1 Korin 5:1-13
5 Mi harim olsem pasin pamuk i kamap namel long yupela. Wanpela man i kisim meri bilong papa bilong en. Ol manmeri i no bilip,* ol yet i no save mekim dispela kain pasin pamuk.
2 Yupela i amamas long dispela pasin, a? Mobeta yupela i bel hevi na rausim dispela man i bin mekim dispela pasin nogut namel long yupela.
3 Tru, mi no stap wantaim yupela, tasol long tingting* mi stap wantaim yupela. I olsem mi stap wantaim yupela na mi skelim pinis dispela man husat i bin mekim dispela pasin.
4 Na taim yupela i bung wantaim, tingting* bilong mi wantaim pawa bilong Bikpela bilong yumi Jisas i stap wantaim yupela. Olsem na long nem bilong Bikpela bilong yumi Jisas,
5 yupela i mas putim dispela man long han bilong Satan na bai dispela pasin bilong sin i ken pinis. Olsem bai gutpela pasin bilong kongrigesen inap i stap gut long de bilong Bikpela.
6 Yupela i apim nem bilong yupela yet, dispela i no gutpela. Ating yupela i no save olsem liklik yis tasol i save mekim bret olgeta i solap, laka?
7 Yupela i mas rausim olgeta olpela yis, bai yupela i ken i stap olsem nupela bret i no gat yis. Tru tumas, yupela i no gat yis i stap long yupela, long wanem, ol i sakrifaisim Krais pinis, em sakrifais bilong yumi long pasova.
8 Olsem na yumi mas mekim yet dispela bikpela bung. Yumi no ken mekim wantaim olpela yis, na no ken mekim wantaim ol samting yis i makim, olsem pasin nogut na pasin bilong mekim sin. Yumi mas mekim wantaim ol pasin em bret i no gat yis i makim, olsem pasin bilong givim bel tru na pasin i tru.
9 Long pas mi bin raitim, mi tokim yupela long yupela i mas lusim pasin bilong poroman wantaim ol man bilong mekim pasin pamuk.
10 Mi no tok long yupela i mas lusim olgeta man bilong dispela graun husat i save mekim pasin pamuk, na ol man i save gridi, na ol stilman, na ol man bilong lotuim imis, nogat. Sapos yupela i mekim olsem, orait yupela i mas lusim olgeta manmeri bilong dispela graun.
11 Tasol nau mi raitim pas bilong tokim yupela long lusim pasin bilong poroman wantaim wanpela man yupela i save kolim brata, husat i save mekim pasin pamuk, o gridi, o lotuim imis, o toknogutim narapela, o spak, o stil. Yupela i no ken kaikai wantaim kain man olsem.
12 Olsem wanem? Ating em i wok bilong mi long stap olsem jas na skelim ol man i stap ausait long kongrigesen? Nogat tru. Yupela i stap olsem jas na skelim ol man insait long kongrigesen,
13 na God em i jas na em i save skelim ol man i stap ausait. Rait Holi i tok: “Yupela i mas rausim man nogut i stap namel long yupela.”
