Rom 4:1-25
4 Olsem na bai yumi tok wanem long Abraham, tumbuna bilong yumi?
2 Sapos i tru Abraham i bin mekim ol gutpela wok na long dispela rot God i kolim em stretpela man, orait i gat as na em inap litimapim nem bilong em yet. Tasol em i no inap mekim olsem long ai bilong God.
3 Rait Holi i tok wanem? Em i tok: “Abraham i bilip long Jehova, olsem na em i tingim Abraham olsem stretpela man.”
4 Man i wok em i save kisim pe, dispela pe i no olsem wanpela presen,* em olsem pe bilong wok em i mekim.
5 Tasol man i no bilip long wok em yet i mekim, na em i bilip long man husat i save tokaut olsem man nogut em i stretpela man, orait bilip bilong dispela man i mekim na God i tingim em olsem stretpela man.
6 Devit tu i tok long amamas bilong man em God i tingim olsem stretpela man, na i no long wok dispela man i mekim.
7 Em i tok: “Ol man em ol i bin brukim ol lo na God i fogivim ol na i karamapim sin bilong ol, ol i ken amamas.
8 Man em Jehova i no save tingim ol sin bilong en, em i ken amamas.”
9 Dispela amamas i bilong ol man i katim skin tasol o em i bilong ol man i no katim skin tu? Yumi save tok olsem: “Bilip bilong Abraham i mekim na God i tingim em olsem stretpela man.”
10 Wanem taim God i tingim Abraham i olsem stretpela man? Long taim em i katim skin pinis o long taim em i no katim skin yet? Em i no katim skin yet na God i tingim em olsem stretpela man.
11 God i givim Abraham dispela pasin bilong katim skin olsem mak. Dispela mak i soim olsem long rot bilong bilip bilong en, God i tingim em olsem stretpela man paslain long em i bin katim skin. Olsem na em i kamap papa bilong olgeta man em God i kolim ol stretpela man, long wanem, ol i bilip, maski ol i no katim skin.
12 Na em i papa bilong ol pikinini i bihainim pasin bilong katim skin, tasol tu, em i papa bilong ol man husat i bihainim tru pasin bilong bilip. Em dispela bilip papa bilong yumi Abraham i bin i gat taim em i no katim skin yet.
13 Pasin bilong bihainim lo i no as na Abraham na ol tumbuna bilong en i bin kisim promis olsem em bai kisim nupela graun, nogat. Abraham i bilip na God i tingim em olsem stretpela man, dispela em i as na em i kisim dispela promis.
14 Sapos ol lain husat i bihainim lo, ol i man bilong kisim dispela promis olsem samting papa i laik givim pikinini, orait pasin bilong bilip i olsem samting nating. Na dispela promis i lus nating.
15 Lo bilong Moses i save kamapim belhat. Tasol sapos i no gat lo, orait yumi no ken tok man i brukim lo.
16 Olsem na bilip i as bilong dispela promis, na em i kamap long rot bilong bikpela pasin helpim bilong God. Olsem bai olgeta tumbuna bilong Abraham i ken save olsem dispela promis bai kamap tru. I no long ol lain i bihainim Lo tasol, nogat. Ol lain i bihainim bilip bilong Abraham ol tu bai kisim dispela samting. Abraham, em i papa bilong yumi olgeta.
17 (Olsem Rait Holi i tok: “Mi mekim yu i kamap papa bilong planti lain manmeri.”) Dispela samting i kamap long ai bilong God, em dispela Man Abraham i bilip long en. Em dispela man i save givim laip long ol daiman, na ol samting i no kamap yet em i mekim tok olsem ol i kamap pinis.
18 Abraham i wet na bilip olsem em bai kamap papa bilong planti lain manmeri, maski i luk olsem dispela samting i no inap kamap. Em i bilip long dispela tok olsem: “Ol pikinini bilong yu bai kamap planti.”
19 Bilip bilong em i stap strong yet, na em i gat klostu 100 krismas na em i tingim olsem bodi bilong en i dai pinis. Na em i save tu olsem Sara i lapun pinis na i no inap karim pikinini.
20 Abraham i tingim promis God i mekim, olsem na em i bilip na em i no gat tupela tingting. Bilip bilong em i mekim na em i kamap strong, na em i givim biknem long God.
21 Em i bilip tru olsem samting God i bin promis long mekim em inap mekim.
22 Olsem na “God i tingim em olsem stretpela man.”
23 Tasol dispela tok i stap long Rait Holi olsem, “God i tingim em olsem stretpela man,” dispela tok i no bilong Abraham tasol, nogat,
24 em bilong yumi tu, ol lain em God i makim bilong kolim olsem stretpela manmeri. Long wanem, yumi bilip long dispela man husat i bin kirapim bek Jisas, Bikpela bilong yumi, long indai.
25 Yumi ol sinman, olsem na God i larim ol man i kilim Jisas i dai. Na God i kirapim em bek bai em i ken kolim yumi stretpela man.
