Xtatayananin Jehová matitaxtikgonit likgalhtawakga klhuwa tachuwin. Noviembre kata 2014 xakmatitaxtinitawa Biblia k125 tachuwin chu likgalhtawakga k742. Na kmatitaxtiyaw kʼatanu tachuwin videos. Lata enero kata 2015, video ¿Tuku tatlawa kPukgalhtawakga? tlawakanit k398 tachuwin, chu video video ¿Tuku xlakata nalikgalhtawakgaya Biblia? tlawaka k569 tachuwin. ¿Tuku xlakata tlawaka? ¿La tlawaka?

Marzo kata 2014, Lakgkgolotsin tiku Pulalinkgo taskujut xla xtatayananin Jehová kaskinilh sucursales xlikalanka katiyatni pi xmatitaxtikgolh videos klhuwa tachuwin xlakata tlan xmalaknuka takgalhtawakga xalak Biblia.

Matitaxtikan uma videos pulaklhuwa tuku tlawakan. Pulana, equipo tiku matitaxtikgo atanu tachuwin tlawakgo guión. Alistalh laksakkan tiku chuwinan uma tachuwin lata xlichalhuwa la tiku chuwinankgo kvideo. Alistalh, tiku skujkgo kʼaudio chu video grabrarlikgo tuku matitaxtikanit, liwana lakkaxwilikgo chu letra nema natasiya kpantalla. Xaʼawatiya, kaxwilikan archivo xlakata natasiya ksitio xla Internet.

Makgapitsi sucursales kgalhikgo estudios xla grabación chu tiku liwana katsinikgo tlawakgo uma taskujut. Pero ¿la tlawakgolh videos ktachuwin nema lu lakgamakgat wilakgolh?

Xlikalanka katiyatni, técnicos xla audio video maklakaskinkgolh dispositivos xla grabación nema tlan malakxijkan. Maklakaskinkgolh akgtum micrófono chu akgtum computadora nema tlan linkan chu akgtum programa nema ligrabarlinankan, xkaxwilikgo akgtum oficina, akgtum Pukgalhtawakga o chiki niku xkaxwilikanit xlakata nagrabarlinankan. Tiku xchuwinankgo uma tachuwin, chatum tiku xgrabarli, chatum director chu chatum tiku xʼakxilha. Akxni ksputa grabación chu liwanaja xkaxwilikanit, técnico xla audio chu video xʼmpara alakatanu kachikin.

Xlakata chuna tatlawa, matitaxtikan videos kʼatanu tachuwin tlakg talhuwilh.

Uma videos lu tlan makgamakglhtinanka. Lhuwa latamanin xlimakgtumku akxilhkgonit akgtum video xtachuwinkan.

Kʼakgtum tachuwin nema grabarlika wa pitiantiatiara, nema kaj 2,500 latamanin chuwinankgo kʼAustralia. Uma grabarlika kʼAlice Springs (Territorio Norte). Callan Thomas wa: «Putum lu lakgatikgonit videos, xla makgtayanalh kgrabaciones. Latamanin xala anta kaks xʼakxilhkgo tableta chu makglhuwa xkgalhskininankgo niku tlan tlakg xtekgskgolh videos. Xlakata ni lu anan likgalhtawakga ktachuwin pitiantiatiara, kaks lilakawankgo akxni kgaxmatkgo, chu tlakg kaks lilakawankgo akxni akxilhkgo kxtachuwinkan».

Chatiy xtatayananin Jehová xalak Camerún xʼankgo kʼcanoa kkgalhtuchokgo. Tachokgokgolh kʼaktsu kachikin pigmea chu tachuwinankgolh xapuxku, xla makgalhtawakgena xwanit kʼescuela xala anta. Akxni katsikgolh pi xchuwinan bassa, natalan masiyanikgolh ktableta video ¿Tuku xlakata nalikgalhtawakgaya Biblia? kxtachuwin.

Akgtum aktsu kachikin kʼIndonesia, xapuxku tiku xpulalin takanajla, tiku ni kaʼakxilhputun xtatayananin Jehová, lhkuyukgolh putum likgalhtawakga nema xtamaʼakgpitsinit. Makgapitsi latamanin wankgolh pi na xʼamakgolh lhkuyukgo Pukgalhtawakga. Nachuna, kgalhtati policías ankgolh xchik tala puskat xlakata wi tuku nakgalhskinkgo chu xfamilia. Xkatsiputunkgo tuku tatlawa kPukgalhtawakga,wa xlakata xla kamasiyanilh video ¿Tuku tatlawa kPukgalhtawakga? ktachuwin indonesio.

Akxni xʼakxilhkgonita video, chatum policía wa: «La uku kakxilha pi latamanin nitu katsikgo mimpalakatakan». Achatum policía kgalhskininalh: «Uma video masiya la likatsiyatit wixin. ¿Tlan xkilamaxkiw xlakata xakkamasiyanilh amakgapitsin?». Policías tlan kalichuwinankgo xtatayananin Jehová chu la uku kakuentajtlawa.

¿Nina akxilha umakgolh videos? ¿Tlan xʼakxilhti kmintachuwin?