Jesús lichuwinalh pi xalakwan tamakatsinin xla xTamapakgsin Dios xʼamaka kalitachuwinankan latamanin kputum laklanka kachikinin (Mateo 24:14). Xlakata tlan nakkamasiyaniyaw latamanin kxtachuwinkan, xtatayananin Jehová kmatitaxtiyaw likgalhtawakga xalak Biblia klhuwa tachuwin, xapulana ktsokgaw kxaʼinglés. Kkata 1909 ktsukuw matitaxtiyaw kxaʼespañol, xlipulaktiy tachuwin tiku tlakg lhuwa latamanin chuwinankgo, chuna la tachuwin chino. La uku, max 500 millones latamanin xlikalanka katiyatni chuwinankgo español.

Wiliam, tiku makgmatitaxti likgalhtawakga kxaʼespañol wan: «Kputum katiyatni lakgapaskan español. Klhuwa países chuwinankan español niku tanu tanu talismanin kgalhikgo». Na wampa: «Kmatitaxtiputunaw tuku nalakgchan kxnakujkan putum tiku nalikgalhtawakgakgo, tiku kaniwa xalanin, maski ni lakxtum la xlilhuwa ankgonit kʼescuela o la kgalhikgo xlatamatkan». Xlakata tlan chuna naktlawayaw, tiku matitaxtikgo kxaʼespañol xalak Argentina, Colombia, El Salvador, Estados Unidos, Guatemala, México, Puerto Rico, Uruguay, Venezuela chu xalak España.

Akglhuwata kata, tiku matitaxtikgo kxaʼespañol xwilakgo kʼEstados Unidos chu akxni anta xwilakgo xmakgtayanankgo xalak Argentina, España chu México. Kkata 1993, kalinka kPuerto Rico, anta niku tlan makxtum skujkgolh.

Kmarzo xla kata 2012 lakatanu kalimparaka, uma kilhtamaku kalinka ksucursal xla xtatayananin Jehová xalak España. Edward, tiku na kataʼalh wa: «Ni kajwatiya kkaliw tiku matitaxtikgo likgalhtawakga, tuku maklakaskinkgo, muebles chu tuku maklakaskinkgo kxoficinaskan, wata na kliw “tuku lu xlakaskinka”: biblioteca». Kʼuma biblioteca wi 2,500 libros niku tlan putsanankan, na wilakgo lhuwa Biblias kxaʼespañol.

Tiku matitaxtikgo kxaʼespañol chankgolh kʼEspaña 29 xla mayo kata 2013. Familia Betel xalak España lu tlan kamakgamakglhtinankgolh. Tiku matitaxtikgo likgalhtawakga, libros, muebles chu tuku maklakaskinkgo kxoficinaskan patakutkgolh kʼAtlántico; pero xlakata liwana lakkaxwilika chu xlakata lhuwa skujkgolh lhuwa latamanin, chuntiya xkilhta makglhtinankgolh likgalhtawakga tiku likgalhtawakgakgo. Edward wa: «Tlakg xlakaskinka nalichuwinanaw Tamapakgsin, chu lakaskinaw pi tlakg lhuwa tiku chuwinankgo español kakgaxmatkgolh uma tamakatsinin».