Buk Song 104:1-35
104 Mi mas preisim Jehova.+
O Jehova, God bilong mi, yu gat bikpela strong.+
Biknem na namba i stap olsem klos yu werim.+
2 Yu save karamapim yu yet long lait+ olsem man i karamapim skin bilong em long laplap;Yu pulim na opim skai i go bikpela olsem laplap bilong haus sel.+
3 Yu wokim haus bilong yu antap long ol klaut,+Na yu mekim ol klaut i olsem karis bilong yu,+Na win i save karim yu long ol wing bilong en i go.+
4 Yu mekim ol ensel bilong yu i gat bikpela strong,*Na ol wokman* bilong yu i kamap olsem paia i kukim ol samting.+
5 Yu bin putim dispela graun long ples bilong en, na graun i stap strong olgeta;+Em i no inap surik liklik. Nogat tru. Em bai i stap inap oltaim oltaim.+
6 Na yu karamapim em long bikpela wara olsem laplap.+
Na wara i karamapim ol maunten.
7 Taim yu kros, wara i ranawe i go;+Wara i harim pairap bilong tanda bilong yu na i pret na ranawe i go.
8 Dispela i mekim na ol maunten i go antap na ol veli i go daunLong ples yu makim bilong ol.
9 Yu putim mak na wara i no ken kalapim dispela mak,+Na wara i no ken karamapim graun gen.
10 Yu mekim ol wara i ran i go long ol veli;*Na yu mekim ol i ran i go namel long ol maunten.
11 Ol wel animal i save dring long ol dispela wara.
Na ol wel donki tu i save dring na nek bilong ol i no drai moa.
12 Ol pisin i wokim haus bilong ol long ol diwai i stap arere long wara.
Na ol i save sindaun long ol han bilong ol diwai i gat planti lip na singsing.
13 Yu stap long haus bilong yu na givim wara long ol maunten.+
Graun i pulap tru long ol wok bilong yu.+
14 Yu mekim gras i kamap bilong ol bulmakau i ken kaikaiNa yu givim diwai na gras samting long ol manmeri i ken yusim,+Na yu mekim kaikai i kamap long graun
15 Na wain i mekim bel bilong man i amamas,+Na oil i mekim pes bilong man i lait,Na bret i save strongim bel bilong man.+
16 Ol diwai bilong Jehova i save kisim planti wara,Em ol diwai sida bilong Lebanon em i bin planim,
17 Na ol pisin i save wokim haus bilong ol long ol dispela diwai.
Na pisin stok i save wokim haus bilong en+ long ol diwai junipa.
18 Ol meme bilong maunten i save stap long ol maunten i antap tru;+Na ol mumut* i save hait long ol bikpela ston.+
19 Yu bin wokim mun bilong makim ol taim;San i save long taim em i mas i go daun.+
20 Yu mekim tudak i kamap,+Na long nait ol wel animal bilong bikbus i save wokabaut raun.
21 Ol yangpela laion i save singaut strong taim ol i painim abus+Na ol i save painim abus em God i givim ol.+
22 Taim san i kam antap,Ol i save go bek na slip long hul bilong ol.
23 Na ol man i save go mekim wok bilong ol,Ol i save mekim wok i go inap long apinun tru.
24 O Jehova, yu bin wokim planti samting!+
Yu gat savetingting na yu wokim olgeta dispela samting.+
Ol samting yu bin wokim i pulap tru long graun.
25 Na solwara i bikpela tru na i dip,Na i pulap long ol kain kain bikpela na liklik samting i gat laip em ol man i no inap kaunim.+
26 Ol sip i save i go i kam antap long en,Na Leviatan*+ em yu bin wokim, em i save swim na kalap kalap insait long en.
27 Olgeta bilong ol i save wet long yuLong givim kaikai long ol long taim ol i nidim.+
28 Ol i kaikai ol samting yu givim long ol.+
Taim yu opim han bilong yu, ol i kisim planti gutpela samting.+
29 Taim yu haitim pes bilong yu, ol i no stap isi.
Na taim yu rausim strong bilong laip long ol, ol i save dai na go bek gen long graun.+
30 Yu salim strong bilong yu bilong mekim wok i go, na ol samting i kamap,+Na yu givim nupela laip long graun.
31 Biknem bilong Jehova bai i stap oltaim oltaim.
Na Jehova i ken amamas long olgeta samting em i bin wokim.+
32 Em i lukluk long graun na graun i guria;Em i tatsim ol maunten na smok i kamap long ol maunten.+
33 Long taim mi stap laip, mi bai singsing long Jehova;+Yes, mi bai singim ol song bilong preisim* God bilong mi i go inap long taim mi dai.+
34 Ol samting mi tingting long en i ken mekim em i amamas.*
Mi bai amamas long Jehova.
35 Ol sinman bai lus olgeta long graun,Na ol man nogut bai i no stap moa.+
Mi mas preisim Jehova. Yes, preisim Ja!*
Ol Futnot
^ O, “i kamap olsem win.”
^ O, “pablik sevan.”
^ Em i kain olsem rabit na em i save stap long ol ples ston. Ol i save kolim tu olsem rock badger.
^ O, “mekim musik long.”
^ O ating, “Ol samting bilong em mi tingim tingim long bel i ken mekim em i amamas.”
^ O, “Haleluya.” “Ya” o “Ja” em sotpela wei bilong kolim nem Jehova
