Esekiel 31:1-18
-
Isip, traipela diwai sida, i pundaun (1-18)
31 Long namba 11 yia, long namba 1 de bilong namba 3 mun, Jehova i givim gen tok bilong em long mi olsem:
2 “Pikinini bilong man, tokim Fero, king bilong Isip, na bikpela lain bilong em+ olsem,‘Yu wankain olsem husat long biknem na strong bilong yu?
3 I gat wanpela Asiria i stap, wanpela diwai sida long Lebanon,Em i gat ol naispela brens i gat planti lip tru i givim gutpela seid, em i longpela tru;Het bilong en i stap antap namel long ol klaut.
4 Ol wara i mekim em i gro bikpela, ol wara i dip tru i mekim diwai i gro i go antap tru.
Ol hanwara i raunim hap ol i planim em long en;Na ol liklik hanwara bilong ol i givim wara long olgeta diwai bilong bus.
5 Olsem na em i gro i go antap winim olgeta narapela diwai bilong bus.
Ol bikpela brens bilong en i kamap planti, na ol brens bilong en i gro i go longpelaBikos i gat planti wara long ol hanwara bilong en.
6 Olgeta pisin bilong skai i save wokim haus bilong ol long ol bikpela brens bilong en,Olgeta wel animal bilong bus i save karim pikinini aninit long ol brens bilong en,Na olgeta kantri i gat planti manmeri tru i save sindaun aninit long seid bilong en.
7 Em i kisim biknem long naispela lukluk bilong en na long ol longpela brens bilong en,Bikos ol rop bilong en i go daun insait long planti wara.
8 I no gat wanpela diwai sida long gaden bilong God+ i wankain olsem em.
I no gat wanpela diwai junipa i gat ol bikpela brens olsem bilong en,Na i no gat wanpela diwai plein i gat ol brens wankain olsem em.
I no gat wanpela diwai long gaden bilong God inap winim em long lukluk bilong en.
9 Mi mekim em i luk nais tru wantaim planti lip,Na olgeta narapela diwai long Iden, em gaden bilong God tru, i bel nogut long en.’
10 “Olsem na Nambawan Bikpela Jehova i tok: ‘Bikos em i go longpela tru, na em i apim het bilong en i go antap namel long ol klaut, na long bel em i kisim pasin antap bikos em i longpela,
11 mi bai putim em long han bilong strongpela king bilong ol lain manmeri.+ Na tru tumas, dispela king bai mekim save long em, na mi bai sakim em bikos long ol pasin nogut bilong em.
12 Na ol man bilong narapela ples, em ol man nogut tru winim ol arapela kantri, bai katim em i go daun, na ol bai lusim em i stap antap long ol maunten, na ol lip bilong en bai pundaun long olgeta veli, na ol brens bilong en bai bruk na slip i stap insait long olgeta hanwara bilong graun.+ Olgeta lain manmeri bilong graun bai lusim seid bilong en na i go.
13 Olgeta pisin bilong skai bai kam stap long dispela diwai i pundaun i stap, na olgeta wel animal bilong bus bai kam stap long ol brens bilong en.+
14 Dispela samting i kamap na bai i no gat wanpela diwai klostu long ol wara i ken gro i go longpela tru o apim het bilong en i go antap namel long ol klaut, na i no gat wanpela diwai i save kisim planti wara i ken gro i go antap klostu long ol. Long wanem, ol bai dai, ol bai go long ples i stap daunbilo, ol wantaim ol pikinini bilong ol man husat bai go daun long matmat.’*
15 “Nambawan Bikpela Jehova i tok: ‘Long dispela de em i go daun long Matmat,* mi bai mekim ol manmeri i krai sori. Na mi bai blokim ol wara i daun tru, na holim bek ol hanwara bilong ol na bai planti wara i no ken ron. Mi bai mekim Lebanon i kamap tudak bikos long dispela diwai, na olgeta diwai bilong bus bai kamap drai na i dai.
16 Taim ol i harim pairap bilong em i pundaun, mi bai mekim ol kantri i seksek taim mi bringim em i go daun long Matmat* wantaim olgeta husat i go daun long matmat,* na olgeta diwai bilong Iden,+ ol gutpela na nambawan diwai bilong Lebanon, em ol i save kisim planti wara, ol bai kisim bel isi long ples i stap daunbilo.
17 Ol i go daun pinis long Matmat* wantaim em na ol sapota* bilong em husat i save stap aninit long sedo bilong em namel long ol lain manmeri,+ ol i go daun long ol man em bainat i bin kilim ol i dai.’+
18 “‘Wanem diwai long Iden i gat wankain glori na biknem olsem yu?+ Tasol tru tumas, yu na ol diwai bilong Iden bai go daun long ples i stap daunbilo. Yu bai slip namel long ol man i no bin katim skin, wantaim ol man bainat i bin kilim ol i dai. Dispela samting bai kamap long Fero na olgeta lain bilong em,’ Nambawan Bikpela Jehova i mekim dispela tok.”
