Jop 31:1-40
31 “Mi bin wokim kontrak wantaim ai bilong mi.+
Olsem na mi no ken aigris long wanpela meri.+
2 Sapos mi mekim olsem, orait God bai bekim pasin bilong mi.
Na God i Gat Olgeta Strong i stap antap bai i givim wanem samting long mi?
3 Bagarap bai painim ol man i save mekim rong,Na taim nogut bai painim ol man i save mekim pasin nogut.+
4 God i save pinis long olgeta pasin bilong mi+
Na em i save lukim olgeta wokabaut bilong mi.
5 Mi no bin mekim tok giaman*
Na mi no bin giamanim wanpela man.+
6 Sapos God i skelim stret ol pasin bilong mi,+Orait em bai luksave olsem mi save stap gut long em.+
7 Tasol sapos lek bilong mi i lusim rot i stret,+O ai bilong mi i grisim bel bilong mi,+O han bilong mi i kamap doti,
8 Orait kaikai mi bin planim long gaden, ol man i ken kisim,+Na ol i ken kamautim kaikai mi bin planim long gaden.*
9 Sapos bel bilong mi i aigris long wanpela meri+Na mi go wet+ long dua bilong haus bilong neiba bilong mi,
10 Orait meri bilong mi yet i ken wilwilim wit samting bilong narapela man,Na ol arapela man i ken slip wantaim em.*+
11 Long wanem, pasin mi bin mekim, em pasin bikhet na i no sem,Na ol jas inap kotim mi na mekim save long mi.+
12 Dispela kain sin i olsem hatpela paia bilong kukim man,+Em bai kukim na pinisim tru olgeta samting bilong mi.
13 Bipo, sapos wanpela wokman o wokmeri bilong mi i gat tok long mi,Na mi no putim yau long tok bilong em,
14 Orait taim God i kotim mi,* bai mi mekim wanem?
Na bai mi bekim wanem tok long em taim em i kotim mi?+
15 God yet i mekim mi i kamap insait long bel bilong mama, na em tasol i bin wokim tu ol wokman na wokmeri bilong mi.+
Dispela wanpela God tasol i bin mekim yumi olgeta i kamap insait long bel bilong mama.+
16 Olsem wanem? Mi no bin helpim ol rabisman na givim ol samting we ol i sot long en?+
Na olsem wanem? Asua bilong mi i mekim na ol wido meri i no kisim helpim, a?*+
17 Na olsem wanem? Mi bin pasim ol kaikai bilong mi na mi wanpela tasol i kaikai?
Na mi no bin givim sampela kaikai long ol pikinini i no gat papa, a?+
18 (Long taim mi yangpela na i kam inap nau, pikinini* i no gat papa i kamap bikpela wantaim mi, na i olsem mi papa bilong em.
Na long taim mi stap yangpela* i kam inap nau, mi bin helpim ol wido meri.)
19 Olsem wanem? Taim mi lukim wanpela man i no gat klos na i bagarap long kol,Na taim mi lukim wanpela man i stap rabis na i no gat klos bilong karamap;+
20 Ating mi no bin givim em klos em ol i bin wokim long gras bilong sipsip bilong mi,Na bai dispela i ken hatim skin bilong em, na em i no bin tok tenkyu long mi, a?+
21 Olsem wanem? Ating mi bin lukim wanpela pikinini i no gat papa i stap long geit bilong taun+ i laik bai mi helpim em,*Tasol mi makim han long em+ olsem mi bai mekim save long em?
22 Sapos mi bin mekim ol dispela pasin, orait mobeta tupela han bilong mi i ken kamaut long solda na pundaun,Na ol i ken brukim tupela han bilong mi long elbo.
23 Mi pret long bagarap em God bai kamapim,Na biknem bilong em i antap moa na mi no inap sanap long ai bilong em.
24 Olsem wanem? Ating mi bin bilip olsem gol bai helpim mi, a?
Na ating mi bin tokim gutpela gol olsem, ‘Yu inap helpim mi long i stap gut!’+
25 Olsem wanem? Ating mi bin hambak olsem mi gat planti mani kago?+
Tru, mi bin kisim planti samting,+ tasol olsem wanem, mi bin litimapim nem bilong mi yet?
26 Olsem wanem? Taim mi lukim san* i lait moa yetNa mun tu i gat gutpela lait taim em i muv i kam i go long skai,+
27 Ating mi bin larim bel bilong mi i bin grisim mi,Na mi bin kis long han bilong mi bilong lotu long san na mun, a?+
28 Sapos mi bin mekim ol dispela pasin, orait i stret ol i kotim mi na mekim save long mi,Long wanem, pasin mi mekim i makim olsem mi givim baksait long God tru.
29 Taim bagarap i painim birua bilong mi, ating mi bin amamas, a?+
Na ating mi bin belgut taim samting nogut i painim em, a?
30 I no gat wanpela taim mi bin larim maus bilong mi i mekim sin,Na tok tru antap long em i ken lusim laip bilong em.+
31 Ol man i stap long haus sel bilong mi i save tok olsem,‘Em i bin givim kaikai* long olgeta man na i no gat wanpela man i stap nating.’+
32 Ol man em mi no save long ol* husat i no gat ples bilong slip, mi no bin larim ol i slip ausait;+Na mi opim dua bilong haus bilong mi long ol man i save raun.
33 Olsem wanem? Ating mi bin haitim ol rong bilong mi olsem ol arapela man i save mekim?+
Na ating mi bin haitim ol rong bilong mi insait long poket bilong klos bilong mi, a?
34 Olsem wanem? Ating mi bin pret long bikpela lain manmeri bai ting olsem wanem long mi,O ating mi pret tru long ol arapela famili bai rabisim mi,Na dispela i mekim mi i stap isi tasol na mi pret long go ausait, a?
35 Mi laik bai wanpela man i putim yau long tok bilong mi!+
Na mi bai putim mak bilong mi bilong strongim dispela tok bilong mi.*
Orait nau mi laik bai God i Gat Olgeta Strong i bekim olgeta tok bilong mi!+
Na mi laik bai man i kotim mi i raitim ol tok em i kotim mi long en long wanpela pepa!
36 Na mi bai amamas long karim dispela pepa long solda bilong mi,Na bai mi putim long het bilong mi olsem wanpela kraun.
37 Na mi bai go sanap long pes bilong em olsem wanpela prins i no gat asua,Na mi bai tokaut long em long olgeta pasin mi bin mekim.
38 Olsem wanem? Ating mi bin stilim graun bilong narapela man na graun i kros long mi, a?
Na ating ol baret bilong dispela graun tu i krai, a?
39 Olsem wanem? Ating mi bin kisim kaikai long dispela graun em mi no bin baim, a?+
Na ating ol papa bilong dispela graun i bel hevi, long wanem, mi kisim graun bilong ol, a?+
40 Sapos mi bin mekim olsem, orait ol gras nogut i gat nil i ken kamap long dispela graun, na ol wit i no ken kamap.
Na ol gras nogut i smel nogut tru i ken kamap long dispela graun, na ol bali i no ken kamap long en.”
Tok bilong Jop i pinis long hia.
Ol Futnot
^ O ating, “bung wantaim ol man bilong tok giaman.”
^ O, “larim ol i kamautim ol lain tumbuna pikinini bilong mi.”
^ Hib., “larim ol narapela man i brukim skru antap long em.”
^ Hib., “kirap sanap.”
^ Hib., “mekim ai bilong ol wido i hatwok long lukluk.”
^ Hib., “kirap long taim mi stap long bel bilong mama.”
^ Hib., “em.”
^ O ating, “Taim mi lukim olsem mi gat sapot insait long geit bilong taun.”
^ Hib., “lait.”
^ Hib., “mit.”
^ O, “Ol man bilong arapela kantri.”
^ O, “Mi sainim nem bilong mi hia.”
