Irma lama kʼAlemania chu atsinu ni makgatsi 90 kata. Xlakata makgtiy akgspulalh tuku nitlan chu makglhuwa operarlikanit, nialhla an lichuwinan Dios kʼakgatunu chiki chuna la xtlawa xapulana. La uku, Irma katsokgnani tiku xalak xfamilia chu atanu latamanin tiku kalakgapasa xlakata nakalitachuwinan tuku xla kanajla. Lhuwa latamanin lu lakgatikgo tuku katsokgnani chu asta tachuwinankgo kteléfono xlakata nakgalhskinkgo tuku kilhtamaku nakamalakgachanipara atanu carta. Makgapitsi latamanin na tsokgnanikgo xlakata napaxtikatsinikgo chu skinikgo pi kakamalakgachanipa atanu carta. Irma wan: «Putum uma lu kimakgapaxuwa chu kimakgapuwantini chuntiya naklichuwinan Dios».

 Irma na kamalakgachani cartas tiku wilakgo niku kamakgtakgalhkan tiku linkgoya kata. Xla wan: «Chatum puskat tiku lina kata kintachuwinalh chu kiwanilh pi kincarta lu tlan mamakgkatsinilh akxni nilh xchixku. Makinit uma carta xpulakni xBiblia chu makglhuwa likgalhtawakga. Atanu puskat, tiku na nilh xchixku, kiwanilh pi kincarta tlakg makgtayalh nixawa tuku sacerdote wanilh. Lhuwa tuku xkatsiputun chu kinkgalhskilh komo tlan xmilh kilakgapaxialhnan».

 Chatum puskat tiku xlakgapasa Irma chu ni xtatayana Jehová, alh latama alakatanu chu wanilh pi xmalakgachanilh carta. Irma wan: «Puskat xmaki putum kincartas. Akxni xla nilh, xtsumat kintachuwinalh chu kiwanilh pi xlikgalhtawakganit putum cartas nema xakmalakgchaninit xtse chu kiwanilh pi na xaktsokgnilh cartas nema lichuwinan Biblia».

 Irma lu lakgati tlawa cartas xlakata nalichuwinan Dios. Xla wan: «Kskini Jehová pi chuntiya kakimaxkilh litliwakga xlakata nakskujnani. Maski nialhla kan klichuwinan Dios akgatunu chiki, ktlawa putum tuku kmatlani».