Sábado 14 xla marzo kata 2015, clase 138 xla Escuela Bíblica de Galaad tlawaka graduación anta kCentro Educativo de la Watchtower, nema wi kPatterson (Nueva York). Liwaka 14,000 latamanin akxilhkgolh programa, na anta makgtanuma tiku kamatitaxtinika programa kʼatanu kachikinin. Uma limatsukika akgtati xalaksasti tatlakgni nema alistalh likilhtlika. a

Geoffrey Jackson, tiku na makgtapakgsi tiku Pulalinkgo xTaskujutkan xtatayananin Jehová, wa tiku pulalilh programa. Tachuwin nema limatsukilh, kawanilh tiku kilakgolh kʼGalaad pi ni kaj xakstukan xlitamakgtayakgolh, wata xmaklakskinkgolh xlakata xkamakgtayakgolh amakgapitsin (2 Timoteo 2:2).

Tala Jackson lichuwinalh xliʼakxilhtit Moisés. Makgas kilhtamaku, anta xtienda uma palakachuwina niku xkakninanikgo Jehová israelitas. Pero, akxni tlawakgoka tabernáculo, talakgpalilh. Moisés ni xmaxkikan talakaskin natanu ktabernáculo asta niku xwi Santísimo, xlakata kaj xapuxku sacerdote tlan xtanu. Maski chuna, Biblia ni wan pi xla lisitsilh pi chuna lakgpalika. Wata, xatapaxuwan makgtayalh Aarón akxni xapuxku sacerdote liyawaka (Éxodo 33:7-11; 40:34, 35). ¿Tuku kinkamasiyaniyan uma liʼakxilhtit? Tala Jackson wa: «Lhuwa xtapalh kaʼakxilhtit tuku kalakgayawakanatit, pero ni kalakgkatsantit».

«¿Nakamakgapekuanan xaskakni tuwan?” Chuna xwanikan xtaʼakgchuwin tala Kenneth Flodin, tiku makgtayanan kComité de Enseñanza xla Lakgkgolotsin tiku Pulalinankgo. Kawanilh tiku kilakgolh kʼGalaad, pi kilhtamaku nema aku xmima, max xtitaxtukgolh tuku lu tuwa, max xkaputsastalaka o xkgalhikgolh lu tuwa taskujut. Wa xlakata limaklakaskilh akgtum tachuwin xla Levítico 26:36 xlakata xkastakyawalh pi xʼakxilhkgolh taʼakglhuwit la xaskakni tuwan, chu ni taʼakglhuwit nema nila tayanikan. Alistalh, lichuwinalh xliʼakxilhtit apóstol Pablo, tiku tayanilh lhuwa taʼakglhuwit xlakata lu xlipawan Jehová (2 Corintios 1:8, 10).

«¿Tuku putsapatit?» Mark Sanderson, tiku na makgtapakgsi Kgolotsin tiku Pulalinankgo, lakgchalh nakatachuwinan tiku xwilakgolh anta. Lichuwinalh tuku wan Proverbios 13:12: «Takgalhkgalhin nema ni tunkun kgantaxtu makgatatatla naku». Lu nitlan, pero lhuwa latamanin nitlan limakgkatsikgo pi nila tlajakgo lhuwa tumin chu lhuwa kakalakgapaska nema lu putsakgo.

Kxkilhtamaku Jesús, makgapitsi ni akxilhkgolh tuku xkgalhkgalhimakgolh xlakata Juan tiku xMununan (Lucas 7:24-28). Akgtum liʼakxilhtit, makgapitsi xkgalhkgalhimakgolh tiku lu skgalala chu kaks xkalimalakawanilh tuku xkamasiyanilh. Komo wa xkgalhkgalhimakgolh, ni chuna kitaxtulh xlakata tuku xmasiya Juan xlichuwinan wa tuku xaxlikana. Atanu xlakpuwankgo pi lu xatapalaxla lhakgat xwililh, pero xla xwili klhakgat la tiku nitu xkgalhi. Pero, tiku xkgalhkgalhimakgolh chatum palakachuwina lipaxuwakgolh, xlakata Juan ni kaj palakachuwina litaxtulh; wa tiku lakkaxwililh tiji akxni xchilh Jesús (Juan 1:29).

Xlakata uma liʼakxilhtit, tala Sanderson kawanilh pi ni xmalakatsalikgolh tuku xkgalhkgalhikgolh. Ni xlakpuwankgolh pi lhuwa tuku xʼamakgolh kgalhikgo o lu xlakaskinka xkaliʼakxilhka, kamaklakaskintit tuku katsinitit xlakata nakamakgtayayatit natalan, tuku katsinitit kʼGalaad nalimatliwakglhatit xtakanajlakan chu nakapaxkiyatit. Tala Sanderson wa: «Xataktujun naskujnaniyatit minatalan, kaliskujtit xlakata natlawayatit xtalakaskin Jehová, chu ni katilipuwantit».

«¿Nakamawiyatit tiku tsinksmakgolh?» Chuna xwanikan xtaʼakgchuwin James Cauthon, tiku na masiya kDepartamento de Escuelas Teocráticas. Tala Cauthon lichuwinalh pi kimputumkan lakaskinaw kakinkapaxkikan chu xlakaskinka kakinkaʼakxilhkan. Asta Jesús nachuna makgkatsilh, chu Jehová limasiyanilh pi xpaxki akxni wanilh laktlan tachuwin akxni tamunulh (Mateo 3:16, 17).

Jehová kinkatlawanitan xlakata tlan nakamakgpuwantiniyaw chu nakalimatliwakglhaw kintachuwinkan amakgapitsin chu lakaskin pi chuna katlawaw (Proverbios 3:27). Tala Cauthon wa: «Kaliskujtit xlakata naʼakxilhatit tuku tlan tlawakgo amakgapitsin chu nakawaniyatit tuku akxilhatit». Akxni kawaniyaw laktlan tachuwin kinatalankan makgkatsikgo pi tlan tuku tlawamakgolh.

«Putum kamastatit.» Tala Mark Noumair, tiku makgtayanan kComité de Enseñanza, mastalh xtaʼakgchuwin. Maklakaskilh xliʼakxilhtit apóstol Pablo tiku lhuwa tuku limakgxtakglhi xlakata xkawanilh tiku kilakgolh kʼGalaad pi chuntiya lhuwa kskujputunkgolh. Chuna la apóstol, lu nalipaxuwayatit komo lhuwa tuku natlawayatit xpalakata amakgapitsin (Filipenses 2:17, 18).

Pablo nikxni taxlajwanilh akxni tuku tuwa xtitaxtu. Xlakata putum mastalh, uma wamputun, lu liskujli asta akxni nilh, tlan wa: «Takgaman anta ni latlajakan, wampi aya lakgchanit kilhtamaku nakchan anta ni kilichanat xwanit» (2 Timoteo 4:6, 7, TXS, 1999). Tala Noumair kawanilh tiku kilakgolh kʼGalaad pi nachuna xtlawakgolh la xliʼakxilhtit Pablo akxni xlichuwinankgolh Dios niku xʼankgolh.

Experiencias. Michael Burnett, tiku na masiyalh kʼEscuela de Galaad, lakgchalh namatitaxti uma, xlakata xmatitaxtikgolh tuku titaxtukgolh akxni xlichuwinamakgolh Dios akxni xwilakgolh kPatterson.

Litasiyalh pi lu tlan kitaxtulh, akxni tiku kilakgolh kʼGalaad lichuwinankgolh Dios chu masiyakgolh tuku wan Biblia kxtachuwinkan latamanin. Akgtum liʼakxilhtit, chatum katsilh pi kterritorio niku xʼama lichuwinan Dios lhuwa xʼanan tiku chuwinankgo español. Wa xlakata, akxni nina xʼan katsinilh makgapitsi tachuwin nema anan kʼaplicación JW Language. Ama kilhtamaku, maski kaj tsinu katsinilh, tsukulh tachuwinan chatum chixku tiku tekgsli ktiji. La uku, uma chixku chu kgalhtati xalak xfamilia likgalhtawakgamakgolh Biblia.

Entrevistas. Tala William Turner, tiku makgtayanan kComité de Servicio xla Lakgkgolotsin tiku Pulalinankgo, kakgalhskilh kgalhtati tiku kilakgolh kʼGalaad. Kakgalhskilh tuku titaxtukgolh akxni nina xʼankgo kʼGalaad chu tuku kamasiyanika anta.

Tiku kilakgolh kʼGalaad lichuwinankgolh pi tuku kamasiyanika kʼclases tlakg kamakgtayanit. Akgtum liʼakxilhtit, chatum wa pi lhuwa tuku xkatsininit xlakata capítulo 10 xla Lucas. Uma 70 xtamakglhtawakgen Jesús nema kamalakgachalh nalichuwinankgo Dios xatapaxuwan taspitkgolh. Maski Jesús na lipaxuwalh, kamasiyanilh pi tapaxuwan ni kajwatiya akxni tlan kitaxtu, wata xtaskujutkan xmakgapaxuwanit Dios. Uma kinkamasiyaniyan pi tapaxuwan ni kaj akxni tuku tlan kitaxtu, wata akxni Jehová tlan kinkaʼakxilhan.

Tala Turner kalixakgatlilh tuku wan Filipenses 1:6 tiku kilakgolh kʼGalaad chu liwana kawanilh pi Jehová xmatsukunit lu tlan taskujut xpalakatakan chu xʼama maʼakgasputu.

«Chuntiya kaʼakxilhtit Jehová.» Samuel Herd, Kgolotsin tiku na Pulalinan, matitaxtilh xlakaskinka taʼakgchuwin. Lichuwinalh la tlan naʼakxilhaw Dios maski ni tasiya.

Pulaktum la tlan natlawayaw wa naʼakxilhaw putum tuku tlawanit, nema lhuwa tuku kinkamasiyaniyan xlakata Dios. Nachuna, Jehová lhuwa tuku kinkamasiyaninitan (Efesios 1:18). Akxni tlakg likgalhtawakgayaw Biblia, tlakg lhuwa tuku katsiniyaw xlakata Jehová. Chu akxni tlakg katsiniyaw xlakata Jehová, tlakg talakatsuwiniyaw.

Lu kuentaj kilitlawatkan tuku tatsokgnit kʼEvangelios, xlakata xtachuwin chu tuku tlawalh Jesús kinkamasiyaniyan la likatsi Dios. Jesús liwana masiyalh la likatsi Jehová wa xlakata wa: «Wanti nkiukxilhnitta, ukxilhnitta xaTlat» (Juan 14:9).

Tala Herd kawanilh tiku xwilakgolh pi ni kaj xʼakxilhkgolh Jehová xlakata xliʼakxilhtit Jesús, wata na kstalanikgolh xliʼakxilhtit. Chuna la Jesús liskujli nakamawi amakgapitsin, akinin naliskujaw xlakata nakamaxkiyaw amakgapitsin taway xla kintakanajlakan nema makglhtinanaw.

Komo chuntiya akxilhaw Jehová, na tlan nawanaw la salmista akxni tsokgli: «Klakapastakan y kmakglhkatsi la kintalapat; kumu wix wila nak kimpaxtun, nikxni ti ama kimakgatlajaj» (Salmo 16:8).

Tuku lisputli. Akxni xkamaxkikanita xdiplomaskan, chatum tiku kapalakachuwinalh kclase likgalhtawakgalh maktum carta niku xpaxtikatsininankgo. Tala Jackson kawanilh tiku kilakgolh kʼGalaad pi ni xlakpuwankgolh pi xkamasiyanikgolh natalan tuku xasasti chu lu laktuwa akgatekgskan, xlakata xlakan lhuwa tuku lakgapaskgoya. Tala Jackson na kawanilh pi lu xlakaskinka taktujukan. Ni wa tlakg xkalichuwinanka chu tuku katsinikgolh kʼGalaad, wata tlakg xlakaskinka xliʼakxilhkgolh Biblia chu likgalhtawakga. Nachuna, ni xkamaxlajwanikgolh tiku nila ankgo kʼEscuela de Galaad, wata nakamakgtayayatit namaklakaskinkgo tuku kgalhikgo. Akxni akgasputli tamakxtumit, putum lu xpaxuwamakgolh chu lu xkamakgtayaputunkgo natalan.