BIBLIA KALAKGPALINILH XLATAMATKAN
«Nialh kimakgatlajalh ni xatlan tayat»
Kata akxni lakachilh: 1956
País: Canadá
Tuku xtlawa: Chatum chixku tiku chalhuwa lakpuskatin xkatalama, xaluku xwanit, chu nitlan xlimakgkatsi xlakata tuku nitlan anan kkakilhtamaku
LA XAKLAMA
Klakachilh kachikin Calgary, anta kʼAlberta (Canadá). Akxni aktsujku xakwanit kinatlatni lamakgxtakgkgolh, kintse chu akit kkaw tawilayaw kxchik kintata. Xlakan lu xkinkapaxkikgoyan chu anta lu xakpaxuwa xlakata xʼanan takaksni. Akxni klakapastaka ama kilhtamaku lu klipaxuwa.
Akxni xakkgalhi akgtujun kata, kilatamat talakgpalilh. Kintse tatamakgaxtokgpa kintlat chu kkaw latamayaw kSan Luis, Misuri (Estados Unidos). Kakxilhli pi kintlat xaluku xwanit. Akgtum kilhtamaku, akxni kkitaspitli kxasasti ki’escuela kintlat akxilhli pi makgapitsi lakgkgawasan xkiwilinikgonit chu akit nitu xakatlawaninit, kintlat lu sitsilh chu tlakg kiwilinilh ni xawa la xkiwilinikgonit. Watiya ama kilhtamaku ktsukulh katalachipa amakgapitsin.
Xlakata kintlat lu ksitsi uma xtlawa pi kintse na ksitsilh, chu ankgalhin xlakilhnikgo. Ktsukulh kwa drogas chu kuchu akxni xakkgalhi akgkawitu kata. Tlakg xaluku ktsukulh klikatsi chu ankgalhin ktsukulh katalachipa amakgapitsin. Akxni kmasputulh secundaria, xaluku xakwanit, nialh chuna xaklikatsi la xapulana.
Akxni kmakgatsilh ki’akgkutsayan kata, ktanulh k’Infantería de Marina de Estados Unidos. Akit xaluku xaklikatsiya, chu anta kkatsinilh la lamakgnikan. Akxni titaxtulh akgkitsis kata kmakgxtakgkli kintaskujut xlakata nakkgalhtawakga Psicología, chu tlan xakskujlhi kFBI. Ktsukulh kgalhtawakga k’Estados Unidos chu alistalh kCanadá.
Anta k’universidad ni tlan kinkitaxtunilh. Xakakxilha pi putum latamanin x’akstukan xlapaxkikgo. Xakakxilha pi putum tuku xʼanan nialhtu xlitaxtu, chu taʼakglhuwit nema xʼanan kkakilhtamaku nialh xʼama talakgpali. Xaklakpuwan pi ni wa latamanin tiku xʼama lakkaxtlawa tuku nitlan xʼanan.
Xlakata xakakxilha pi latamat nitu xlitaxtu, ktsukupa kwa drogas, kuchu chu kajwatiya xaklilakpuwan tumin chu talakgxtumit. Xakan kfiestas chu chalhuwa tiku xaktatalakgxtumi. Komo soldado xakwanit xakmakgkatsi pi ni tila xkintlaja, chu ankgalhin xakkatalachipa amakgapitsin. Akxni xakakxilha pi wi tiku nitlan xlikatsinima achatum, xaklakataki chu chuna xaklakpuwan pi xaktlawama tuku xaʼakgstitum. Lu xaluku xakwanit.
BIBLIA LAKGPALILH KILATAMAT
Akgtum kilhtamaku ki’amigo chu akit xakwamaw drogas kxtampin kinchik chu xakkaxtlawamaw marihuana xlakata tsekg xakstaw, chu ki’amigo kinkgalhskilh komo xakkanajlani Dios. Kwanilh: «komo wa Dios lin kuenta xlakata patinamaw kkakilhtamaku, ¡nitu kkatsiputun xpalakata!». Lichali, akxni kkalh kskuja kxasasti kintaskujut, chatum kincompañero tiku xtatayana Jehová xlitaxtu kinkgalhskilh: «¿Lakpuwana pi Dios lin kuenta xlakata anan tapatin kkakilhtamaku?». ¡Kaks klilakawa! Xlakata likgotana wa uma tuku xaklichuwinanitaw. Lu kkatsiputulh xlakata uma. Wa xlakata akgchaxan papa nema titaxtulh lhuwa tuku klichuwinaw chu xla maklakaskilh Biblia xlakata nakgalhti kintakgalhskinin nema lu xakkatsiputun xlakata latamat.
Puskat tiku xaktawi uma kilhtamaku nitu xkatsiputun xlakata tuku xakkatsinima. Kilhtamaku domingo kwanilh uma puskat pi xakkawaninit xtatayananin Jehová naminkgo kchiki xlakata nakinkalimakgalhtawakgekgoyan Biblia. Lichali akxni kkitaspitli kintaskujut, xla x’anit, chu xlinkgonit klhakgat. Ktaxtulh kinchik chu ktsukulh tasa. Nachuna, ktasaskinilh Dios xlakata xkimakgtayalh. Wa akxni niku pulana kmaklakaskilh xtukuwani Dios, Jehová (Salmo 83:18).
Akgtiy kilhtamaku alistalh ktsukulh katakgalhtawakga Biblia akgtum tamakgaxtokgat xla xtatayananin Jehová. Akxni ankgolh, ktsukulh klikgalhtawakga libro Usted puede vivir para siempre en el paraíso en la Tierra. a Akgtum katsisni klikgalhtawakgakgolh. Xlakata tuku kkatsinilh xpalakata Jehová chu xkgawasa Jesucristo, lakgchalh kinaku. Kakxilhli pi Jehová xalakgalhamanina chu na katsani akxni kinka’akxilhan pi patinamaw (Isaías 63:9). Tuku lu lakgchalh kinaku, wa pi Dios xkimpaxki chu pi xkgawasa xninit kimpalakata (1 Juan 4:10). Kakxilhli pi Jehová lu xkinkgalhkgalhinit «xlakata ni lakaskin pi wi tiku namalakgsputukan, wata lakaskin pi putum latamanin kamakgxtakgkgolh tuku nitlan tlawamakgolh» (2 Pedro 3:9). Xakmakgkatsi pi Jehová xlakaskin xaktalakatsuwinilh (Juan 6:44).
Watiya uma semana ktsukulh kan ktamakxtumit. Laklhman xaklin ki’akchixit, xak’akganunan chu xmakgapekuanan la xaktasiya, pero xtatayananin Jehová lu tlan kilikatsinikgolh, la komo chatum xfamiliajkan tiku makgasa nialh xakxlilhkgonit. Likatsikgolh la komo xaxlikana kstalaninanin Cristo. Tlan kmakgkatsilh anta, chuna la akxni xaktawila kxchik kintata, pero uma lu tlakg tlan xwanit.
Titaxtulh kilhtamaku, tuku xakkatsinima xlakata Biblia tsukulh lakgpali kilatamat. Kchukulh ki’akchixit, kmakgxtakgli talakgxtumit nema ni xlitatlawat, kuchu chu drogas (1 Corintios 6:9, 10; 11:14). Xakmakgapaxuwaputun Jehová. Chu akxni xakkatsi pi tuku xaktlawama ni tlan xwanit, ni xaklakputsanani xlakata chuntiya xaktlawalh. Wata nitlan xakklimakgkatsi chu xaklakpuwan: «Nialh ktitlawalh uma». Wa xlakata, lakapala kliskujli xlakata naklakgpali xalixkajni kintayat. Putum tuku xakkatsinima kimakgtayalh nakakxilha pi tlan kitaxtu akxni tlawakan chuna la lakaskin Jehová. Chu 29 xla julio kata 1989, akgchaxan papa lata xakkgalhtawakgama, ktamunulh chu xtatayana Jehová klitaxtulh.
TUKU TLAN KINKITAXTUNINIT
Biblia kimakgtayanit naklakgpali ni xatlan kintayat. Xapulana akxni wi tiku xkintalatlawaputun nila xakmalakgachokgo kintasitsi. Pero la uku ktlawa tuku kmatlani xlakata tlan “nakkatalalin putum latamanin” (Romanos 12:18). Uma ni ki’aktsu ktlawanit. Wata wa kimakgtayanit Jehová, xlakata lhuwa litliwakga kgalhi xTachuwin chu x’espíritu santo, tlan namakgtayakgoyan xlakata nalakgpaliya milatamat (Gálatas 5:22, 23; Hebreos 4:12).
La uku kliskuja xlakata nakmakgapaxuwa Jehová chu nakmaxki tuku tlan kkgalhi. Nialh kwa droga, nialh xaluku klikatsi chu nialh ktlawa talakgxtumit nema ni xlitatlawat. Chu na kkamakgtaya amakgapitsin nalakgapaskgo Jehová. Akxni ni makgas xaktamununit, kalh klatama atanu kachikin niku tlakg xtalakaskin xlichuwinanka xtachuwin Dios. Chuna la titaxtunit kilhtamaku kalimakgalhtawakgenit Biblia lhuwa latamanin chu kakxilhnit la kalakgpalininit xlatamatkan. Chu atanu tuku na lu kimakgapaxuwanit wa pi kintse xtatayana Jehová litaxtu, tuku namakgtayalh wa pi akxilhli la klakgpalilh kintayat chu kilatamat.
Kkata 1999 kmasputulh akgtum curso kSalvador nema la uku lilakgapaskan Escuela xla Tiku lichuwinankgo xTamapakgsin Dios. Anta kimasiyanika tlakg tlan naklichuwinan Dios chu tlakg tlan nakkuentajtlawa chu nakmasiya kcongregación. Watiya uma kata ktatamakgaxtokglhi Eugenia. La uku kinchatiykan kskujnanimaw Jehová putum kilhtamaku kGuatemala.
Nialh klipuwan, wata la uku kpaxuwa. Makgantaxtikan xtastakyaw Biblia kilakgmaxtunit chu nialh xaluku klikatsi, nialh ktlawa talakgxtumit nema ni xlitatlawat. La uku kilatamat kgalhi takaksni chu xaxlikana tapaxkit.
a La uku, xtatayananin Jehová maklakaskinkgo libro Kalipaxuwa latamat putum kilhtamaku xlakata nalimakgalhtawakgenankgo.