Kilhtamaku 13 xla septiembre kata 2014 tlawaka graduación xla clase 137 xla Escuela Bíblica de Galaad anta niku masiyakgo xtatayananin Jehová kPatterson (Nueva York). Kʼuma escuela kamakgtayakan natalan tiku lhuwa katsikgoya xlakata nakamakgtayakgo natalan kcongregaciones chu ksucursales niku nakamalakgachan. Uma programa anta tlawaka kPatterson chu matitaxtika kʼauditorios xla Canadá, Estados Unidos, Jamaica chu Puerto Rico. Kilakgolh 12,333 latamanin.

Samuel Herd, kgolotsin tiku makgtapakgsi tiku Pulalinkgo xTatayananin Jehová, wa tiku pulalilh programa. Tuku limatsukilh lichuwinalh pi xtalakapastakni Dios ni makaʼakchanaw (Isaías 55:8, 9). Wa pi maski akgkitsis papaʼ katsinikgolh xtalakapastakni Jehová, kaj tsinu tuku xkatsinikgonit (Job 26:14). Na lichuwinalh pi litamakgtayayaw akxni tamakxtumiyaw xlakata nalichuwinanaw tuku lakpuwan Dios. Chu kʼuma tamakxtumit wa tuku tlawamaw.

«Xtatlaw espíritu wa: [...] lu kgalhkgalhinan» (Gálatas 5:22). Xtaʼakgchuwin tala John Larson, Comité xla Sucursal xalak Estados Unidos, lichuwinalh la pulaktiy namasiyayaw akgtum xtatlaw xʼespíritu Dios: lu kgalhkgalhinankan. Pulana, ni lakapala nasitsiniyaw Jehová akxni kinkamasiyaniman chu matliwakglhma kintakanajlakan (1 Pedro 5:10). Abrahán ni lakapala sitsilh akxni Jehová xmasiyanima chu xkgalhkgalhima nakgantaxtu tuku xwanit (Hebreos 6:15).

Xlipulaktiy, ni lhuwa tuku kakgalhkgalhiw kimpalakatakan. Max tiku kilakgolh kʼescuela lhuwa tuku natlawaputunkgo akxni nataxtukgo kʼGalaad. Komo akxni nachankgo niku nakamalakgachakan nichuna la xlakpuwankgonit, max nawankgo: «¿Tuku nitlan ktlawama?». Tala Larson, xlakata xkatsi tuku xtitaxtunit, liwana kawanilh tiku kilakgolh kʼGalaad pi komo ni lakapala ksitsikgolh chu chuntiya kskujkgolh chuna la Jehová xkamasiyanima, tlan xtayanikgolh tuku tuwa xtitaxtukgolh (Hebreos 6:11, 12).

«Minakujkan chuntiya kataʼaktujulh chu putum kilhtamaku kalatapatit.» Anthony Morris, kgolotsin tiku makgtapakgsi tiku Pulalinkgo xTatayananin Jehová, xtaʼakgchuwin xtakilhtinit kSalmo 22:26, nema lisputa: “Kanikxniwa kapaxuwalh minakujkan”. Xlakata tlan namakglhtinanaw uma tasikulunalin, nataktujuyaw. Tala Morris wa pi Jehová tlan wi tuku nakinkalakgayawayan komo nataʼaktujuyaw. Kimputumkan maski lhuwata kata la skujnanimaw Dios max nialh chuna katilakapastakwi la Jesucristo (2 Pedro 1:9).

Biblia lichuwinan tiku taktujukgolh chu tiku laktlanka xkamakgkatsikan. Akgtum liʼakxilhtit, Herodes Agripa lu tlanka xmakgkatsikan chu makgamakglhtinalh tuku lu tlan xwanimakgolh latamanin nema kaj Dios limalankikan. Wa xlakata, chatum ángel tlawanilh tuku nitlan chu wakgolh laktsu luwa (Hechos 12:21-23). Pero, akxni Jesús stakyawalh Pedro xlakata «ni akgatakgsa wantu xtalakaskin Dios, wampi xman wa wantu xla chixkuwin», tasiya pi Pedro ni lisitsilh (Mateo 16:21-23). Taktujulh chu makglhtinalh tastakyaw. ¡Lu tlan liʼakxilhtit kinkawilinin! (1 Pedro 5:5.)

Makgapitsi tiku kilakgolh kʼGalaad anta naskujkgo ksucursales xla xtatayananin Jehová. Tala Morris kawanilh, komo ni xtaktujukgolh, ni xpaxuwakgolh kBetel. Pero, tuwa kiʼakstukan naʼakxilhaw komo ni taktujuyaw. Xlakata xkamaʼakgatekgsnilh, tala Morris lichuwinalh pi makgasa chatum kgolotsin tiku maxkika tastakyaw xlakata tlanka xmakgkatsikan tsokgnalh ksucursal: «Kaj akit tiku lu taktuju lata xlikalanka katiyatni». Tala Morris kawanilh tiku kilakgolh kʼGalaad pi nichuna xlikatsikgolh. Akxni xʼakxilhkgo pi Jehová chu Jesús tlakg kgalhi limapakgsin uma xkamakgtayalh nataʼaktujukgo.

«Ni kaj talhkan ma[sta] Dios kspiritu» (Juan 3:34). Tiku masiyalh kʼuma escuela, Michael Burnett, kawanilh tiku kilakgolh kʼGalaad pi espíritu santo xʼama kamakgtaya nalakkaxtlawakgo taʼakglhuwit chu tuku ni liwana naʼakgatekgskgo. Wa uma espíritu nema makgtayalh Bezalel tlan xtayanilh taʼakglhuwit nema titaxtulh akxni xtlawama tabernáculo (Éxodo 35:30-35). Makgtayalh xlakata tlakg xatlan tuku xtlawalh chu xkamasiyanilh amakgapitsin. Nachuna natlawa xpalakata tiku kilakgolh kʼGalaad, liwaka komo chuna natlawakgo la masiya Biblia, nema likgalhtawakgakgolh umakgolh papaʼ.

Kilhtamaku nema lichuwinan Biblia, lakpuskatin israelitas na tlawakgolh xlakaskinka taskujut ktabernáculo (Éxodo 35:25, 26). Nachuna uku, natalan lakpuskatin limasiyakgonit pi lu makgtayakgo xchixkukan. Akxni makgalhsputulh xtaʼakgchuwin, tala Burnett wa: «Katatakgatsilh tuku wixin katsiniyatit tlawayatit tataktujut chu kakgalhakgaxpatnantit. Komo chuna natlawayatit, Jehová lhuwa nakamaxkiyan xʼespíritu».

«¿Kintatantliputuna?» Mark Noumair, tiku makgtayanan kComité de Enseñanza, lichuwinalh akxni David tlawalh pi xlinka arca xla talakkaxlan kJerusalén (2 Samuel 6:12-14). Akxni arca xtanumacha kkachikin, mapakgsina limasiyalh pi xtaktuju akxni xkatatantlima «lakpuskatin xlakskujnin» (2 Samuel 6:20-22). Xlikana pi amakgolh lakpuskatin nikxni patsankgakgolh ama kilhtamaku. Wa xlakata, tala Noumair kawanilh tiku kilakgolh kʼGalaad pi xtachuna xtatantlikgolh lakskujni. Kakgalhskilh: «¿Nakalilakgapaskananit pi kamakgtayayatit tiku kaj tsinu tuku kalakgayawakanit? [...] ¿Xlakaskinka nakaʼakxilhatit amakgapitsin kaj xlakata xtayatkan?».

Komo tiku kilakgolh kʼGalaad namasiyakgo uma tapaxkit, nachuna natlawakgo la Jehová (Salmo 113:6, 7). Maski tiku natalalinkgo laktlanka kamakgkatsikan, uma ni kakamaxlajwanilh. ¿La natlawakgo? Tala Noumair wa: «Natayaniyatit komo namakgkatsiyatit pi nitu litaxtuyatit». Na wa: «Chuna kalikatsinitit xborregos Jehová chuna la xtlawalh xla».

«Putum kilhtamaku kalichuwinantit Dios.» William Samuelson, superintendente xla Departamento de Escuelas Teocráticas, lichuwinalh xliʼakxilhtit Pablo, tiku putum kilhtamaku xanikuta xlichuwinan Dios (Hechos 17:17). Alistalh matitaxtilh liʼakxilhtit nema titaxtukgolh akxni xʼankgonit kʼescuela. Akgtum liʼakxilhtit, tamakgaxtokgat tachuwinalh tiku kskujma ksupermercado. Kgalhkgalhikgolh asta akxni nialhti xtawi chu masiyanikgolh video ¿Tuku xlakata nalikgalhtawakgaya Biblia? Chu alistalh wanikgolh pi katanukgolh kkisitiojkan xla Internet, jw.org, niku tlakg xtekgsli xlakata xtachuwin: lao. Titaxtulh kilhtamaku, tamakgaxtokgat lakgamparakgolh uma puskat xlakata chuntiya xkatsiputulh xlakata Biblia.

«Chuntiya katatayatit taskujut xlakata Tamapakgsin.» William Nonkes, tiku skuja kDepartamento de Servicio, kakgalhskilh kgalhtati tiku kilakgolh kʼescuela. Umakgolh natalan xkgalhakgaxmatmakgolh umakgolh tachuwin nema wi kʼIsaías 6:8 chu xlaksakkgonita natatayakgo xtaskujut Tamapakgsin, pero escuela kamakgtayalh xlakata tlakg lhuwa tuku xtlawakgolh. Tala Snolia Maseko wa pi Galaad makgtayalh xlakata xkatsilh tuku tlakg xlilakgpalit xwanit, la liwana maklakaskinkan kilhtamaku, asta akxni tantakuta lichuwinanita Dios. Wa: «Xlakata uma escuela tlakg lhuwa tuku tlan naktlawa nixawa tuku xaklakpuwanit». Tala Dennis Nielsen wa pi Sofonías 3:17 makgtayalh xlakata ni xtaxlajwanilh akxni xlichuwinan Dios. Xla wa: «Komo akgtum kilhtamaku nitlan kinkitaxtuni akxni klichuwinan Dios, kililakapastakat pi Jehová lu paxuwa, xlakata klimasiyanima tapaxkit nema kkgalhini, wa xlakata kilipaxuwat».

«Kaʼukxilhtit laktsu [tsiktsi] xala kʼakgapun» (Mateo 6:26). Taʼakgchuwin nema tlakg xlakaskinka xla tamakxtumit wa mastalh Stephen Lett, kgolotsin tiku makgtapakgsi tiku Pulalinkgo xTatayananin Jehová. Xlakata maklakaskilh xtastakyaw Jesús pi lu kuenta xtlawalh laktsu tsiktsi, tala lichuwinalh pulaklhuwa tuku tlan nakatsiniyaw xlakata laktsu tsiktsi (Job 12:7).

Chuna la Jehová kamawi uma laktsu tsiktsi, xla na kinkamaxkiyan tuku maklakaskinaw xlakata nalatamayaw. Akinin xalak “xchik Dios” chu Biblia wan pi nakamaxki «wanti xala kxchik» (1 Timoteo 3:15; 5:8). Xlikana, talakaskin pi wi tuku natlawayaw. Laktsu tsiktsi putsakgo liwat nema kamaxki Dios. Nachuna, akinin chuntiya “pulana naputsayaw xTamapakgsin Dios” xlakata namakglhtinanaw uma tasikulunalin (Mateo 6:33).

Tala Lett na lichuwinalh pi lhuwa laktsu tsiktsi tasakgo xlakata namakatsininankgo akxni makgkatsikgo pi wi tuku nala. Nachuna, akinin tlan namakgtayayaw chatum tala akxni naʼakxilhaw pi «xliʼakgchakgxtayalh mpala tu nitlan», kawaniw tuku nitlan nakitaxtu (Gálatas 6:1). Nachuna, akxni lichuwinanaw Dios, kamakatsiniyaw latamanin pi «xkilhtamaku Jehová» lakapala talakatsuwima (Sofonías 1:14). Tala lichuwinalh pi chuna la laktsu tsiktsi nema alakatanu niku antilhakgo tlakg kgoskgo kxakgspun lu laklanka sipi, akinin tlan tayaniyaw tuku lu laktuwa xlakata xtamakgtay Jehová (Mateo 17:20).

Tuku lisputli. Akxni mastaka diplomas, chatum tiku kilalh kʼescuela likgalhtawakgalh maktum carta niku paxtikatsinilh kxtukuwani putum tiku kilakgolh. Tuku limasputulh, tala Herd wa pi makikan xtalakapastakni Dios kkinakujkan xtachuna wilinikan clavos kkiwi, anta niku laktlawan tren. Talakaskin makglhuwa naliwiliniya martillo xlakata liwana nataxtokgo. Nachuna, tiku taxtumakgo kʼescuela chuntiya talakaskin nalilakpuwankgo tuku katsinikgolh kʼescuela xla Galaad. Tala Herd wa: «Kalimaxtutit kilhtamaku xlakata liwana nalaktanu minakujkan tuku katsinitit». Alistalh wampa: «Komo nalakpuwanatit la Jehová, akgtum tasikulunalin nalitaxtuyatit».