Kilhtamaku 4 xla octubre kata 2014, max 19,000 latamanin kilakgolh ktamakxtumit número 130 xaʼakgatunu kata xla Watch Tower Bible and Tract Society of Pennsylvania. Tamakxtumit tatlawalh kSalón de Asambleas xla xtatayananin Jehová kJersey City (Nueva Jersey, Estados Unidos) chu na tamatitaxtilh kʼatanu kachikinin.

Mark Sanderson, kgolotsin tiku makgtapakgsi tiku Pulalinkgo xTatayananin Jehová, wa tiku pulalilh tamakxtumit. Tsukulh lichuwinan pi lu xlakaskinka kilhtamaku xwanit xlakata xtakgatsima akgtum ciento kata lata xtawilanit xTamapakgsin Mesías anta kʼakgapun.

Tala Sanderson lichuwinalh pulaktutu tuku xmakgantaxtinit Tamapakgsin uma kilhtamaku:

• Tamasiyama xlikalanka katiyatni. Xlakata xtamakgtay Jehová, xtatayananin Jehová lu liskujkgonit xlakata nalinkgo tamakatsin xla Tamapakgsin kputum Katiyatni. Kkata 1914 ni lhuwa miles xʼanankgo tiku xlichuwinankgo Dios, pero lata septiembre kata 2014 asta agosto kata 2015 takgatsinit liwaka akgtsayan millones tiku lichuwinankgo Dios. Chu chuntiya xatapaxuwan naklichuwinanaw Dios asta akxni Jehová nawan pi nialh naklichuwinanaw.

• Kamakgtayakan tiku tapakgsinikgo Tamapakgsin xalak Katiyatni. Xtatayananin Jehová lu lhuwa kaputsastalanikgonit tiku pulalinkgo amakgapitsi takanajla chu mapakgsinanin. Makgapitsi, asta kamasputuputunkgonit. Pero, Jehová putum kilhtamaku kakuentajtlawanit putum xkachikin. Chu lhuwa tlajanankgonit kxlakatin mapakgsinanin, la tuku tlajaka kTribunal Supremo xalak Estados Unidos chu kTribunal Europeo de Derechos Humanos, limasiya pi Jehová chuntiya kinkamakgtayaman.

• Makxtum lakgo putum latamanin. Wa xTamapakgsin Dios makxtum katlawanit latamanin tiku tanu tanu la stakkgonit, xkachikinkan chu xtachuwinkan chu kamakgtayanit natayanikgo putum taʼakglhuwit. Mark Sanderson wa: «Uma akgtum milagro nema kajwatiya Jehová tlan tlawa». Chu na wa pi putum tiku xwilakgolh ktamakxtumi akgtum talakgalhaman xlakata lu xlakaskinka xwanit.

Serie Xʼamigo Jehová kawanti.

Atanu taʼakgchuwin, wa lichuwinalh umakgolh videos nema akgtiy kata la tsukulh taxtu. Pulana, tala Sanderson masiyalh akgtum video niku kakgalhskinka laktsu kamanan xla putum katiyatni, nema lichuwinankgolh tuku xkatsinikgonit. Xlakata lakatanks chu lu xmakgkatsikgo tuku wankgolh kamanan, lakgchalh kxnakujkan tiku xwilakgolh ktamakxtumit.

Alistalh, wanka pi taxtulh xasasti video nema wanikan «Jehová namakgtayayan ni napekuana», nema 12 minutos makgapala chu masiya tuku titaxtulh aktsu tsumat israelita tiku ni pekualh akxni litachuwinalh xlakata Jehová xpuskat Naamán (2 Reyes 5:​1-​14). Uma video wilika kjw.org lunes 6 xla octubre kata 2014, chu tlawakanit k20 tachuwin.

Aplicación JW Language.

Tala Sanderson wa pi taxtulh xasasti aplicación xlakata teléfonos, computadoras chu tabletas, nema kkamakgtaya tiku katsiniputunkgo akgtum tachuwin xlakata tlakg nakalitachuwinankan Dios. Uma aplicación kgalhi liwaka 4,000 letras chu 18 frases ktanu tanu tachuwin. Chu lakkaxwilimaka xlakata tlakg namaliwakakan letras chu frases ktanu tanu tachuwin chu tuku tlan wankan akxni lichuwinankan Dios.

JW Broadcasting.

Tiku anta xwilakgolh kaks lilakawankgolh akxni makatsininanka pi nawilikan xasasti canal ktelevisión xla xtatayananin Jehová nema tlan akxilhkan kʼInternet. Kajku litsakgsamaka ktachuwin inglés. Niku pulalinamaka kBrooklyn (Nueva York, Estados Unidos), uma canal natawila videos, tatlakgni chu talikgalhtawakga Biblia la akgtum drama. Nachuna, akgatunu papaʼ tlan naʼakxilhkan programa especial nema namatitaxti chatum Kgolotsin tiku Pulalinankgo o xmakgtayanakan.

Natalan tlan akxilhkgolh tsinu tuku nataxtu kprograma nema namatitaxti tala Stephen Lett, Kgolotsin tiku Pulalinankgo, nema lichuwinan taskujut nema tlawaka xlakata uma canal. JW Broadcasting tsukulh taxtu 6 xla octubre kata 2014 chu tlan akxilhkan anta tv.pr418.com.

«Tamapakgsin: akgtum ciento kata chu tuku tlawanit.»

Samuel Herd, Kgolotsin tiku Pulalinankgo, wa tiku lichuwinalh kʼuma video la xTamapakgsin Dios makgtayananit tlakg liwana nalichuwinankan Dios. Uma video limin fotos xala makgasa, tuku matitaxtika chu tuku kaʼakgspulanit xtatayananin Jehová tiku makgasa lichuwinamakgolh Dios. Na lichuwinalh la xtlawakgo akxni xlichuwinankgo Dios, la xtlawakan chu la klakalhuwa xʼakxilhkan «Foto-Drama de la Creación», la xmaklakaskinkan gramófonos chu tarjetas xla testimonio, akxni xtatlawankan pancartas chu putlaw nema xlinkgo laklanka puʼakgchuwin nema xmatitaxtikgo taʼakgchuwin. Nachuna, lichuwinalh escuelas bíblicas nema tsukuka tlawakan xlakata nakamasiyanikan la nalichuwinankgo Dios.

¿La litamakgtayayaw akxni lilakpuwanaw tuku tlawanit Tamapakgsin kʼuma akgtum ciento kata? Tamapakgsin tlakg xlikana akxilhaw chu lipaxuw kgalhkgalhiyaw tuku natlawa kilhtamaku nema aku mima.

Tatlakgni nema limalankikan Jehová.

Tiku anta xwilakgolh lu paxuwakgolh akxni David Splane, Kgolotsin tiku Pulalinankgo, wa pi folleto Kakilhtliniw Jehová nalakkaxwiliparakan. Xlakata tatlakgni lu xlakaskinka akxni kakninaniyaw Jehová, uma folleto natlawakan nema tlakg makgapala. Kmakni xtachuna nawan la xasasti Biblia, chu xpáginas xkilhpan xaplata namanikan.

Tala Splane na makatsininalh pi nawiliniparakan amakgapitsi xasasti takilhtlin. Pero, ni nakgalhkgalhiyaw asta akxni naʼimprimirlikan xasasti takilhtlin xlakata nalikilhtliyaw, nawilitilhakan kjw.org akxni nataxtutilha xasasti.

Anta kilhtlika akgtutu xalaksasti takilhtlin, nema familia Betel xmakgatawakgakgonita ama semana. Tala Splane pulalilh coro nema kilhtlilh ¡Kamilh xTamapakgsin Dios!, nema tlawaka xlakata makgatsilh akgtum ciento kata Tamapakgsin. Alistalh tiku anta xwilakgolh na takilhtlikgolh coro. Alistalh, na kilhtlika xasasti takilhtlin Kakilamaxkiw litliwakga chu ni nakpekuanaw.

Entrevista.

Gerrit Lösch, Kgolotsin tiku Pulalinankgo, matitaxtilh akgtum grabación niku kgalhskilh kgalhtutu tamakgaxtokgat nema akglhuwata kata skujmakgolh kBetel. Lichuwinankgolh lhuwa tuku talakgpalinit chuna la titaxtunit kata, nema limasiya pi xkachikin Dios chuntiya lhuwa tuku tlawatilhama. Tala Lösch wa pi Biblia xlichuwinanita pi tlakg tlan tuku xʼama anan kxkachikin Jehová (Isaías 60:17).

«Wi tuku o wi tiku xkilhchanima.»

Tala Splane lichuwinalh kxtaʼakgchuwin tuku xlakata kkilikgalhtawakgakan nialh talichuwinan wi tuku o wi tiku xkilhchanima.

Makgasa xwankan pi lhuwa xlakskujnin Dios xala makgasa xkilhchanima kstalaninanin Cristo xala uku. Nachuna xlakpuwankan pi atsinu ni putum tuku lichuwinan Biblia xkilhchanima tuku xʼama tlawakgo xtatayananin Jehová xala uku. Xlikana pi lu tlan xwanit nakalikgalhtawakgayaw xlakata uma. Pero ¿tuku xlakata klikgalhtawakga nialh lichuwinankan pi wi tuku o wi tiku xkilhchanima?

Xlikana pi Biblia wi tiku lichuwinan pi wi tuku kilhchanima chu tuku lanit wi tuku tlakg xlakaskinka kilhchanima. Akxni Tatsokgni masiya pi wi tuku kilhchanima, xatapaxuwan makgamakglhtinanaw. Tala Splane wa: «Komo Biblia nitu wan, nachuna akinin nitu nawanaw». Wa xlakata, ni kiliputsatkan komo wi tuku kilhchanima. Komo chuna natlawayaw, nialh katikatsiw tuku xlakaskinka kinkamasiyaniyan Biblia, maski tiku naʼankgo kʼakgapun o nalatamakgo kkatiyatni (Romanos 15:4). a

«¿Tlan wix skgalalh natawilaya?»

Kʼuma taʼakgchuwin, tala Lett matitaxtilh tuku xasasti taʼakgatekgsa xla parábola xla 10 laktsuman (Mateo 25:​1-​13). La uku chuna akgatekgsaw uma parábola: litatawilat wa Jesús, chu laktsuman wa tiku kalaksakkanit naʼankgo kʼakgapun (Lucas 5:​34, 35; 2 Corintios 11:2). Parábola lichuwinan xaʼawatiya kilhtamaku chu tuku naliʼakgasputa klanka takatsanajwat. Akxni lichuwinalh kgalhkitsis laktsuman xalaktontas, Jesús ni wamputulh pi tiku xkalaksakkanit xʼamakgolh makgxtakgo chu xkalaksakparaka atanu. Wata kaj xmastama tastakyaw. Chatunu tiku kalaksakkanit wi tuku nalaksakkgo: liwana natakaxkgo chu skgalalh natawilakgo chuna la kgalhkitsis laktsuman xalakgskgalalan, o namakgxtakgkgo la kgalhkitsis laktsuman xalaktontas.

Chuna la lichuwinankaja kʼuma taʼakgchuwin, ni kaputsaw tuku kilhchanima pulakatunu uma parábola. Wata kaʼakxilhwi tuku kinkamasiyaniyan uma. Kimputumkan, maski tiku naʼankgo kʼakgapun o «atanu borregos», kaliskujwi xlakata namakaxkgakgenanaw chu skgalalh natawilayaw (Juan 10:16, TNM; Marcos 13:37; Mateo 5:16). Niti la katitlawalh kimpalakatakan tuku kinkalakgchanan. Chatunu kstalanina Cristo “nalaksaka latamat”. ¿La natlawa? Skgalalh natawila chu xatapaxuwan nalichuwinan Dios (Deuteronomio 30:19).

«Parábola xla talentos.»

Lakgchalh, tala Anthony Morris, Kgolotsin tiku Pulalinankgo, kamakgtayalh naʼakgatekgskgo tiku xʼankgonit xlakata parábola xla talentos (Mateo 25:14-​30). La uku akgatekgsaw pi malana (Jesús) tiku nakamaxki tuku kalakgchan kskujnin (tiku naʼankgo kʼakgapun chu ni makgxtakgolh akxni xlamakgolh kKatiyatni) kilhtamaku nema aku mima, uma wamputun, akxni namin chu nakamaxki latamat kʼakgapun nema ni sputa. Akxni wa tuku xʼama akgspula ni xatlan chu xalhkitit skujni, Jesús ni wamputulh pi lhuwa tiku naʼankgo kʼakgapun namakgxtakgkgo. Wata xkamaxkima uma tastakyaw: pi skulujwa xwankgolh chu tlan tayat xkgalhikgolh.

¿Tuku kinkamasiyaniyan uma parábola? Malana wi tuku lu xlakaskinka kalakgayawalh kskujnin. Nachuna, Jesús wi tuku lu xlakaskinka kalakgayawanit kskujnin: nalichuwinankgo Dios chu namakgalhtawakgenankgo. Xla lakaskin pi kimputumkan namakgtlawayaw uma taskujut, chuna la tlan matlaniyaw. Akxni xmasputumaja xtaʼakgchuwin, tala Morris kawanilh pi lu tlan pi xatapaxuwan la kskujmakgolh xlakata Tamapakgsin.

«¿Tiku natalachipa xkachikin Dios?»

Chuna xwanikan uma xaʼawatiya taʼakgchuwin, nema matitaxtilh tala Geoffrey Jackson, Kgolotsin tiku pulalinankgo, tlawalh pi xkatsiputunkgolh tiku xwilakgolh. Lichuwinalh tuku nakatlawani Gog de Magog xkachikin Dios (Ezequiel 38:14-​23).

Xapulana xlakpuwankan pi Gog wa Satanás akxni tamakxtukancha kʼakgapun. Pero, tala Jackson wa pi uma tlawa pi naʼanan lu xlakaskinka takgalhskinin. Akgtum liʼakxilhtit, Jehová wanit pi akxni Gog xʼamaka masputukan, xtaway «spitu nema wakgo liwa, xatipakgatsi spitu nema kgalhi xpakgan, chu lapanit xalak kakiwin» xʼama litaxtu (Ezequiel 39:4). Jehová na wa pi «Gog chu lhuwa tiku stalanikgo» nakamaknukan Katiyatni (Ezequiel 39:11). Pero ¿tlan chuna xʼakgspulalh tiku espíritu? Satanás nalakgachinukan niku ni la tuku tlawa akgtum mil kata, niti katiwalh chu ni katimaknuka (Apocalipsis [Revelación] 20:​1, 2). Chu akxni nasputa akgtum mil kata, Satanás naxkutparakan chu «nataxtuy lakimpi naakgskgawikgo ntachixkuwitat, wa nti wilakgo lantla xlikatlanka nkatuxawat. Wa cha Gog, chu Magog» (Apocalipsis 20:​7, 8). Uma limasiya pi Satanás ni la akgskgawi Gog komo watiya litaxtu Gog.

Tala Jackson lichuwinalh pi Gog xla Magog nema lichuwinalh Ezequiel ni wa kilhchanima Satanás, wata xliputum laklanka kachikin nema namasputuputun xkachikin Dios kilhtamaku nema aku mima. Nachuna, tasiya pi tuku natlawa Gog watiya tuku tlawa «mapakgsina xalak norte» chu tuku natlawakgo «reyes xala katiyatna» (Daniel 11:40, 44, 45; Apocalipsis 17:12-14; 19:19).

¿Chu tiku «mapakgsina xalak norte»? Kilikgalhkalhitkan xlakata nakatsiyaw. Akxni akxilhaw la takgatekgsa tuku aku nala nema wankanit, matliwakglha kintakanajlakan. Xkachikin Dios ni pekuanikgo tuku nakatlawani Gog xla Magog, katsikgo pi akxni chuna nala, Gog namakgatlajakan chu namasputukan. Chu akinin putum kilhtamaku nalatamayaw. b

Tuku lisputli.

Tala Sanderson makatsinalh pi edición revisada xla Traducción del Nuevo Mundo na xʼamaka tlawakan xʼaktsina. Nachuna wa pi xlakkaxwilimaka xlakata nagrabalikan Biblia. Lata chatunu tiku kalichuwinan Biblia tanu tanu tiku nachuwinankgo. Umakgolh grabaciones nakawilitilhakan kjw.org chu nalimatsukikan libro xla Mateo.

Wanka pi texto xla kata 2015 wa Salmo 106:1, Traducción del Nuevo Mundo: «Kapaxtikatsinitit Jehová, xlakata xla tlan likatsi». Wa xlakata, tala Sanderson kawanilh tiku xwilakgolh pi chali chali xputsakgolh tuku xlipaxkatkatsiniputunkgolh Jehová.

Xlakata xmaʼakgasputukgolh tamakxtumit, kgalhtujun tiku tapakgsikgo Lakgkgolotsin tiku Pulalinkgo xtaskujutkan xla xtatayananin Jehová akxtum takilhtlikgolh coro xlakata putum xkatakilhtlikgolh takilhtlin nema wanikan Mintukuwani Jehová.¡Chuna lu stlan limaʼakgasputuka uma lu xlakaskinka tamakxtumit!