Akglhuwa miles latamanin kilakgolh ktamakxtumit nema tatlawa akgatunu kata número 128 xla Watch Tower Bible and Tract Society of Pennsylvania. Anta kgaxmatkgolh lakwan tamakatsin nema matliwakglhnan chu lakswan xlakata Mateo 24:45-47.

Tatlawalh 6 xla octubre kata 2012, max 5,000 latamanin kilakgolh uma tamakxtumit chu matsamakgolh Salón de Asambleas xalak Jersey City (Nueva Jersey, Estados Unidos). Nachuna, uma tamakxtumit tamatitaxtilh anta kxʼoficinas anta Brooklyn, Patterson chu Wallkill (Nueva York), nachuna ksucursal xalak Canadá, chu uma tlawalh pi tlan xtamakxtumikgo 10,000 latamanin tiku lipaxuwakgolh.

Anthony Morris, tiku makgtapakgsi Lakgkgolotsin tiku Pulalinkgo xTatayananin Jehová tiku pulalilh tamakxtumit, kamalakapastakalh makgapitsi tamakxtumit nema tamakxtumit pulana xtatlawa tuku lu tlan tatlawalh. Maski tiku xwilakgolh.

Tatlawa Pukgalhtawakga xla xTatayananin Jehová.

Kʼuma video tasiyalh la xlilhuwa tatlawama pukgalhtawakga kpaíses niku ni lu anan tumin. Lata akgkututu kata nema titaxtunit, tiku tlawakgo Pukgalhtawakga xla xtatayananin Jehová kʼuma país tlawakgolh 25,402 pukgalhtawakga, nema wamputun pi tlawaka akgkitsis akgatunu kilhtamaku. Putum uma tatlawalh xlakata tumin nema xatapaxuwan mastakgo xtatayananin Jehová xlikalanka katiyatni. Nachuna, akxni wi tuku masputunan, umakgolh grupos kamakgtayakgo akxni maklakaskinkgo akxni titaxtukgo tuku nitlan chu kakaxtlawanikgo xchikkan chu xpukgalhtawakgakan.

Laklanka tamakxtumit nema lu xlakaskinka.

Kata 2012, xtatayananin Jehová tlawakgolh lhuwa laklanka tamakxtumit xaʼakgtutu kilhtamaku chu tiku tamakxtumikgolh lhuwa países xminkgoyacha. ¿Tuku ni xtachuna xla laklanka tamakxtumit chu klaklanka tamakxtumit niku tamakxtumikgo xalak lhuwa países kata nema titaxtulha?

Video lichuwinalh sucursales nema kamakgamakglhtinankgolh chu ni wa kalinkgolh, tiku putsakgolh niku natamakgxtakgkgo, ni wa kalilh chu ni wa kamaxkilh tuku nawakgo semana nema tatlawalh tamakxtumit. Akgatunu laklanka tamakxtumit nema tatlawalh max tamakxtumikgolh 1,500 latamanin xalak akgatunu país.

Xtatayananin Jehová xalak akgatunu país niku katlawaka tamakxtumit chu tiku xminkgoyacha xalak atanu país lhuwa kilhtamaku kgalhikgolh xlakata nalatachuwinankgo akxni wayankgolh, lakgapaxialhnankgolh niku lu xlakaskinka nachuna lichuwinankgolh Dios. Video wampara: «Asta la uku putum ktamakxtumit nema lu xlakaskinka limasiyakan pi tuku kgalhikgo wa tapaxkit».

Tiku xwilakgolh ktamakxtumit lu paxuwakgolh akxni kgaxmatkgolh pi chuntiya natlawakan laklanka tamakxtumit nema lu xlakaskinka xla xtatayananin Jehová kmakgapitsi kachikinin xlikalanka katiyatni.

Atanu tuku na lichuwinanka wa uma:

Entrevistas.

Kgalhtutu tiku pulalinkgo sucursales chu xpuskatkan, komo akxtum xtlawaka la putum kilhtamaku skujnanimakgolh Dios kichan 342 kata, lichuwinankgolh la Jehová kamakgtayanit xlakata namakgantaxtikgo tuku kalakgayawakanit.

Richard Kelsey, tiku pulalin sucursal xla Alemania, wa pi Escuela niku ankgo Tiku Pulalinkgo Betel chu xLakpuskatinkan kamasiyanilh xlakata «putum kilhtamaku nakgalhakgaxmatkgo tuku wan Jehová». Jehová chatum Tlat tiku lu paxkinan chu lakaskin pi tlan kakinkakitaxtunin. Tala Kelsey wa: «Xla lakaskin pi putum kilhtamaku kalatamaw wa xlakata kinkakuentajtlawayan». Uma escuela kinkamasiyaninitan xlakata tiku pulalinkgo sucursal chuntiya na napaxkinanaw la Jehová kinkawilinin liʼakxilhtit.

Linda Johansson wanika pi xʼalh kʼEscuela Bíblica de Galaad xla Watchtower kata 1958. Uma kilhtamaku xkgalhi akgtiy kata aitat lata xtamununit chu kaj akgtum kata lata xtamakgaxtokgnit. Tala Johansson wan: «Akxni kakxilhli pi tiku xwilakgolh kʼuma clase tlakg tliwakga kgalhikgo xtakanajlakan chu makgasa la kskujnanimakgolh Dios, kajwatiya klakpuwa: “Ni kilakgchan unu naktawila”».

Maski chuna, uma ni machokgolh tala Johansson, akxni sputli xclase, xla chu xchixku kamalakgachaka kMalaui la misioneros. Akxni xkgalhsputnita la xkaputsastalanikanit xtatayananin Jehová kʼuma país. Tala tsukulh makgalhtawakge chatum puxku tiku na xkaputsastalaninit xtatayananin Jehová. La uku, xpuskat uma chixku, xkgawasa chu xtsumat na xtatayananin Jehová.

Atanu la tlan lichuwinankan Dios niku titaxtukgo lhuwa latamanin.

Chatum superintendente viajante xla xtatayananin Jehová xalak Nueva York chu kgalhtati tiku kilakgolh kʼEscuela niku kamasiyanikan xalak Biblia tiku Tamakgaxtokgnit lichuwinankgolh la tlan kakitaxtuninit xlakata lichuwinamakgolh Dios niku lhuwa titaxtukgokan klaklanka kachikinin.

Klaklanka kachikinin niku lhuwa titaxtukgokan kawilikanit mesas niku wilikan likgalhtawakga chu atanu tlan malakxijkan. Anta, xtatayananin Jehová tiku putum kilhtamaku skujnimakgolh katachuwinankgo tiku titaxtukgo, tiku tlan kaskinikgo likgalhtawakga, nakatlawanikgo takgalhskinin xlakata Biblia chu skinkgo kakamakgalhtawakgeka.

Klhuwa kachikinin xalak Nueva York, kChicago chu kLos Ángeles, xtatayananin Jehová maklakaskimakgolh uma xlakata tlakg lhuwa latamanin nakatsikgo xlakata Jehová. Kajku akgtum kata, max tachokgokgolh 2,700 latamanin anta niku xkawilikanit likgalhtawakga xlakata naskinkgo nakamakgalhtawakgekan.

Kilhtlikgo kamanan.

Atsinu ni putum tiku xtamakxtumikgonit, tasakgolh akxni kgaxmatkgolh 17 laktsu kamanan akxni likilhtlikgolh takilhtlin 120 xla libro Cantemos a Jehová, nema wanikan «Jehová bendice al que escucha y obedece» (canción 120).

Alistalh, tamatitaxtilh akgchaxan taʼakgchuwin nema matitaxtikgolh Jackson, Lösch, Pierce, Herd, Lett chu Splane, lakgkgolotsin tiku makgpulalinkgo xtatayananin Jehová. Kʼumakgolh taʼakgchuwin talichuwinalh tuku wamputun xtachuwin Jehová nema wi kMateo 24:45-47 xla Traducción del Nuevo Mundo. Anta wan:

«¿Tiku uma, xaxlikana, skujni xalipaw chu xaskgalala, tiku xmalana lakgayawalh amakgapitsi kskujnin, xlakata nakamaxki xtaway kxkilhtamaku? ¡Xatapaxuwan nawan uma skujni akxni namin xmalana chu naʼakxilha pi tlawama xtaskujut! Xlikana kkawaniyan: Nalakgayawa putum tuku kgalhi.»

Kʼumakgolh taʼakgchuwin mastaka xtakgalhtin umakgolh takgalhskinin:

¿Tukuya kilhtamaku wililh Jesús «skujni xalipaw chu xaskgalala» xlakata nakakuentajtlawa amakgapitsi?

Kiliʼakxilhatkan tuku pulana lichuwinalh Jesús anta kcapítulo 24 xla Mateo. Versículos nema wilakgolh klista kgantaxtukgo akxni kinkatawilan nawan Cristo, «xlisputni kakilhtamaku» (versículo 3).

• «Ntakatsanajwat xla yama nkilhtamaku» (versículo 29).

• «Ntachixkuwitat xla yuma nkilhtamaku» (versículo 34).

• «Nkilhtamaku nchuna nalay, chu xatu hora nawan» (versículo 36).

• «Akxni namin mimPuchinakan» (versículo 42).

• «Xkam nchixku, namin akxni yama hora ni kgalhkgalhipatit» (versículo 44).

Wa xlakata, «skujni xalipaw chu xaskgalala» max tsukulh akxni xtitaxtunita 1914 akxni kinkatatawilan Cristo.

Nachuna, Jesús wa pi «skujni» xʼama tasiya akxni tlan xkgalhskininanka: «¿Tiku xaxlikana, skujni xalipaw chu xaskgalala?». Max niti xtlawalh uma takgalhskinin kxapulana siglo, xlakata xʼapóstoles Jesús xkamatlawi milagros espíritu santo (1 Corintios 14:12, 24, 25). Pero, maski apóstoles chu amakgapitsi kstalaninanin Cristo xalak pulana siglo kamaxkika espíritu santo, ni xlakan xwankgonit «skujni xalipaw chu xaskgalala» nema kalichuwinalh Jesús.

Wa xlakata tlan nawanaw pi Jesús wililh «skujni xalipaw chu xaskgalala» xlakata nakakuentajtlawa «amakgapitsi kskujnin» akxni kinkatawilan, «xlisputni kakilhtamaku».

«¿Tiku uma, xaxlikana, skujni xalipaw chu xaskgalala?»

Jesús ni xlichuwinama kaj chatum lataman, wata chalhuwa «skujni», tiku makxtum xʼamakgo skujkgo la akgtum makni. Jesús wa pi uma skujni 1) xʼama kakuentajtlawa «amakgapitsi kskujnin» malana chu 2) xʼama kamaxki amakgapitsi skujnin «xtaway kxkilhtamaku».

Lata kata 1919, putum kilhtamaku ananit kstalaninanin Cristo tiku naʼankgo kʼakgapun anta niku pulalinkan xtaskujut xtatayananin Jehová xlikalanka katiyatni. Umakgolh skujnin pulalinkgonit la talichuwinama Dios xlikalanka katiyatni chu xlakan lakkaxwilikgonit chu mastakgonit liwat xla takanajla. Chu akglhuwata kata, katamalakxtumikan Lakgkgolotsin tiku Pulalinkgo xTatayananin Jehová.

Lhuwa tuku limasiya pi «skujni xalipaw chu xaskgalala» wilika kata 1919 xlakata nakakuentajtlawa amakgapitsi kskujnin Jesús. Umakgolh skujnin wa natalan tiku naʼankgo kʼakgapun chu skujmakgolh niku pulalinkan xtaskujutkan xtatayananin Jehová xlikalanka katiyatni kilhtamaku akxni kinkatawilan Cristo chu lakkaxwilikgo chu mastakgo liwat xla takanajla. Akxni makxtum skujkgo la Lakgkgolotsin tiku Pulalinankgo, litaxtukgo «skujni xalipaw chu xaskgalala».

¿Tiku «amakgapitsi skujnin»?

Jesús lichuwinalh «amakgapitsi skujnin» namakglhtinankgo «xtaway kxkilhtamaku». Putum tiku xaxlikana kstalaninanin Cristo kgalhikgo xtawaykan xla takanajla wa mastakgo «skujni xalipaw chu xaskgalala». Wa xlakata, putum kstalaninanin, la tiku kalaksakkanit naʼankgo akgapun nachuna tiku «amakgapitsi borregos», wa «amakgapitsi skujnin» (Juan 10:16).

Akxni xlichuwinanita tiku akgchuwinalh xlakata tuku xwani Jesús, makgapakgxnankgolh tiku xtamakxtumikgonit. Lhuwa tiku anta xwilakgolh lhuwa paxtikatsinikgolh xlakata Jesús xkaliʼakxilha la «amakgapitsi skujnin».

¿Tuku kilhtamaku Jesús kaliyawalh skujni xalipaw chu xaskgalala lakgayawalh «putum tuku kgalhi»?

Jesús lichuwinalh pi tiku «xmalana, akxni nachin» (wamputun, «minit»), naliyawa kskujni «putum tuku kgalhi». ¿Tuku kilhtamaku nachin Malana, wamputun, Jesús?

Uma tachuwin nema akxni tamatitaxti atanu ktachuwin «akxni chin» chuna ktachuwin griego érkjomai. Kversículos 42 chu 44 kxcapítulo 24 tamatitaxti ktachuwin érkjomai chuna «min». Kʼumakgolh versículos, Jesús wamputun pi akxni namin la tiku xlakkaxtlawana taʼakglhuwit akxni xmilh lanka takatsanajwat (Mateo 24:30; 25:31, 32).

Xlakata tuku Jesús lakgayawalh «skujni» xlakata «putum tuku kgalhi» uma nakgantaxtu kilhtamaku nema aku mima. Chuna, Jesús nalakgayawa uma akxni namin lanka takatsanajwat.

¿Tuku kilhchani «putum tuku kgalhi» Jesús?

Jesús wa: «Xlipaks limapakgsin, kintamaxkinit nakkgalhiy nkakgapun, chu nkatiyatna» (Mateo 28:18). Tuku «putum tuku kgalhi» Jesús ni kajwatiya kilhchanima tuku wi kKatiyatni; nachuna Tamapakgsin xalak Akgapun (Filipenses 2:9-11).

Wa xlakata, Jesús nakamaxki tuku tlan «skujni xalipaw chu xaskgalala» chatunu chatunu nakamalakastakwanikan anta kʼakgapun. Wa xlakata, nakamaxkikan limapakgsin la mapakgsinanin xlakata putum tuku kgalhi la kʼakgapun chu kKatiyatni. Uma tasikulunalin tuku namakglhtinankgo putum xatalaksakni kstalaninanin Cristo tiku ni makgatsankgananikgo (Lucas 22:28-30; Apocalipsis [Revelación] 20:6).

Xaʼawatiya taʼakgchuwin mastalh tamakatsin. Akxni likgalhtawakgalh tachuwin nema wa Jesús anta Mateo 28:20, tala Splane wa: «Wi atanu tuku tlan nalipawanaw, chu anta tekgsaw ktexto xla kata 2013. ¿Niku wi? Josué 1:9, wan “Ni nataxlajwaniya chu tliwakga kawanti. [...] Jehová miDios tawilan anta niku napina”.»

Alistalh, akxni makgalhsputulh xtaʼakgchuwin, tala Morris kgalhskininalh: «¿Tuku natamatitaxti kata nema mima? Tuku natamatitaxti ktamakxtumit nema natatlawa, 5 xla octubre kata 2013, natamatitaxti kSalones de Asambleas xalak Estados Unidos chu amakgapitsi tiku chuwinankgo inglés».

Uma tamakxtumit kaj natamatitaxti ktachuwin inglés chu ni katitamatitaxtilh kʼatanu tachuwin.

Lhuwa kamatliwakglhli uma tamakxtumit, tiku xwilakgolh kʼuma tamakxtumit xatapaxuwan litlikgolh tatlin 116 klibro Cantemos a Jehová, wanikan «Tlakg tasiya xkgakganat». Xaletra tsinu wan:

«Jehová laksakli skujni xatalipaw

Tiku kinkamawiyan kxkilhtamaku.

Taxkgakganat liwana tasiya,

Liwana kamaxkgakge kxkachikin.»