Kisim Bek 37:1-29
37 Besalel+ i wokim Bokis Kontrak+ long diwai akas. Longpela bilong en inap 2 na hap kiubit* na bikpela bilong en i 1 na hap kiubit, na em i go antap inap 1 na hap kiubit.+
2 Na em i karamapim insait na ausait bilong dispela bokis long gutpela gol. Na em i raunim arere bilong maus bilong bokis wantaim bilas em i wokim long gol.+
3 Bihain em i wokim 4-pela ring gol bilong en bilong pasim antap long 4-pela lek bilong en. Tupela ring i stap long wanpela sait bilong bokis na narapela 2-pela ring long narapela sait.
4 Na bihain em i kisim diwai akas na sapim 2-pela longpela stik na karamapim ol long gol.+
5 Na em i putim dispela 2-pela longpela stik i go insait long ol ring long 2-pela sait bilong Bokis Kontrak bilong karim Bokis Kontrak.+
6 Em i wokim ai bilong bokis long gutpela gol.+ Longpela bilong en inap 2 na hap kiubit na bikpela bilong en i 1 na hap kiubit.+
7 Bihain em i kisim gol na paitim long hama na wokim 2-pela serap+ antap long ai bilong bokis long 2-pela sait.+
8 Wanpela serap i stap long rait sait, na narapela i stap long left sait. Em i wokim 2-pela serap antap long ai bilong bokis long 2-pela sait.
9 Dispela 2-pela serap i opim wing bilong ol i go antap na haitim ai bilong bokis+ na 2-pela i feisim narapela narapela. Na 2-pela i brukim skru na daunim pes i go daun long ai bilong bokis.+
10 Na tu, em i wokim wanpela tebol long diwai akas.+ Longpela bilong en i 2-pela kiubit, na bikpela bilong en i 1-pela kiubit, na i go antap inap 1 na hap kiubit.+
11 Na em i karamapim dispela tebol long gutpela gol na em i raunim arere bilong en long bilas em i wokim long gol.
12 Bihain em i wokim sait bilong tebol, na bikpela bilong en inap olsem sais bilong 4-pela pinga* na em i raunim arere bilong sait bilong tebol long bilas em i wokim long gol.
13 Na em i wokim 4-pela ring gol bilong dispela tebol na pasim ol dispela 4-pela ring long 4-pela kona long hap we lek i join wantaim tebol.
14 Ol dispela ring i bilong holim ol longpela stik bilong karim tebol. Ol ring i stap klostu long sait bilong tebol.
15 Na em i kisim diwai akas na sapim 2-pela longpela stik na karamapim ol long gol. Ol dispela stik i bilong karim tebol.
16 Bihain em i kisim gutpela gol na wokim ol samting bilong tebol. Em i wokim ol dis, ol kap, na ol boul na ol jak em ol bai yusim bilong kapsaitim wain olsem ofa.+
17 Na em i kisim gutpela gol na wokim wanpela lamsten.+ Em i paitim dispela gol long hama na wokim lamsten. Dispela lamsten i gat as na bun bilong en. Na bun bilong en i gat ol liklik lip,* ol kru bilong plaua, na ol plaua.+
18 Dispela lamsten i gat 6-pela han i join long bun bilong en. Tripela han bilong lamsten i stap long wanpela sait na 3-pela long narapela sait bilong en.
19 Na long ol han long wanpela sait i gat 3-pela liklik lip i luk olsem plaua bilong diwai almon, na kru na plaua, wanpela i stap paslain long narapela. Na long narapela sait, em i wokim wankain samting long ol han bilong en. Em i mekim olsem long ol dispela 6-pela han i join long bun bilong lamsten.
20 Na bun bilong lamsten i gat 4-pela liklik lip i luk olsem plaua bilong diwai almon wantaim ol kru na plaua, wanpela i stap paslain long narapela.
21 I gat wanpela kru i stap aninit long 2-pela han i join long bun, na narapela kru i stap aninit long narapela 2-pela han, na narapela kru i stap aninit long narapela 2-pela han. I gat 6-pela han i join long bun bilong lamsten.
22 Em i kisim wanpela hap gutpela gol na paitim long hama na wokim dispela lamsten olgeta wantaim ol kru na ol han bilong en.
23 Na em i kisim gutpela gol na wokim 7-pela lam+ bilong putim long lamsten. Na em i wokim tu ol tong bilong holim wik bilong lam na ol plet bilong putim wik.
24 Em i kisim 1-pela talen* gutpela gol na wokim dispela lamsten na olgeta samting bilong en.
25 Em i kisim diwai akas na wokim alta bilong kukim paura bilong kamapim smok i gat gutpela smel.+ Alta i skwe, longpela bilong en i 1-pela kiubit, bikpela bilong en i 1-pela kiubit na i go antap inap 2-pela kiubit. Na em i wokim ol kom antap long alta.+
26 Na em i karamapim antap bilong en, ol sait bilong en, na ol kom bilong en long gutpela gol. Na em i raunim arere bilong en wantaim bilas em i wokim long gol.
27 Em i wokim 2-pela ring gol long wanpela sait bilong alta na 2-pela ring gol long narapela sait. Ol dispela ring i stap aninit long bilas gol na ol i bilong holim 2-pela longpela stik bilong karim alta.
28 Na em i kisim diwai akas na sapim 2-pela longpela stik na karamapim ol long gol.
29 Na em i wokim oil holi+ na gutpela paura bilong kamapim smok i gat gutpela smel.+ Em i miksim na wokim gut.*
Ol Futnot
^ Dispela i makim ol lip i stap long beis bilong plaua.
^ O, “olsem man i save wokim pefium.”
