Chatum xtatayana Jehová xalak Sudáfrica tiku wanikan Danielle, tekgsli akgtum aktsu maleta nema xʼakgxtakgwilikanit niku stakan cape. Kmaleta xtajuma akgtum cartera niku xlimin tumin chu tarjetas de crédito. Danielle xmaspitniputun tiku xla xwanit maleta, wa xlakata putsalh niku xwi xchik uma lataman o xnúmero xteléfono, pero kajwatiya tekgsli xtukuwani chixku. Kgalhskininalh kbanco tiku xtapakgsini umakgolh tarjetas, pero ni tekgsli tiku xla. Alistalh akxilhli pi kmaleta xtajuma maktum receta xla likuchun chu marcarlilh número nema xtatsokgnit anta. Uma número xla akgtum pumakuchin xwanit chu tiku kgalhtinalh kteléfono wanilh pi xʼama maxki chixku xnúmero Danielle.

 Chixku kaks lilakawa pi xtachuwinanka chu wanika pi wi tiku xtekgsnit aktsu xmaleta chu xmaspitniputun. Akxni alh tiya, anta xkgalhkgalhima Danielle chu xtlat. Xlakan wanikgolh tuku xlakata lu putsakgolh. Wanikgolh pi xtatayananin Jehová litaxtukgo chu wa xlakata liskujkgo nalilatamakgo tuku wan Biblia chu lu xlakaskinka liʼakxilhkgo ni natatamakgxtakgkgo tuku ni xlakan (Hebreos 13:18).

 Makgapitsi horas alistalh, chixku kamalakgachanilh akgtum mensaje Danielle chu xtlat xlakata nakapaxtikatsini tuku tlawakgolh xpalakata. Katsokgnanilh: «Kkapaxtikatsiniyan xlakata kilaputsaw. Kpaxuwa kkalakgapasni. Putum kilhtamaku naklakapastaka pi lu tlan kilikatsininit, chu xatapaxuwan kmastaputun kintumin xlakata naklimasiya kintapaxtikatsinit. Kkatsi pi lhuwa tuku tlawayatit xlakata namakgantaxtiyatit taskujut nema Dios kalakgayawanitan. Tuku tlawalh Danielle limasiya pi wixin tlan likatsiyatit. Wa xlakata amakgtum kkapaxtikatsiniparayan chu Dios kasikulunatlawalh mintaskujutkan».

 Makgapitsi papaʼ alistalh, uma chixku tachuwinampa xtlat Danielle chu litachuwinalh tuku xʼakgspulanit. Xʼanit tamawanan chu tekgsli katutsu akgtum monedero. Putsalh tiku xtapakgsini uma monedero chu akxni maspitnilh wanilh tuku xlakata chuna xtlawanit. Wanilh pi nina makgas wi tiku na xmaspitninit tuku xla xtapakgsini. Wa: «Akxni tlawakan tuku tlan mimpalakata namakgpuwantiniyan na natlawaya tuku tlan, komo putum chuna xlikatsikgoka tlakg tlan xtawi kakilhtamaku».