Tipuxamakaw kata, 583 xtatayananin Jehová akgkaw semanas ankgolh xlikalanka katiyatni. Pero ni kajwatiya xʼamakgo paxialhnankgo, wata na xkatatawilakgolh xnatalankan klaklanka tamakxtumit xla kata 1963 «Xalakwan xalaksasti putum kilhtamaku natawilakgo». Xlakata kilakgolh kʼakgpuxam países, uma serie wanikan laklanka tamakxtumit «Xlikalanka katiyatni».

Pulaktum tuku tlakg xlakaskinka xlakata tamakxtumit wa taʼakgchuwin nema xwanikan «Akxni Dios Mapakgsina nawan xlikalanka Katiyatni». Nathan Knorr, tiku wi niku kapulalinkan xtatayananin Jehová, mastalh kʼatsinu ni putum klaklanka tamakxtumit. Lichuwinalh xlakata la lu nitlan wi kakilhtamaku chu tamalakxtumilh lu tlan xatlan kakilhtamaku nema nakgalhiyaw, akxni Dios namakgantaxti tuku malaknunit chu Katiyatni akgtum Paraíso nawan. Xlikalanka katiyatni, 580,509 latamanin kgaxmatkgolh uma taʼakgchuwin.

Uma serie tsukulh kMilwaukee (Wisconsin, Estados Unidos). Alistalh amparakgolh kʼeste. Akxni sputli tamakxtumit kNueva York, ankgolh kʼInglaterra, Suecia, Alemania chu Italia. Kputum niku kilakgolh lichuwinankgolh xalakwan xalaksasti tamakatsin nema limin Biblia.

Lhuwa latamanin kapaxtikatsinikgolh xtatayananin Jehová xlakata limaxtukgolh kilhtamaku naʼankgo kalitachuwinankgo Dios. Chatum tsumat xalak Estocolmo (Suecia) wa: «Putum kilhtamaku naklakapastaka kilakgapaxialhnantit. [...] ¡Nila kkanajla xlakata lu makgat tantit xlakata nakilalitachuwinanaw takanajla nema kgalhiniyatit Dios! Kaks kimalakawaniyatit».

Chu akxni chankgolh kʼAtenas (Grecia), lu lipuwankgolh. Mapakgsina xalak kʼuma kachikin tlawalh tuku wankgolh xpulalinanin takanajla chu nialh mastalh talakaskin pi xtatlawalh tamakxtumit kʼEstadio Panathinaikos. Pero xtatayananin Jehová ni chuntiya tamakgxtakgkgolh. Akxni ksputma agosto, atsinu ni xchan akgkaw mil latamanin xkgaxmatkgonit tuku xʼama tamatitaxti ktamakxtumit, nema tamatitaxtilh kcongregaciones chu kmakgapitsi chiki.

Akxni taxtukgolh kʼAtenas, ankgolh kLíbano, Jordania, Israel chu kChipre. Lu xatapaxuwan chu tlan kamakgamakglhtinankgolh xnatalankan. Akgtum liʼakxilhtit, chatum tiku kilalh klanka tamakxtumit lichuwinan tuku akgspulalh anta kNicosia (Chipre): «Akxni xaktaspita kchiki ni xaktamakgxtakgma chu xaktatuxtu kizapato [...], nialhtu xwi niku xakwili [...], pero akxni xtitaxtu akgkitsis minuto anta xakakxilhpara, stlan xtasiya chu liwana xakakanit».

Xlakan amparakgolh kʼOriente chu kPacífico. Katatawilakgolh lhuwa miles xnatalankan klaklanka tamakxtumit xalak India, Birmania (actual Myanmar), Tailandia, Hong Kong, Singapur, Filipinas, Indonesia, Australia, Taiwán, Japón, Nueva Zelanda, Fiyi chu Corea. Lhuwa latamanin lakgpalikgolh tuku xlakkaxwilikgonit natlawakgo xlakata ni namakgatsankgakgo tamakxtumit. Pulaktum tuku kaks kinkamalakawaniyan wa tuku titaxtukgolh tiku xʼama latatamakgaxotkga xalak Yokosuka (Japón). Akxni kgawasa skilh permiso kxtaskujut xlakata naʼan klanka tamakxtumit kKioto, xmalana wanilh pi xmaxkilh permiso komo wi tiku xnilh o akgtum tamakgaxtokgat. Xlakata xlakan xlakaxwilikgonit pi nialh makgas xʼamakgo tamakgaxtokgkgo, malakapalikgolh xtamakgaxtokgatkan. ¿Chu niku kilakgolh kluna de miel? ¡Klanka tamakxtumit!

Anta niku kilakgolh makgasputukgolh kseptiembre anta klaklanka tamakxtumit xalak Hawai chu California (Estados Unidos). Chuna la tamakxtumikgolh kkachikin Pasadena nema tapakgsi kCalifornia, xaʼawatiya kachikin niku kilakgolh, tlakg lhuwa tawilaka nixawa tuku xlakpuwankgo. Kxaʼawatiya tamakxtumit, lhuwa putlaw xʼanankgo chu nila xtitaxtukan. Maski chuna, tiku xkapulalin policía chuna wa kperiódico xalak kachikin: «Nikxni xakakxilhnit akgtum lanka tamakxtumit niku latamanin lu tlan likatsikgo».

Tuku tlan titaxtukgolh kʼuma laklanka tamakxtumit asta la uku talichuwinan. Akgtum liʼakxilhtit, anta tamastalh libro «Toda Escritura es inspirada de Dios y provechosa», tamakgtay nema asta la uku tamaklakaskin xtamakxtumitkan xtatayananin Jehová.

Nachuna, klanka tamakxtumit kNueva York talikilhtlilh xasasti takilhtlin nema wanikan «Akgatunu chiki». Tiku tlawalh chatum xtatayana Jehová wanikan Harold King, tiku xtamaknukanit kpulachin kChina. Chu kkata 1963 maxtuka. Akxni xtanuma kpulachin tlawalh uma lu stlan takilhtlin. La uku, xtatayananin Jehová chuntiya likilhtlikgo nema wanikan «Akgatunu chiki».

La uku, laklanka tamakxtumit xla xtatayananin Jehová talakgpalinit. Xlakata tlakg lakalhuwa niku tatlawa chu niku nialh lu laklanka, tlakg ni lhuwa tastokgkan chu nialh lu makgat niku ankan. Uma chu atanu makgtayanan xlakata tlakg kuenta natlawakgo tiku tamakxtumikgo. Liwaka akgtujun millones xtatayananin Jehová chu amakgapitsi tiku kalinkgo, ankgo klaklanka kintamakxtumitkan akgatunu kata. Lu tlan komo xkilataw uma kata. Kapita unu xlakata naputsaya akgtum lanka tamakxtumit niku tlan napina.