Akxni xakxilhnita videos xla laktsu kamanan nema wanikan Xʼamigo Jehová kawanti, chatum tlat xalak Malasia wa: «Xtachuna la komo Jehová xkalikgalhtawakganinit xnakujkan natlatni».

Kʼuma series xla caricaturas nema tlawakgonit xtatayananin Jehová, tiku tlakg titaxtukgo wa aktsu kgawasa wanikan Caleb chu xfamilia. Putum videos wilakgolh ksitio jw.org chu kamasiyani laktsu kamanan tuku lu xlakaskinka xlakata la nalikatsikgo chu xlakata xtakanajlakan. Akgtum liʼakxilhtit, pulaktum masiya tuku xlakata nitlan kgalhanankan chu atanu masiya la tlan natlawanikgo oración Dios. Xlakata tlan nakamakgtayakan laktsu kamanan xlikalanka katiyatni, xapulana video matitaxtikanit 131 tachuwin.

Chatum puskat tiku kgalhi kgalhkitsis xkaman tsokgli: «Kgalhiya akgtum semana kinkamaxkikan DVD Jehová bendice al que escucha y obedece, ¡chu max tipuxumakaw xlimakglhuwa la kakxilhnitawa!». Uma DVD limin xapulana lecciones xla serie.

Millie kgalhi 12 kata chu wi kʼInglaterra. Xtala wanikan Thomas chu kgalhi 15 kata, kgalhi síndrome de Down. Millie tsokgli: «Thomas kgalhi videos xla Caleb anta kxaʼiPad chu kamasiyani tiku kataʼan kʼescuela. Lu lakgati takilhtlin chu lu tlan likilhtli. Chatum tala puskat xalak congregación akxni kgaxmatli la kilhtli, tsukulh tasa. ¡Lu lilakgatit kgaxmatnikan!».

Ava tsokgli kxcarta pi kgalhi akgtsayan kata, akgnajatsa papaʼ chu puxumakitsis kilhtamaku. Xla wan: «Caleb chu xtala tsumat lu katsinikgo kamasiyanikgo laktsu kamanan».

Chu kxcarta Mikaylah xwan: «Kkgalhi akgchaxan kata. Paxtikatsinilh xlakata uma DVD Jehová bendice al que escucha y obedece. Kkatsinilh pi komo nakkakgaxmatni kintlat chu kintse, Jehová napaxuwa».

Chatum kgawasa tiku lu katsini xlakata caricaturas chu ni xtatayana Jehová akxilhli video Kgalhanankan nitlan chu kaks lilakawa, liwaka akxni katsilh pi ni lhuwa tiku xtlawakgonit. Xla wa: «Kkalakgapasa tiku skujkgo kxalaklanka estudios chu kxalaktsu niku katlawakan caricaturas, min kilhtamaku kinkgalhskinkan la xwa komo anta xakskujli. Pero kkatsi pi putum taskujut nema tlawakan anta kaj puntsu kamakgalitsin tiku akxilhkgo. Pero, video nema tlawayatit wi tuku kamatlawi laktsu kamanan, kamasiyani tuku tlan chu tuku nitlan chu na kamakgtaya liwana nalaksakkgo tuku natlawakgo. Wixin tlawayatit tuku xlikana kamakgtaya amakgapitsin chu uma xlilat naliskujkan».

Natlatni xlikalanka katiyatni na mastakgonit tapaxtikatsinit xlakata uma serie. Akgtum liʼakxilhtit, xtse chatum aktsu kgawasa tiku akgtutu kata kgalhi, tsokgli: «Akgtum kilhtamaku kinkgawasa Quinn xakxilhma video La amistad con Jehová. Akxni itat xʼanacha takilhtlin, kuxmuchipaka chu kiwanilh: “Tse, uma tlawa pi kinaku napaxuwa”».