachuwinkan. Kaʼakxilhwi tuku wankgo xtatayananin Jehová tiku nila lakawanankgo.

Munyaradzi chatum puskat nema nina lin kata wa matitaxti programa kxradio. Nachuna, tutupuxamakaw hora akgtum papaʼ kamasiyani xtalakatsu tuku xaxlikana masiya Biblia. Xla wan: «Xakmakglhtinana likgalhtawakga kbraille xaʼinglés, pero xlakata la uku kmakglhtinan kkintachuwin, tuku lichuwinan lakgchan kinaku. Lu lhuwa xtapalh kʼakxilha taskujut nema tlawakgolh chu tuku limakgasputkgonit kinatalan xlakata tlan xtlawaka likgalhtawakga kbraille kkintachuwinkan. Kmakgkatsi pi kinkapaxkikanan, chu nitu kinkapatsankgamakan».

Francis, lama kxnorte Malaui, xtalakaskin pi wi tiku xlikgalhtawakganilh ktachuwin chichewa. Wa xlakata akxni makglhtinalh xapulana likgalhtawakga kbraille kchichewa lu lipaxuwalh chu wa: «¿Kaj kmanixnima, o tuku lama? ¡Nila kkanajla!».

Loyce putum kilhtamaku kamasiyani latamanin xlakata Biblia. Akxni masta takgalhtawakga, tiku kamakgalhtawakgema maklakaskinkgo likgalhtawakga nema limin letra xla xtatayananin Jehová, chu xla maklakaskin kbraille. Chuna tlan kamakgtayanit 52 latamanin tlan nalakgpalikgo xlatamatkan.

Leo, xtatayana Jehová tiku lichuwinawa, wa: «Lu klipaxuwa akxni kkamaxki latamanin tiku nila lakawanankgo likgalhtawakga kbraille chu tuku wankgo akxni katsikgo pi anan kxtachuwinkan. Lhuwa wankgo pi lu paxtikatsinikgo Jehová, xlakata uma likgalhtawakga kamakgtaya nalakkaxwilikgo xlakata tamakxtumit chu tlan nalichuwinankgo Dios. Nialh talakaskin pi wi tiku nakalikgalhtawakgani; la uku tlan xakstukan likgalhtawakgakgo Biblia. Nachuna tlan kamakgtayakgo xfamiliajkan natatliwakglha xtakanajlakan. Chu uma likgalhtawakga tlawa pi tlakg natalakatsuwinikgo Jehová».