Buk Song 139:1-24
Tok i go long dairekta. Devit i raitim dispela song.
139 O Jehova, yu skelim mi gut, na yu save tru long mi.+
2 Yu save long olgeta samting mi save mekim, maski mi sindaun o mi kirap, yu save long dispela.+
Yu stap longwe na yu save long olgeta tingting bilong mi.+
3 Yu save lukim* mi long taim mi wokabaut na long taim mi slip;Yu save long olgeta pasin bilong mi.+
4 Jehova, taim mi no opim maus yet long toktok,Yu save pinis long tok mi bai mekim.+
5 Yu banisim mi long baksait na long fran bilong mi;Na yu putim han bilong yu antap long mi.
6 Yu save gut tru long miNa dispela i winim tru tingting bilong mi.+
7 Bai mi go we na hait long spirit bilong yu?
Na mi bai go hait long wanem hap na bai yu no ken lukim mi?+
8 Sapos mi go antap long heven, yu stap long hap,Na sapos mi mekim bet bilong mi long Matmat,* yu stap tu long dispela ples.+
9 Sapos mi flai long wing bilong tulait i goNa i go i stap long ol ailan i stap longwe tru,*
10 Long dispela hap tu, han bilong yu bai i stiaim miNa rait han bilong yu bai helpim mi.+
11 Na sapos mi tok: “Tudak i mas haitim mi!”
Orait nait bai i kamap olsem san taim.
12 Long ai bilong yu, tudak bai i no olsem tudak tru,Na nait bai i lait tru olsem long de taim;+
Tudak na tulait i wankain tasol long ai bilong yu.+
13 Yu bin wokim ol kidni bilong mi;Yu bin haitim mi* gut insait long bel bilong mama bilong mi.+
14 Mi litimapim nem bilong yu, long wanem, yu wokim mi i narakain tru na i nambawan tru.+
Olgeta samting yu wokim i gutpela tru,+Mi save gut long dispela samting.
15 Yu lukim ol bun bilong miTaim mi kamap long ples hait,Na taim mi kamap insait long bel bilong mama bilong mi.*+
16 Ai bilong yu i lukim mi taim mi stap blut yet;Taim olgeta wan wan hap bilong bodi bilong mi i no kamap yet,Yu raitim pinis olgeta hap bilong bodi bilong mi long buk bilong yu,Na olgeta wan wan hap i kamap long taim stret bilong en.
17 God, olgeta tingting bilong yu i nambawan stret!+
Na i bikpela tumas na man i no inap save long namba bilong en!+
18 Sapos mi kaunim ol, bai namba bilong ol i winim namba bilong wesan bilong nambis.+
Taim mi kirap long slip, mi stap wantaim yu.*+
19 God, em bai gutpela moa sapos yu kilim i dai ol man nogut!+
Na ol man bilong pait na bagarapim narapela* bai i lusim mi na i go,
20 Ol man i gat tingting nogut na ol i mekim ol tok i bagarapim yu;Ol i birua bilong yu, na ol i mekim wok nogut long nem bilong yu.+
21 O Jehova, ol man i nolaik tru long yu, mi tu i nolaik tru long ol,+Na ol man i bikhet long yu, mi nolaik tru long ol.+
22 Tru tumas, mi no laikim tru ol;+Ol i kamap birua bilong mi.
23 O God, skelim mi gut na yu bai save long tingting i stap long bel bilong mi.+
Skelim mi na yu bai save long ol samting mi tingting planti long en.+
24 Skelim mi gut, nogut i gat sampela tingting nogut i stap long bel bilong mi,+Na yu mas bringim mi+ long rot bilong kisim laip bilong i stap oltaim oltaim.
Ol Futnot
^ Hib., “mesarim.”
^ Hib., “Na i go i stap long solwara i stap longwe tru.”
^ O ating, “wokim mi.”
^ Hib., “Taim ol i wivim mi insait tru long graun.”
^ O ating, “mi bai wok yet long kaunim ol.”
^ O, “i gat asua long kapsaitim blut.”
