Sapta 28

Askim Long Tambuim Kaikai

JISAS i bin go long Pasova long yia 30 na nau wanpela yia i go pinis. Jon Bilong Baptais i stap kalabus inap sampela mun pinis. Jon i laik bai ol disaipel bilong em i go bihainim Jisas, tasol sampela ol i no mekim.

Nau sampela disaipel bilong Jon i kamap long Jisas na ol i askim em: “Olsem wanem na mipela wantaim ol Farisi mipela i save tambu long kaikai, tasol ol disaipel bilong yu ol i no save tambu long kaikai?” Ol Farisi i save tambuim kaikai tupela taim long wik; em pasin bilong lotu. Ating ol disaipel bilong Jon tu i tingim lotu na ol i tambuim kaikai. Na ating ol i mekim long wanem Jon i stap kalabus, na ol i ting ol disaipel bilong Jisas tu i mas mekim.

Jisas i tokim ol: “Sapos wanpela man i laik marit, ating ol wantok bilong en inap bel hevi long taim em i stap yet wantaim ol? Nogat. Tasol bihain, taim ol i kisim dispela man i go pinis na em i no moa i stap wantaim ol wantok bilong en, orait ol bai i tambu long kaikai.”

Ol disaipel bilong Jon i mas tingim wanpela tok Jon yet i bin mekim, em i tok Jisas i olsem Man i laik marit. Orait taim Jisas i stap yet wantaim ol, Jon i no ting ol i mas tambuim kaikai. Ol disaipel bilong Jisas i gat wankain tingting. Bihain, taim Jisas i dai pinis, nau ol disaipel bilong em i tambuim kaikai. Tasol taim em i kirap bek pinis na i go long heven, i no gat as moa na ol i bel hevi na tambuim kaikai.

Orait, nau Jisas i mekim sampela tok piksa, olsem: “I no gat man i save kisim hap nupela laplap bilong samapim hul long olpela saket. Sapos em i mekim olsem, orait taim ol i wasim saket dispela laplap bilong pasim hul em bai i go liklik na brukim saket gen, na hul bai i kamap bikpela moa. Na i no gat man i save pulimapim nupela wain long olpela skin meme. Sapos ol i mekim olsem, orait skin meme bai i bruk, na wain bai i kapsait i go long graun, na skin meme tu bai i bagarap. Olsem na ol i save pulimapim nupela wain long nupela skin meme.” Olsem wanem dispela tupela tok piksa i stret long askim bilong tambuim kaikai?

Jisas i laik bai ol disaipel bilong Jon i ken save, ol disaipel bilong Jisas i no ken bihainim ol olpela lo bilong lotu Juda, olsem pasin bilong ol long tambuim kaikai. Jisas i no kam bilong stretim olpela pasin bilong wanpela lotu i laik pinis, em ol man yet i as bilong planti pasin na lo bilong en. Lotu Kristen i no ken bihainim ol pasin na lo bilong lotu Juda​—em i no ken i stap olsem hap nupela laplap bilong samapim hul long olpela saket, o olsem nupela wain long olpela skin meme. Matyu 9:​14-17; Mak 2:18-22; Luk 5:​33-39; Jon 3:27-29.

▪ Husat ol i save tambuim kaikai? Bilong wanem ol i mekim?

▪ Bilong wanem ol disaipel bilong Jisas i no tambuim kaikai taim em i stap yet wantaim ol? Na bihain wanem samting i kamap na i no gat as moa long ol i tambuim kaikai?

▪ Jisas i mekim wanem ol tok piksa? Wanem insait bilong ol dispela tok piksa?