«La akgtum xpaskwa familia.» Wa uma wanikan periódico Frankfurter Rundschau. Putum tiku anta xwilakgolh nachuna lakpuwankgo.

Chuna wa Karla tiku xalak Puerto Rico: «Kimamakgkatsinikgo la kkinchik».

Chuna wa Sara tiku xalak Australia: «Xtachuna la xakkalakgapaxialhnalh kifamilia, kaj man pi kʼatanu país».

¿Tuku xlakata chuna xmakgkatsi? Xlakata anta xwi tamakxtumit niku xtamakxtumikgonit xala lhuwa países xla xtatayananin Jehová, nema tatlawalh anta Commerzbank-Arena de Fráncfort del Meno (Alemania) 18 asta 20 xla julio kata 2014. Kilakgolh atsinu ni 37.000 latamanin.

Tuku xtalakaskin pi putum tiku xwilakgolh xkatsinikgolh tuku xalak Biblia. Kprograma tamatitaxtilh takgalhtawakga xalak Biblia, tatlin, oraciones, akgtiy dramas nema takilhtinit kBiblia chu takgchuwin nema makgtayanan xtakilhtinit kBiblia.

Tiku xwilakgolh ktamakxtumit xtatayananin Jehová xalak Alemania chu 3,000 tiku xalak Australia, Estados Unidos, Gran Bretaña, Grecia, Líbano, Serbia chu Sudáfrica. Nachuna xwilakgolh 234 xtatayananin Jehová xalak 70 países tiku tanu tanu la lakskunanimakgolh Dios la misioneros chu xakchan kilhtamaku.

Atsinu ni putum tamatitaxtilh programa kʼInternet, 19 kʼAlemania chu kSuiza. Tiku tlan akxilhkgolh chu kgaxmatkgolh programa 204,045 latamanin.

Anta kFráncfort, programa tamatitaxtilh kʼalemán, inglés chu griego. Kʼalakatanu tamakxtumit, taʼakgchuwin tamatitaxtilh 17 tachuwin, chuna la, árabe, chino, tamil, turco, chu akgtiy tachuwin señas.

Maski xtatayananin Jehová tanu la chuwinankgo chu lakatanu país niku xalanin chu la xtalismaninkan pero nitu tapapitsikgonit. Tapaxkit wa tuku tlawa pi makxtum natawilakgo (Juan 13:34, 35). Lalikatsini la xaxlikana linatalan.

Tobías tiku xalak Gran Bretaña wa: «Kakxilhnitawa pi kifamiliajkan xalak lhuwa países. Nitu anan tuku nakinkamapapitsiyan».

Davianna xalak Puerto Rico wa: «Kkalakgapasli xtatayananin Jehová tiku xminkgonit liwaka 20 países. Nitu atanu tuku litasiya pi tuku kinkamamakxtumiyan wa pi kpaxkiyaw Jehová chu makgapitsin».

Malcom tiku xalak Australia wa: «Xtatayana Jehová klitaxtulh kʼakgtum aktsu kachikin xalak Australia. Putum kilhtamaku xaklikgalhtawakganit artículos chu xakakxilhnit videos xlakata kinatalankan xlikalanka katiyatni. Unu kkatsinit tuku xlikana wamputun makgtapakgsikan kʼuma familia. Kintakanajla tatliwakglhnit.»

Xtatayananin Jehová xalak 58 congregaciones xalak Fráncfort chu xtalakatsunin tlawakgolh tamaskiwin chu tuku nalipaxuwakgo tiku xminkgonit ktamakxtumit xalak atanu países.

Cynthia tiku xalak Estados Unidos wan: «Lu tlan kinkalikatsinikgon chu tlan kinkamakgamakglhtinankgon. Putum kilhtamaku naklakapastakaw xtapaxkitkan, xtalakgalhamankan chu lu tlan la likatsikgo natalan.»

Simon tiku wi kʼAlemania wan: «Kaniwa xtasiya tapaxkit, xtakgaxmata pi xpaxuwamakgolh chu xtasiya xtapaxkitkan natalan. Lhuwa tuku kinkamasiyanikgoyan.»

Amy tiku xalak Australia alh asta niku tatlawalh tamakxtumit xla wa: «Tuku xtalakkaxwilinit kakgotanun limasiya pi xtatayananin Jehová ni kaj man takanajla lilakgo. Akinin kkatsiniyaw paxuwayaw chuna la xlilat.»

Tamakxtumit xalak Fráncfort wa uma kaj pulaktum la xlilhuwa analh tamakxtumit niku xtamakxtumikgonit xala lhuwa países nema tatlawalh kʼakgnajatsa países xlikalanka katiyatni.

Akxni kgalhskinka la makgkatsilh chatum tiku kilalh lanka tamakxtumit, xla kgalhtinalh: «Kalakpuwanti pi lakgapasa chatum mi familia, akgtum liʼakxilhtit, chatum tala, tiku ni xkatsiya pi mintala. Chu akxni lakgapasa, tlan namakgamakglhtinanan kxchik chu kxnaku. ¿Ni xlikana pi uma lu lipaxuwaya? Chu kalilakpuwanti uma tapaxuwan lata 37,000 tiku kilakgolh. Chuna kmakgkatsilh unu».