«Nikxni klakpuwa la xlilhuwa xakkama skujnani Jehová». Chuna makgkatsi Gwen, chatum tala xalak Inglaterra, tiku alh skuja kʼAlbania, akgtum kachikin niku lu talakaskin tiku nalichuwinankgo Dios. a

 Chuna la Gwen, lhuwa xtatayananin Jehová ankgonit makgtayanankgo kʼAlbania xlakata namakgtayanankgo nakamamakxtumikan «putum tuku lhuwa xtapalh xliputum kachikinin» (Ageo 2:7). ¿Tuku kamakgtayanit umakgolh natalan naʼankgo makgtayanankgo niku tlakg tamaklakaskin tamakgtay? ¿Tuku tlawakgonit xlakata tlan naʼankgo latamakgo alakatanu kachikin? ¿Chu tuku tasikulunalin makglhtinankgonit nema kamakgtayanit natayanikgo maski kgalhikgo taʼakglhuwit?

 Putum natalan tiku ankgonit makgtayanankgo kʼAlbania, chuna tlawakgonit xlakata paxkikgo Jehová chu kamakgtayaputunkgo amakgapitsin na nalakgapaskgo.

 Akxni nina xʼankgo latamakgo alakatanu, wi tuku pulana talakaskilh natlawakgo xlakata tlakg naskujnikgo Jehová, chu uma kamakgtayalh natayanikgo kaxatukawa tuku xʼamakgo titaxtukgo akxni xchankgolh kʼalakatanu kachikin. Gwen wan: «Tuku pulana ktlawalh wa pi kalh makgtayanan kʼakgtum aktsu grupo ktachuwin albanés nema xwi niku xaklama. Alistalh kkalh kʼakgtum asamblea anta kʼAlbania. Alh kilhtamaku, ktaspitpa xlakata tlakg nakkatsini tachuwin albanés, chu ni lhuwa kilhtamaku ktamakgxtakgli».

 Manuela, chatum tala xalak Italia, alh latama alakatanu kachikin akxni xkgalhi 23 kata xlakata namakgtayanan kʼakgtum aktsu congregación. Xla wan: «Kmakgtayanalh akgtati kata kʼuma congregación. Chu alistalh kkatsilh pi lu xtalakaskin tiku xlichuwinankgolh Dios anta kʼAlbania. Wa xlakata klakkaxwililh nakkan makgtayana makgapitsi papaʼ chuna la precursora».

 Chatum tala puskat tiku wanikan Federica, akxni xkgalhi 7 kata, kgaxmatli akgtum tamakatsinin xlakata Albania kʼakgtum asamblea. Xla lakapastaka: «Tala tiku mastalh tamakatsinin lichuwinalh pi kʼAlbania lhuwa latamanin tiku xkalimakgalhtawakgemaka Biblia chu lhuwa tiku xtsukukgonit ankgo ktamakxtumit. Kkawanilh kinatlatni pi akit xakamputun makgtayanan kʼAlbania. Uma lu kaks kamalakawanilh, pero kintlat kiwanilh: “Lu tlan, kalitachuwinanti Jehová. Chu komo xtalakaskin, nakgalhti mi oración”. Chu ni makgas kilhtamaku, kinkawanikan pi xakkaw makgtayananaw kʼAlbania!». Titaxtunit akglhuwata kata, chu Federica chuntiya makgtayanama kʼAlbania. La uku, xla chu xchixku, Orges, skujnanimakgo Jehová xliputum kilhtamaku.

 Gianpiero chu Gloria, akgtum tamakgaxtokgat xalak Italia, ankgolh makgtayanankgo kʼAlbania akxni Gianpiero xtajubilarlanit. Xla wan: «Kinkamanankan stakgolh kʼItalia, chu kgalhtutu ankgolh makgtayanankgo kʼalakatanu kachikinin niku tlakg xtalakaskin tamakgtay. Artículo “¿Puede usted pasar a Macedonia?”, nema taxtulh krevista la Atalaya, kinkamakgpuwantinin naktlawayaw tuku xlakan tlawakgolh. Wa xlakata, ktsukuw lilakpuwanaw tuku tlan xaktlawaw xlakata xkinkaʼakchanin kintaskgaw anta kʼAlbania».

 Xlakata tlan napina niku tlakg talakaskin tiku nalichuwinankgo Dios, Talakaskin wi tuku liwana nalakkaxwiliya (Lucas 14:28). Chu tiku ankgo latamakgo kʼalakatanu kachikinin talakaskin nalilakpuwankgo tuku naliskujkgo anta. Akgtum liʼakxilhtit, Gwen,tiku lichuwinawa, alh kxchik xtala chu anta tawilalh xlakata xmastokgli xtumin akxni xlamachaku kʼInglaterra. Sophia chu Christopher, tiku na xalak Inglaterra, lakapastakkgo: «Kstaw kimputlawkan chu amakgapitsi tuku xakkgalhiyaw. Xaklakpuwanitaw pi naktamakgxtakgaw anta kʼAlbania akgtum kata». Ni kajwatiya akgtum kata tamakgxtakgolh anta wata tlakg lhuwa kilhtamaku.

 Makgapitsi natalan tiku ankgo makgtayanankgo kʼAlbania anta tamakgxtakgo makgapitsi papaʼ, alistalh taspitparakgo kxkachikinkan xlakata naskujkgo chu namakikgo xtuminkan, chu alistalh taspitparakgo kʼAlbania. Wa uma tuku tlawakgolh Eliseo chu Miriam. Eliseo wan: «Miriam xalak akgtum aktsu kachikin xalak Italia, niku minkgo paxialhnankgo lhuwa latamanin xalak alakatanu kachikinin, wa xlakata, akxni verano ni tuwa tekgskan taskujut. Akgkitsis kata la xakmakgtayanamaw kʼAlbania, akxni xlakgchan verano akgtutu papaʼ xakkanaw kskujaw kʼItalia, chu xkinkakchaniyan tumin nema xakmastokgnitaw xlakata akgnajatsa papaʼ xakkaw latamayaw kʼAlbania».

 Natalan tiku ankgo makgtayanankgo alakatanu, talakaskin nalismanikgo tuku xasasti natitaxtukgo; pero tuku nakawanikgo chu xliʼakxilhtitkan natalan nakamakgtaya nalismanikgo tuku talakgpalilh. Sophia, tiku lichuwinawa, wan: «Akxni xchan invierno, anta kʼAlbania kchiki lu tlakg kakgawiwi xwan nixawa niku akit xaklama. Pero ktsukulh akxilha tuku klhakgakgo natalan lakpuskatin xalak uma kachikin, chu uma kimakgtayalh nakkatsi tuku tlan xaklhakgalh». Grzegorz chu Sona, akgtum tamakgaxtokgat xalak Polonia, ankgolh latamakgo kʼakgtum aktsu kachikin xalak Prizren, anta kKosovo. b Grzegorz wan: «¡Natalan xala unu lu taktujukgo, lu lakgalhamanankgo chu lu xakgalhkgalhinanin. . .! Lhuwa tuku kinkamasiyanikgoyan, chu ni kajwatiya tachuwin nema chuwinankan unu. Akgtum liʼakxilhtit, kinkawanikgoyan niku tlan naktamawananaw niku ni katapalaxla chu na kinkawanikgoyan la naktamawayaw kiliwatkan kpustan».

 Tiku ankgo makgtayanankgo kʼalakatanu kachikin lu tlan limakgkatsikgo akxni xʼamigoskan litaxtukgo natalan xala anta chu akxni lakgapaskgo xtalismaninkan. Sona lichuwinan: «Kakxilhnit la kilimasiyani Jehová xtapaxkit. Kintakanajla lu tatliwakglha akxni klilakpuwan la natalan lakgmakgankgonit tuku xkanajlakgo xapulana chu la xlinkgo xlatamatkan xlakata la uku lakgapaskgo Jehová. Kakxilhaw pi kcongregación lu xtapalh klitaxtuyaw chu uma lu tlan kinkamamakgkatsiniyan. Akxtum kkataskujnaniyaw Jehová natalan tiku la uku kiʼamigoskan litaxtukgo» (Marcos 10:29, 30). Gloria wan: «Lu kimatliwakglha akxni kakxilha la natalan limasiyanikgo Jehová pi paxkikgo maski xtalakatsuninkan nitlan kalikatsinikgo xlakata xlakan ni kaʼakxilhputunkgo xtatayananin Jehová».

 Atanu tuku lu tlan kakitaxtuni natalan tiku ankgo makgtayanankgo kʼalakatanu kachikin wa pi tlan lhuwa tuku katsinikgo nema nila xkatsinikgolh niku xlamakgo. Akgtum liʼakxilhtit, akxilhkgonit pi akxni atanu tuku tlawakgo xlakata tlakg naskujnanikgo Jehová kalimini tapaxuwan. Stefano lichuwinan: «Kkinkachikin, akxni xakkan kalitachuwinan Dios latamanin, kajwatiya kʼinterfón xakkatachuwinan chu ni lhuwa kilhtamaku. Pero latamanin xalak Albania lu lakgatikgo kgalhchuwinankgo, liwaka komo wamakgo kape. Xlakata akit ni lu xakkgalhchuwinan, xapulana ni lu xakkgalhchuwinan chu ni xakkatsi tuku nakwan. Pero titaxtulh kilhtamaku, ktsukulh kalilakgaputsa latamanin, chu la uku lu klakgati kkatachuwinan. La uku tlakg klipaxuwa klichuwinan Dios».

 Leah chu William, tiku xalak Estados Unidos ankgolh latamakgo kʼAlbania. Leah wan: «Xlakata kmakgtayanamaw unu, tlawanit pi naklakgpaliyaw tuku klakpuwanaw chu la klinaw kilatamatkan. Chu na lhuwa tuku kkatsininitaw xlakata la kamakgamakglhtinankan amakgapitsin, la limasiyakan kakni chu la tlakg tlan nakkatalalinaw amakgapitsin. Kkatsininitaw la tanu tanu naklichuwinanaw Dios chu la naklimaklakaskinaw Biblia xlakata nakkatachuwinanaw latamanin». William wan: «Lhuwa latamanin tiku minkgo kʼAlbania lu lakgatikgo playas nema anankgo anta. Akit lu klakgati kkan tlawan kkasipijni nema anankgo kʼAlbania. Pero tuku tlakg klakgati wa la likatsikgo latamanin. Klakalhuwa klaktsu kachikinin kajwatiya lichuwinankanit Dios akxni anan akgtum campaña. Wa xlakata, akxni kkanaw anta, tantaku kkatachuwinanaw kaj makgapitsi familias».

 Pero tuku tlakg kamakgapaxuwa umakgolh natalan wa la makgamakglhtinankgo latamanin xalaktlan tamakatsinin (1 Tesalonicenses 2:19, 20). Laura, tiku nina xmakgaxtokga akxni alh latama kʼAlbania, lichuwinan: «Kmakgtayanalh kFier, chu kajwatiya titaxtulh akgtiy kata aitat xʼanan 120 tiku xlichuwinankgo Dios. Kgalhkuchaxan tiku akit kkalimakgalhtawakgelh Biblia». Atanu tala tiku wanikan Sandra, wan: «Klitachuwinalh Dios chatum puskat tiku kskuja kplaza. Tamunulh chu taspitli kxkachikin. ¡Kkatsilh pi xkalimakgalhtawakgema Biblia kgalhkukitsis latamanin!».

 Makgapitsi natalan tiku makgasa la ankgonit makgtayanankgo kʼAlbania chuntiya makgtayanamakgo anta, chu lu lipaxuwakgo. Min kilhtamaku lu kaks lilakawankgo akxni akxilhkgo pi latamanin tiku xkalitachuwinankgonit Dios alistalh tsuku staka xtakanajlakan (Eclesiastés 11:6). Christopher, tiku lichuwinawa, kinkawaniyan: «Ktatanokglhli chatum chixku tiku xaklimakgalhtawakgema Biblia akxni aku xakchanit kʼAlbania. Lu kaks kimalakawanilh akxni tsukulh kiwani putum tuku xaklichuwinanaw akxni xaklimakgalhtawakge Biblia. La uku, xla chu xpuskat tamunukgonit». Federica, tiku na lichuwinawa, wan: «Kʼakgtum congregación, chatum tala puskat kilakgtalakatsuwilh chu kinkgalhskilh komo xaklakapastaka. Kiwanilh pi liwakaya akgnajatsa kata akit xaklitachuwinanit Biblia. Akxni akit kkalh latama kʼalakatanu kachikin, ni makgas kilhtamaku xla tsukuka limakgalhtawakgakan Biblia chu tamunulh. Akit xaklakpuwan pi xapulana kata nema kmakgtayanaw kʼAlbania ni lu tlan xkinkakitaxtuninitan, ¡pero kakxilha pi uma nichuna!».

 ¡Natalan tiku ankgonit makgtayanankgo kʼAlbania chu kKosovo lu paxuwakgo! Akxilhkgonit la kasikulunatlawanit Jehová chu kamaxkinit xalipaxuw latamat. Eliseo lichuwinan la kitaxtuninit putuminika kata lata makgtayanama kʼAlbania: «Min kilhtamaku lakpuwanaw pi tuku limin tapaxuwan wa tuku malaknu uma kakilhtamaku. Pero uma nixlikana. Tuku xlikana limin tapaxuwan kkilatamatkan, wa akxni lilatamayaw tastakyaw nema kinkamaxkiyan Jehová. Xlakata kskujma unu, kkakxilhnit uma. Kmakgkatsi pi xtapalh klitaxtu chu pi tlan tuku ktlawa; kkgalhi xaxlikana amigos tiku watiya tuku lakgchamputunkgo chuna la akit». Sandra nachuna lakpuwan. Xla wan: «Akxni kkalh makgtayanan kʼAlbani, kmakgkatsilh pi Jehová xkimaxkima talakaskin nakmakgantaxti tuku ankgalhin xaktlawaputun kkilatamat: misionera naklitaxtu. Liwana kkatsi pi lu tlan tuku klaksakli akxni kkalh latama kʼAlbania. Ni anan tuku xtachuna. ¡Lu kpaxuwa!».