Sábado 5 xla octubre kata 2013 tatlawalh tamakxtumit xaʼakgatunu kata número 129 xla Watch Tower Bible and Tract Society of Pennsylvania. Tamakxtumikgolh 257,294 latamanin xalak 21 países chu territorios akxilhkgolh tamakxtumit akxni tamatitaxtilh. Ni lhuwa xwilakgo niku tatlawalh tamakxtumit chu atsinu ni putum akxilhkgolh kʼInternet. Sábado chu domingo, amakgapitsi xtatayananin Jehová na kamatitaxtinika uma tamakxtumit. Tamakxtumikgolh 1,413,676 latamanin xalak 31 países chu territorios. Wa uma tlakg lhuwa tiku tamakxtumikgolh lata tsukukgonit xtatayananin Jehová. Atanu tamakxtumit nema na lhuwa kgaxmatkgoka wa nema tatlawalh 28 xla abril kata 2013 niku tlan akxilhkgolh chu kgaxmatkgolh 1,327,704 latamanin xalak México chu Centroamérica.

Kdécada 1920, xtatayananin Jehová xmatitaxtikgoya klhuwa países tuku xtalichuwinan klaklanka tamakxtumit chu xmaklakaskinkgo teléfonos chu lhuwa estaciones xla radio. Pero xlakata anan Internet, tiku la uku ankgo ktamakxtumit, asta tiku lu makgat wilakgolh, tlan akxilhkgo chu kgaxmatkgo tuku talichuwinan niku tatlawa tamakxtumit. William, chatum xtatayana Jehová tiku akxilhli tamakxtumit nema tatlawa kata kata, xʼanit kʼakgtum lanka tamakxtumit kkata 1942 anta kRichmond (Virginia, Estados Unidos) nema kteléfono tamatitaxtilh chu kʼatanu kachikin tawi tamakxtumit. Xla wan: «Nitu tuku xtachuna. Tlakg lipaxuwakan tamakxtumit akxni tlan akxilhkan».

Liwaka akgtum kata lilakkaxwilika xlakata tlan xtamatitaxtilh uma tamakxtumit. Natalan xalak lhuwa sucursales xla xtatayananin Jehová lhuwa horas litlawakgolh uma taskujut. Anta kBrooklyn (Nueva York) wilika niku napulalinkan tuku xʼama tamatitaxti. Makgapitsi tiku katsinikgo matitaxtikgo anta xwilakgo sábado chu domingo xlakata tlan xtaʼakxilhli tamakxtumit kʼakgkukitsis tanu tanu hora. Ryan, tiku makgtlawalh putum uma taskujut, lakapastaka: «Ni lu klhtataw, pero akxni kkatsiw la xlilhuwa tiku akxilhkgolh, kmakgkatsiw pi ni kaj paxkat wa kintaskujutkan».