Jeremaia 40:1-16
40 Jehova i givim tok long Jeremaia bihain long Nebusaradan,+ kepten bilong ol gad, i larim em i go fri lusim Rama.+ Em i bin pasim han bilong em long sen na kisim em i go long dispela hap, na em i stap wantaim ol kalabus manmeri bilong Jerusalem na Juda em ol i bin kisim ol i go long Babilon.
2 Na kepten bilong ol gad i kisim Jeremaia na i tokim em olsem: “Jehova, God bilong yu, i bin tokaut long dispela bagarap bai kamap long dispela ples,
3 na Jehova i mekim ol dispela samting i kamap olsem em i bin tok, long wanem, yupela ol manmeri i bin mekim sin long Jehova na i no harim tok bilong em. Olsem na dispela samting i kamap long yupela.+
4 Orait nau mi bai rausim sen long tupela han bilong yu na larim yu go fri. Sapos yu laik kam wantaim mi long Babilon, orait yu ken kam na mi bai lukautim yu. Tasol sapos yu no laik kam wantaim mi long Babilon, orait no ken kam. Harim! Kantri olgeta i stap long ai bilong yu, wanem hap yu laik i go long en, orait yu ken i go.”+
5 Jeremaia i no wokim tingting yet long i go bek na Nebusaradan i tok olsem: “Go bek long Gedalia,+ pikinini man bilong Ahikam,+ em pikinini man bilong Safan,+ em man king bilong Babilon i bin makim bilong bosim ol taun bilong Juda, na stap wantaim em na ol manmeri; o yu ken i go long wanem hap yu laik i go long en.”
Orait kepten bilong ol gad i givim em sampela kaikai na presen na larim em i go.
6 So Jeremaia i go long Gedalia, pikinini man bilong Ahikam long Mispa+ na em i stap wantaim em na ol manmeri husat i stap long kantri Juda.
7 Ol kepten bilong ami i stap long kantri wantaim ol soldia bilong ol i harim olsem king bilong Babilon i bin makim Gedalia, pikinini man bilong Ahikam long bosim Juda na long bosim ol man, ol meri, na ol pikinini bilong ol manmeri i stap rabis. Em ol manmeri i stap long kantri na ol i no bin go long Babilon.+
8 Olsem na ol i kam long Gedalia long Mispa.+ Ol dispela man em Ismael,+ pikinini man bilong Netania, na Johanan+ na Jonatan, em tupela pikinini man bilong Karea, na Seraia, pikinini man bilong Tanhumet, na ol pikinini man bilong Efai em man Netofa, na Jesania,+ em man bilong lain Makat. Olgeta dispela man i kam wantaim ol soldia bilong ol.
9 Na Gedalia, pikinini man bilong Ahikam i mekim wanpela tok tru antap long ol dispela man wantaim ol soldia bilong ol na em i tok: “Yupela i no ken pret long stap aninit long ol Kaldia. Yupela i mas stap long dispela graun na stap aninit long king bilong Babilon, na bai yupela i stap gut.+
10 Na mi yet bai mi stap long Mispa na mi bai makim maus bilong yupela taim ol Kaldia i kam long yumi. Tasol yupela i mas bungim wain, ol prut bilong taim bilong san, na oil na yupela i mas putim long ol sospen bilong yupela na yupela i mas sindaun long ol taun em yupela i bin kisim pinis.”+
11 Na olgeta Juda i stap long Moap, na long Amon, na long Idom, na long ol arapela kantri, ol i harim olsem king bilong Babilon i larim liklik hap lain long i stap long Juda na em i bin makim Gedalia, pikinini man bilong Ahikam, em pikinini man bilong Safan, long bosim ol.
12 Olsem na olgeta Juda i lusim ol kantri em ol i bin go sindaun nabaut long en na ol i kam bek long graun bilong Juda, na ol i go long Gedalia long Mispa. Na ol i bungim planti wain na ol prut bilong taim bilong san.
13 Na Johanan, pikinini man bilong Karea, na olgeta kepten bilong ami em ol i stap long kantri, ol i kam long Gedalia long Mispa.
14 Na ol i tokim em olsem: “Yu save tu olsem Balis, em king bilong ol Amon,+ i bin salim Ismael, pikinini man bilong Netania, i kam long kilim yu i dai?”+ Tasol Gedalia, pikinini man bilong Ahikam, i no bilipim tok bilong ol.
15 Orait long pasin hait, Johanan, pikinini man bilong Karea i tokim Gedalia long Mispa olsem: “Inap yu larim mi i go kilim i dai Ismael, pikinini man bilong Netania? I no gat man bai save long dispela samting. Nogut em i kilim yu i dai na ol dispela manmeri bilong Juda husat i stap wantaim yu, ol bai i go nabaut na liklik hap lain bilong Juda bai i pinis.”
16 Tasol Gedalia,+ pikinini man bilong Ahikam, i tokim Johanan, pikinini man bilong Karea, olsem: “Yu no ken mekim dispela pasin. Dispela tok yu mekim long Ismael em i no tru.”
