2 Samuel 23:1-39
23 Dispela em i laspela tok Devit i autim:+
“Em tok bilong Devit, pikinini man bilong Jesi,+Na em tok bilong man ol i bin givim biknem long em,+Em man God bilong Jekop i bin anointim,*+Em singa i raitim planti gutpela song*+ bilong ol Israel.
2 Spirit bilong Jehova i autim tok long rot bilong mi;+Tok bilong em i stap long maus bilong mi.+
3 God bilong Israel i toktok;Man i olsem Bikpela Ston bilong Israel,+ i tokim mi olsem:
‘Sapos man i bosim ol manmeri, em i stretpela man,+Na em i save pret long God na mekim wok bos bilong em,+
4 Orait wok bos bilong em i olsem san i lait gut long moning,+Na i no gat klaut i pasim lait bilong en.
Na i olsem san i lait bihain long ren i pinis,Na i mekim gras i kamap long graun.’+
5 Lain famili bilong mi i kain olsem long ai bilong God.
Long wanem, em i bin wokim wanpela kontrak wantaim mi,+ dispela kontrak i bilong i stap oltaim,Na em i stretim gut ol samting bilong dispela kontrak na dispela kontrak i no inap senis.
Long rot bilong en, God i kisim bek mi na givim mi ol samting mi laikim,Na em bai mekim em i gro.+
6 Ol yusles man i olsem ol liklik nil diwai em ol man i save rausim i go,+I no gat man inap holim ol dispela kain nil diwai long han.
7 Sapos man i laik holim ol,Em i mas i gat hap ain na spia,Na ol i mas kukim ol long ples ol i stap long en bai ol i pinis olgeta.”
8 Nem bilong ol strongpela soldia bilong Devit i olsem,+ Josep-basebet, em i bilong lain bilong Takemon. Em i wanpela bilong 3-pela strongpela soldia na lida bilong ol.+ Wanpela taim em i bin holim spia na pait long 800 man na kilim olgeta i dai.
9 Eleasar+ em i pikinini man bilong Dodo.+ Dodo em i pikinini man bilong Ahohi. Eleasar em i wanpela bilong dispela 3-pela strongpela soldia. Wanpela taim ol Filistia i bung bilong pait long ol Israel. Na dispela 3-pela strongpela soldia i stap wantaim Devit na i hatim bel bilong ol Filistia. Tasol taim ol Filistia i kam, ol soldia bilong Israel i surik.
10 Eleasar wanpela tasol i sanap strong na i wok long pait long ol Filistia na kilim ol i dai. Em i pait i go na han bilong em i tait olgeta na em i no inap lusim bainat em i holim.+ Long dispela de Jehova i winim ol Filistia;+ na ol soldia bilong Israel i kam na rausim ol klos pait samting bilong ol Filistia i dai pinis.
11 Samar em i pikinini man bilong Agi na em i bilong ples Harar. Samar em i wanpela bilong ol dispela 3-pela strongpela soldia. Ol Filistia i kam bung long Lehi, klostu long wanpela gaden lentil;* na ol soldia bilong Israel i lukim ol Filistia na ol i ranawe.
12 Tasol Samar i no surik, em i sanap namel long gaden na pait long ol Filistia bai ol i no ken kisim dispela graun. Na em i kilim ol Filistia i dai. Na long dispela rot, Jehova i mekim na ol manmeri bilong em i win tru.+
13 Orait 3-pela bilong ol 30 lida i go daun bilong lukim Devit long keiv bilong Adulam+ long taim bilong ol kaikai i redi long gaden. Na long dispela taim tu sampela soldia bilong ol Filistia i kam na wokim kem bilong ol long Veli* Bilong Refaim+ na i stap long dispela hap.
14 Devit i stap long dispela strongpela ples hait.+ Na autstesin bilong ol Filistia i stap long Betlehem.
15 Na Devit i tingting i go bek long gutpela wara bilong Betlehem na i tok: “Sapos mi dringim sampela wara bilong hulwara i stap klostu long geit bilong Betlehem, mi bai amamas tru!”
16 Dispela 3-pela strongpela soldia i harim dispela tok na ol i kirap i go. Maski ol Filistia i stap long kem bilong ol, dispela 3-pela soldia i sakim ol na i go pulimapim wara long hulwara long geit bilong Betlehem. Na ol i bringim wara i kam long Devit; tasol em i no laik dring, nogat, em i kapsaitim long graun long ai bilong Jehova.+
17 Em i tok olsem: “Jehova, mi no ken dring dispela wara! Sapos mi dring, i olsem mi dringim blut+ bilong ol dispela man, long wanem, ol inap lusim laip bilong ol taim ol i go kisim wara.” Olsem na Devit i no dringim dispela wara. Dispela 3-pela strongpela soldia bilong em i bin mekim ol dispela samting.
18 Abisai,+ em i brata bilong Joap, na pikinini man bilong Seruia.+ Abisai em i wanpela bilong narapela 3-pela strongpela soldia na lida bilong ol; wanpela taim em i bin holim spia na pait long 300 man na kilim olgeta i dai. Em i gat biknem olsem dispela 3-pela arapela strongpela soldia.+
19 Namel long dispela 3-pela arapela soldia, Abisai em i gat bikpela namba moa na em i lida bilong ol. Tasol biknem bilong em i no olsem bilong dispela fes 3-pela strongpela soldia.
20 Benaia,+ pikinini man bilong Jehoiada, em i wanpela strongpela soldia.* Em i bin pait planti taim long Kapsel.+ Em i bin kilim i dai tupela pikinini man bilong Ariel bilong Moap. Na wanpela taim em i bin go daun long wanpela hulwara long taim sno i pundaun na kilim i dai wanpela laion.+
21 Na tu, em i bin kilim i dai wanpela traipela man bilong Isip. Dispela man Isip i holim spia, tasol Benaia i holim wanpela stik na i go pait long em. Na em i pulim spia long han bilong dispela man Isip na kilim em i dai long dispela spia.
22 Benaia, pikinini man bilong Jehoiada, i bin mekim ol dispela samting. Em i gat wankain namba olsem bilong ol 3-pela strongpela soldia.
23 Em i gat bikpela namba moa winim ol arapela 30 strongpela soldia, tasol em i no gat biknem olsem bilong ol 3-pela strongpela soldia. Devit i makim em long bosim ol bodi-gad bilong em.
24 Asahel,+ brata bilong Joap, em i wanpela bilong ol 30 strongpela soldia bilong Devit. Sampela bilong ol dispela strongpela soldia em, Elhanan, pikinini man bilong Dodo bilong taun Betlehem.+
25 Samar bilong ples Harot, Elika bilong ples Harot,
26 Heles+ bilong taun Bet-pelet, Ira,+ pikinini man bilong Ikes bilong taun Tekoa,
27 Abi-eser+ bilong taun Anatot,+ Mebunai bilong taun Husa,
28 Salmon bilong lain Ahohi, Maharai+ bilong ples Netofa,
29 Helep, pikinini man bilong Beiana bilong ples Netofa, Itai pikinini man bilong Ribai bilong taun Gibea long graun bilong lain Benjamin,
30 Benaia+ bilong taun Piraton, Hidai bilong veli* bilong Gas,+
31 Abi-albon bilong taun Bet-araba, Asmavet bilong ples Bahurim,
32 Eliaba bilong taun Salbim, na ol pikinini man bilong Jasen, na Jonatan,
33 na Samar bilong ples Harar, na Ahiam, pikinini man bilong Sarar bilong ples Harar,
34 na Elifelet, pikinini man bilong Ahasba. Ahasba em i pikinini man bilong wanpela man Makat. Na Eliam pikinini man bilong Ahitofel+ bilong taun Gilo,
35 na Hesro bilong taun Karmel, na Parai bilong taun Arap,
36 na Igal pikinini man bilong Natan bilong Soba, na Bani bilong lain Gat,
37 na Selek bilong lain Amon, na Naharai bilong taun Berot, em man i save karim ol samting bilong Joap long pait. Joap em i pikinini man bilong Seruia.
38 Na Ira bilong lain Itra, na Garep bilong lain Itra,+
39 na Uria+ bilong lain Hit. Namba bilong ol dispela soldia em inap 37 olgeta.
Ol Futnot
^ O, “singa bilong Israel i gat naispela nek bilong singsing.”
^ Wanpela kain bin.
^ O, “Ples Daun.”
^ Hib., “pikinini man bilong wanpela man i no save pret.”
