1 Stori 18:1-17
18 Wanpela taim Devit i pait long ol Filistia na i winim ol long pait. Na Devit i kisim taun Get+ na ol taun i stap klostu long en long han bilong ol Filistia.+
2 Bihain Devit i go pait long ol Moap+ na i winim ol. Na ol Moap i kamap wokboi bilong Devit na ol i givim takis* long em.+
3 Bihain King Hadateser+ bilong Soba+ i go olsem long hap bilong Wara Yufretis+ bilong strongim wok bos bilong em, na Devit i go pait long em klostu long Hamat+ na winim em.
4 Na Devit i kisim planti soldia bilong Hadateser, inap olsem 1,000 karis, 7,000 soldia i save sindaun long hos na 20,000 soldia i save wokabaut.+ Na em i katim rop bilong lek bilong ol hos i save pulim karis, tasol 100 bilong ol em i larim.+
5 Orait ol Siria i stap long Damaskus i go helpim King Hadateser bilong Soba long pait, na Devit i kilim i dai 22,000 soldia bilong ol Siria.+
6 Na Devit i putim ol lain soldia bilong em i stap long taun Damaskus long Siria. Na ol Siria i kamap wokboi bilong Devit na ol i givim takis long em. Long olgeta hap Devit i save go pait long en, Jehova i save helpim em na em i save winim pait.+
7 Na Devit i kisim ol hap plang bilong ol wokman bilong Hadateser, em ol i bin wokim long gol, na em i bringim i go long Jerusalem.
8 Na Devit i kisim tu planti kopa long taun Tiphat na taun Kun, em ol taun bilong Hadateser. Solomon i yusim ol dispela kopa long wokim kopa tenk,*+ 2-pela strongpela pos, na ol arapela kopa samting bilong tempel.+
9 Taim King Tou bilong Hamat i harim tok olsem Devit i winim pinis ol ami bilong King Hadateser+ bilong Soba,+
10 wantu em i salim pikinini man bilong em, Hadoram, i go long King Devit long givim gude na tok amamas long Devit i bin pait long Hadateser na winim em (long wanem, planti taim Hadateser i bin pait long Tou). Orait Hadoram i bringim ol kain kain samting ol i wokim long gol, silva, na kopa i go long Devit.
11 Na King Devit i kisim ol dispela samting na i makim bilong Jehova+ wankain olsem em i bin mekim long ol silva na gol em i bin kisim long ol arapela kantri, em Idom, na Moap, na long lain Amon,+ lain Filistia,+ na lain Amalek.+
12 Abisai,+ pikinini man bilong Seruia,+ i kilim i dai 18,000 man bilong Idom long Veli Bilong Sol.+
13 Na Devit i putim ol lain soldia bilong em i stap long Idom. Na ol Idom i kamap wokboi bilong em.+ Long olgeta hap Devit i save go pait long en, Jehova i save helpim em na em i save winim pait.+
14 Devit i bosim olgeta hap bilong Israel+ na em i save mekim stretpela kot na mekim stretpela pasin long olgeta manmeri bilong em.+
15 Joap, pikinini man bilong Seruia, i bosim lain ami.+ Na Jehosafat,+ pikinini man bilong Ahilut, em i man bilong raitim stori bilong ol samting i kamap.
16 Na Sadok em i pikinini man bilong Ahitup. Na Ahimelek em i pikinini man bilong Abiatar. Tupela i mekim wok pris. Na Savsa em i sekreteri.
17 Na Benaia, pikinini man bilong Jehoiada, i bosim ol Keret+ na ol Pelet.+ Na ol pikinini man bilong Devit i stap nambatu long king.
