Chatum xtatayana Jehová tiku wanikan Elisa, xlimakgalhtawakgenama Biblia kxchik chatum puskat. Akxni xmakgalhtawakgenamajku wi tiku kaj xalan chalh. Chatum sacerdote chu xpuskat lakgatlakgolh malakcha. Elisa xkgaxmatnit pi uma tamakgaxtokgat nina makgas la xninit xkgawasakan.

 Akxni Elisa kawanilh pi lu nitlan xlimakgkatsi tuku xkaʼakgspulanit, sacerdote chu xpuskat tsukukgolh tasakgo. Alistalh sacerdote wa: «¡Nila kʼakgatekgsa tuku xlakata Dios kinkaliputsananiman uma tuku lu tuwa! ¿Tuku xlakata kimakglhtilh xachastum kinkgawasa? Kgalhiya 28 kata la kskujnanima Dios chu lhuwa tuku tlan ktlawanit, ¡chu wa uma tuku kilixokgonani! ¿Tuku xlakata makgnilh kinkgawasa?».

 Elisa wanilh pi ni wa Dios xmakgninit xkgawasa. Na kalitachuwinalh talakgmaxtut, talakastakwanat chu tuku xlakata Dios masta talakaskin pi kalalh tuku nitlan. Sacerdote chu xpuskat wanikgolh Elisa pi xla xkakgalhtinit takgalhskinin nema xtlawanimakgolh Dios.

 Akgtum semana alistalh, sacerdote chu xpuskat taspitkgolh kxchik puskat tiku xmakgalhtawakgema Elisa. Ama kilhtamaku xlakan xlikgalhtawakgamakgo akgtum capítulo xla libro ¿Tuku xlikana masiya Biblia?, nema wanikan «Xaxlikana takgalhkgalhin xlakata tiku nikgonita nema xkapaxkiyaw». Uma tamakgaxtokgat na tsukulh kgaxmata tuku xlichuwinamaka.

 Titaxtulh kilhtamaku, uma tamakgaxtokgat ankgolh kʼakgtum lanka tamakxtumit xla xtatayananin Jehová anta kTiflis (Georgia) chu kaks lilakawankgolh tapaxkit nema xlalimasiyanikgo natalan. Lhuwa kata xliskujkgonit xlakata xʼanalh uma tayat kxpukgalhtawakgakan, pero ni xmatlanikgonit.