Kisim Bek 14:1-31
14 Jehova i tokim Moses olsem:
2 “Tokim ol Israel long ol i mas go bek na wokim kem long Pihahirot. Dispela ples i stap namel long Mikdol na solwara.* Na long dispela hap yupela inap lukim Bal-sefon.+ Yupela i mas wokim kem arere long solwara klostu long Bal-sefon.
3 Na Fero bai tok long ol Israel olsem: ‘Ol i paul na raun raun nating. Ol i no gat rot long lusim dispela ples nating.’
4 Na bai mi larim het bilong Fero i kamap strong,+ na em bai ronim yupela. Na bai mi yet i kisim glori long rot bilong Fero na ol lain ami bilong em.+ Na ol Isip bai save olsem mi tasol mi Jehova.”+ Orait ol Israel i bihainim tok bilong God na ol i go.
5 Bihain ol man i tokim king bilong Isip olsem ol Israel i ranawe pinis. Na kwiktaim Fero na ol wokman bilong em i senisim tingting bilong ol.+ Na ol i tok: “Wai na yumi larim ol Israel i go fri na nau ol i no inap mekim wok bilong yumi?”
6 Orait Fero i tok na ol i redim ol karis bilong pait, na em i kisim ol soldia bilong em na ol i go.+
7 Em i kisim 600 nambawan karis bilong pait na ol arapela karis bilong Isip. Na long olgeta wan wan karis i gat ol soldia i stap long en.
8 Jehova i larim bel bilong Fero, king bilong Isip, i kamap strong moa, na em i ron bihainim ol Israel. Tasol ol Israel i go aut wantaim strongpela bel.+
9 Ol karis bilong Fero na ol soldia i sindaun long ol hos na ol soldia i wokabaut, ol i ron bihainim ol Israel i go.+ Na ol i wok long i kam klostu long kem bilong ol Israel long arere bilong solwara long Pihahirot we i stap klostu long Bal-sefon.
10 Taim Fero na ami bilong em i kam klostu, ol Israel i lukim ol na ol i pret nogut tru na ol i singaut long Jehova long helpim ol.+
11 Na ol i tokim Moses olsem: “I no gat ples matmat long Isip olsem na yu bringim mipela i kam bilong dai long dispela ples nating, a?+ Watpo yu bringim mipela i kam lusim Isip?
12 Taim mipela i stap yet long Isip, mipela i bin tokim yu olsem, ‘Larim mipela i stap na bai mipela i mekim wok bilong ol Isip.’ I gutpela moa long mipela i mekim wok bilong ol Isip na mipela i no ken i kam na i dai long dispela ples nating.”+
13 Na Moses i tokim ol manmeri olsem: “Yupela i no ken pret.+ Sanap strong na lukim ol samting Jehova bai mekim nau bilong kisim bek yupela.+ Nau yupela i lukim ol dispela Isip, tasol bihain bai yupela i no inap lukim ol gen.+
14 Jehova yet bai pait bilong helpim yupela,+ na yupela bai stap tasol na lukluk.”
15 Na Jehova i tokim Moses olsem: “Wai na yu wok long krai long mi? Tokim ol Israel long ol i mas wokabaut i go.
16 Na yu mas apim stik wokabaut bilong yu na makim solwara, na solwara bai bruk i go tupela hap. Na bai ol Israel i wokabaut i go long graun i drai namel long solwara.
17 Na bai mi larim het bilong ol Isip i kamap strong na bai ol i bihainim yupela i go namel long solwara i bruk. Na bai mi daunim Fero wantaim ol karis bilong pait, na ol soldia i sindaun long ol hos, na olgeta lain ami bilong em. Na bai mi kisim glori long dispela samting mi mekim.+
18 Taim mi daunim Fero wantaim ol karis bilong pait, na ol soldia i sindaun long ol hos, orait ol Isip bai save olsem mi tasol mi Jehova. Na bai mi kisim glori long dispela samting.”+
19 Na dispela ensel bilong God tru+ i save go pas long lain Israel, em i lusim dispela hap na i go baksait long ol. Na dispela klaut i save go pas long ol Israel, em tu i muv i go na sanap baksait long ol.+
20 Na klaut i stap namel long ol Isip na ol Israel.+ Na dispela klaut i mekim hap ol Isip i stap long en i kamap tudak tru. Tasol klaut i mekim hap bilong ol Israel i gat lait.+ Olsem na long dispela nait olgeta, ol Isip i no inap kam klostu long ol Israel.
21 Orait Moses i apim han bilong em na i makim solwara.+ Na Jehova i mekim strongpela win i kam long hap is na long nait olgeta, win i winim solwara na solwara i surik i go bek na bruk long tupela hap.+ Na hap namel we solwara i stap long en i kamap drai.+
22 Na ol Israel i wokabaut i go namel long solwara long dispela hap we graun i drai.+ Na wara i sanap olsem banis long rait sait na left sait bilong ol.+
23 Na ol Isip i ron bihainim ol Israel i go. Olgeta hos bilong Fero, ol karis bilong pait, na ol soldia i sindaun long ol hos, olgeta i bihainim ol Israel i go namel long solwara.+
24 Klostu long tulait* Jehova i stap long klaut na paia+ na em i lukluk i go daun long ami bilong ol Isip, na em i mekim na ol Isip i paul na longlong nabaut.
25 Na em i mekim na wil bilong ol karis i lus na ol Isip i hatwok long stiaim ol karis bilong ol. Na ol Isip i tok: “Yumi lusim ol Israel na ranawe i go bek, long wanem, Jehova i helpim ol na em i wok long pait long yumi ol Isip.”+
26 Orait Jehova i tokim Moses olsem: “Stretim han bilong yu na makim solwara, na bai solwara i kam bek na karamapim ol Isip na ol karis bilong pait wantaim ol soldia i sindaun long ol hos.”
27 Orait Moses i stretim han bilong em na makim solwara, na taim tulait i laik bruk, solwara i kam bek gen long ples bilong en olsem bipo. Na taim ol Isip i laik ranawe long solwara, Jehova i tromoi olgeta i go insait long solwara.+
28 Na solwara i kam bek na karamapim olgeta lain ami bilong Fero na ol karis bilong pait na ol soldia i sindaun long ol hos em ol i bin bihainim ol Israel i go namel long solwara.+ Na i no gat wanpela bilong ol i abrusim bagarap.+
29 Tasol ol Israel i wokabaut long graun i drai namel long solwara.+ Na wara i stap olsem banis long rait sait na left sait.+
30 Olsem na long dispela de, Jehova i kisim bek ol Israel long han bilong ol Isip.+ Na ol Israel i lukim ol bodi bilong ol Isip i slip nabaut long nambis.
31 Ol Israel i lukim Jehova i kamapim bikpela strong* bilong em long bagarapim ol Isip, na ol i pret long Jehova. Na ol i bilip long Jehova na long wokman bilong em, Moses.+
Ol Futnot
^ Em i klia olsem dispela em Solwara Retsi.
^ Dispela i makim klostu long 2 klok moning i go inap long 6 klok moning.
^ Hib., “han.”
